Gujarati News

નવી દિલ્હી: ચીન દ્વારા ફરી એક વખત સરહદ પર આક્રમક વલણ અપનાવવામાં આવ્યુ છે. ચીની સેના પીપુલ્સ લિબરેશન આર્મી (PLA)એ દેમચુકમાં સિંધુ નદી પાસે બેનર અને ચીની ઝંડા લહેરાવ્યા છે. આ દરમિયાન ચીની સેના સાથે કેટલાક નાગરિક પણ હતા. આ ઘટના 6 જુલાઇની હોવાનું કહેવામાં આવી રહ્યુ છે.

જાણકારી અનુસાર, ચીન દ્વારા આ હરકત ત્યારે કરવામાં આવી જ્યારે દેમચુકમાં સ્થાનિક લોકો બૌદ્ધ ધર્મગુરૂ દલાઇ લામાનો જન્મ દિવસ મનાવી રહ્યા હતા. આ દરમિયાન આશરે પાંચ વાહન આવ્યા અને એકથી દોઢ કલાક સુધી આ વિસ્તારમાં રહ્યા હતા.

દલાઇ લામાને લઇને ભડક્યુ ચીન?

ચીન અવાર નવાર દલાઇ લામાના મુદ્દા પર ભારતનો વિરોધ કરતુ આવ્યુ છે. દલાઇ લામા લાંબા સમયથી ભારતમાં જ રહે છે. ખાસ વાત એ છે કે દલાઇ લામાના જન્મ દિવસ પર વડાપ્રધાન નરેન્દ્ર મોદીએ તેમની સાથે વાતચીત કરી હતી, સાથે જ સોશિયલ મીડિયા પર જન્મદિવસની શુભેચ્છા પણ પાઠવી હતી, જેને ચીનને લઇને એક મેસેજ માનવામાં આવી રહ્યો હતો.

એક વર્ષથી ચાલી રહ્યો છે ભારત-ચીન વચ્ચે વિવાદ

મહત્વપૂર્ણ છે કે ભારત અને ચીન વચ્ચે લાંબા સમયથી લદ્દાખની સરહદ પર ટકરાવ ચાલી રહ્યો છે. વર્ષ 2020માં એપ્રિલ-મેમાં ચીન દ્વારા લદ્દાખ સરહદ પર ઘૂષણખોરીનો પ્રયાસ કરવામાં આવ્યો હતો, ત્યારથી ભારત અને ચીન વચ્ચે સરહદ પર ટકરાવની સ્થિતિ છે.

આ દરમિયાન બન્ને દેશોની સેનામાં કેટલીક વખત અથડામણ થઇ છે, ગોળી પણ ચલાવવામાં આવી છે. બન્ને દેશોએ આ વિવાદને સેન્ય લેવલની વાતચીત, કૂટનીતિક રસ્તાથી હલ કરવાનો પ્રયાસ કર્યો છે. જોકે, કેટલાક રાઉન્ડની વાતચીત બાદ હજુ સુધી કોઇ હલ નીકળ્યો નથી, સાથે જ લાંબા સમયથી વાતચીત પણ બંધ છે.