Gujarati News

નવી દિલ્હી :ગોગરા હોટસ્પ્રિંગ્સ વિસ્તારમાં પેટ્રોલ પોઈન્ટ 15 પરથી ભારતીય અને ચીનના સૈનિકો સંપૂર્ણપણે હટી ગયા છે. આ મામલાથી વાકેફ અધિકારીઓએ જણાવ્યું કે આ સમગ્ર પ્રક્રિયાના ભાગરૂપે આગળના સૈનિકોને પાછળથી હટાવી નાખવામાં આવ્યા છે. આ ઉપરાંત, ત્યાં બનાવેલ કામચલાઉ ઈન્ફ્રાસ્ટ્રક્ચરને પણ તોડી પાડવામાં આવ્યું છે. અને છૂટા થવાની સમગ્ર પ્રક્રિયાનું પણ મૂલ્યાંકન કરવામાં આવ્યું છે. મે 2020માં ભારત અને ચીની સૈનિકો વચ્ચેની મડાગાંઠ પછી છૂટા પડવાનો આ ચોથો રાઉન્ડ છે. તેની પૂર્ણાહુતિ બાદ હવે વણઉકેલાયેલા વિસ્તારો પર ધ્યાન આપવામાં આવી રહ્યું છે. જેમાં ડેપસાંગ અને ડેમચોકનો સમાવેશ થાય છે.

બંને દેશોની સેનાઓએ ગુરુવારે જાહેરાત કરી કે તેઓએ પૂર્વી લદ્દાખના ગોગરા-હોટસ્પ્રિંગ વિસ્તારમાં પેટ્રોલિંગ પોઈન્ટ 15થી પીછેહઠ કરવાનું શરૂ કર્યું છે. વિદેશ મંત્રાલયે 9 સપ્ટેમ્બરે કહ્યું હતું કે 12 સપ્ટેમ્બર સુધીમાં પરત ખેંચવાની પ્રક્રિયા પૂર્ણ કરવામાં આવશે. બીજી તરફ, ભૂતપૂર્વ ડિરેક્ટર જનરલ ઑફ મિલિટરી ઓપરેશન્સ લેફ્ટનન્ટ જનરલ વિનોદ ભાટિયા (નિવૃત્ત)એ જણાવ્યું હતું કે મંત્રણા યોગ્ય દિશામાં આગળ વધી રહી હોવાનું જણાય છે. બાકીના બે ક્ષેત્રોમાં બાકી રહેલી સમસ્યાઓના નિરાકરણ માટે આપણે રાજકીય, રાજદ્વારી અને સૈન્ય સ્તરે વાતચીત ચાલુ રાખવી જોઈએ. સાથે જ, દરેક રાઉન્ડની વાટાઘાટો પછી પરિણામની આશા ન રાખવી જોઈએ.”

, ભારત ચાઈના કોર્પ્સ કમાન્ડર સ્તરની બેઠકના 16માં રાઉન્ડમાં ગોગરા-હોટ સ્પ્રિંગ્સ પીપી-15 વિસ્તારમાંથી હટી જવાનો કરાર કરવામાં આવ્યો હતો. આ પછી, આર્મી ચીફ જનરલ મનોજ પાંડેએ સોમવારે કહ્યું કે પૂર્વી લદ્દાખમાં ગોગરા-હોટસ્પ્રિંગ્સ વિસ્તારમાં પેટ્રોલિંગ પોઈન્ટ 15 પરથી ભારતીય અને ચીનના સૈનિકોને પાછા હટાવવાની પ્રક્રિયા નિર્ધારિત મુજબ ચાલી રહી છે.

ચીની સૈન્યએ ગોગરા-હોટસ્પ્રિંગ્સ પેટ્રોલિંગ પોઈન્ટ 15 પરથી પાછા હટવાનું શરૂ કર્યું હોવાની જાહેરાત કર્યાના એક દિવસ બાદ 9 સપ્ટેમ્બરે વિદેશ મંત્રાલય દ્વારા નિવેદન આપવામાં આવ્યું હતું. વિદેશ મંત્રાલયના પ્રવક્તા અરિંદમ બાગચીએ કહ્યું હતું કે કરાર મુજબ, પ્રદેશમાં પાછા ખેંચવાની પ્રક્રિયા 8 સપ્ટેમ્બરના રોજ સવારે 8:30 વાગ્યે શરૂ થઈ હતી અને 12 સપ્ટેમ્બર સુધીમાં પૂર્ણ થશે.