Gujarati News

નવી દિલ્‍હી તા. ૧૪ : દેશમાં પેસેન્‍જર વાહનોનું કુલ વેચાણ એક વર્ષ અગાઉના સમાન સમયગાળાની સરખામણીએ માર્ચમાં ચાર ટકા ઘટીને ૨,૭૯,૫૦૧ યુનિટ થયું હતું. વાહન ઉત્‍પાદકોની સંસ્‍થા SIAM એ જણાવ્‍યું કે માર્ચ ૨૦૨૧માં પેસેન્‍જર વાહનોનું વેચાણ ૨,૯૦,૯૩૯ યુનિટ થયું હતું.
તાજેતરના ડેટા અનુસાર માર્ચમાં ટુ-વ્‍હીલરનું વેચાણ ૨૧ ટકા ઘટીને ૧૧,૮૪,૨૧૦ યુનિટ થયું હતું. માર્ચ ૨૦૨૧માં ટુ વ્‍હીલરનું વેચાણ ૧૪,૯૬,૮૦૬ યુનિટ હતું. આ સમયગાળા દરમિયાન મોટરસાઇકલનું વેચાણ ૯,૯૩,૯૯૬ યુનિટથી ૨૧ ટકા ઘટીને ૭,૮૬,૪૭૯ યુનિટ થયું છે. સ્‍કૂટરનું વેચાણ પણ ૨૧ ટકા ઘટીને ૩,૬૦,૦૮૨ યુનિટ થયું છે. એક વર્ષ અગાઉના સમાન મહિનામાં ટુ-વ્‍હીલર કંપનીઓએ ૪,૫૮,૧૨૨ સ્‍કૂટર વેચ્‍યા હતા.
પેસેન્‍જર વાહનોનું એકંદર વેચાણ ૨૦૨૦-૨૧માં ૨૭,૧૧,૪૫૭ વાહનોની સરખામણીએ સંપૂર્ણ નાણાકીય વર્ષ ૨૦૨૧-૨૨ માટે ૧૩ ટકા વધીને ૩૦,૬૯,૪૯૯ વાહનો થયું છે. જો કે, ગયા નાણાકીય વર્ષમાં એકંદરે ટુ-વ્‍હીલરનું વેચાણ ૧૧ ટકા ઘટીને ૧,૩૪,૬૬,૪૧૨ યુનિટ થયું હતું. પાછલા નાણાકીય વર્ષમાં ટુ-વ્‍હીલરનું વેચાણ ૧,૫૧,૨૦,૭૮૩ યુનિટ હતું.
નાણાકીય વર્ષ દરમિયાન થ્રી-વ્‍હીલરનું વેચાણ વધીને ૨,૬૦,૯૯૫ યુનિટ થયું હતું જે અગાઉના નાણાકીય વર્ષમાં ૨,૧૯,૪૪૬ યુનિટ હતું. વાણિજિયક વાહનોનું વેચાણ ૫,૬૮,૫૫૯ એકમોથી વધીને ૭,૧૬,૫૬૬ યુનિટ થયું હતું.જોકે, નાણાકીય વર્ષ દરમિયાન શ્રેણીઓમાં વાહનોનું એકંદર વેચાણ ઘટીને ૧,૭૫,૧૩,૫૯૬ યુનિટ થયું હતું. ૨૦૨૦-૨૧માં વાહનોના વેચાણનો કુલ આંકડો ૧,૮૬,૨૦,૨૩૩ યુનિટ રહ્યો હતો.
સિયામના પ્રમુખ કેનિચી આયુકાવાએ જણાવ્‍યું હતું કે પાછલું વર્ષ ઉદ્યોગ માટે મોટા પડકારો પૈકીનું એક રહ્યું છે. આ દરમિયાન ઈન્‍ડસ્‍ટ્રીને પણ નવો પાઠ શીખવા મળ્‍યો. આયુકાવાએ જણાવ્‍યું હતું કે ભારતીય ઓટો ઉદ્યોગે તેની મૂલ્‍ય સાંકળને ટકાવી રાખવા માટે આ પડકારો સામે ઉગ્રતાથી લડત આપી છે. આ દરમિયાન, સરકારે ઉત્‍પાદન આધારિત પ્રોત્‍સાહન (PLI) યોજના, FAME યોજનાના વિસ્‍તરણ દ્વારા ઉદ્યોગને ટેકો આપ્‍યો.