Gujarati News

નવી દિલ્‍હી,તા.૧૮: ચૂંટણી રણનીતિકાર પ્રશાંત કિશોર ટૂંક સમયમાં કોંગ્રેસ સાથે નવી રાજકીય ઇનિંગ શરૂ કરી શકે છે. એક સપ્તાહમાં આ અંગે ચિત્ર સ્‍પષ્ટ થશે. પરંતુ આ નિર્ણય લેવો સરળ નથી. પાર્ટીમાં અસંતુષ્ટ નેતાઓ સહિત એક મોટો વર્ગ પ્રશાંત કિશોરના સમાવેશની વિરુદ્ધ છે.

નેતાઓનું કહેવું છે કે પ્રશાંતની કામ કરવાની રીત કોંગ્રેસની રીત સાથે મેળ ખાતી નથી. ઘણા નેતાઓ તેમના અન્‍ય પક્ષો સાથેના સંબંધો પર પણ સવાલો ઉઠાવી રહ્યા છે. એક વરિષ્ઠ નેતાએ કહ્યું કે પ્રશાંત પાર્ટીમાં જોડાશે કે કેમ તે અંગેનો અંતિમ નિર્ણય કોંગ્રેસ અધ્‍યક્ષે લેવાનો છે.

પાંચ રાજયોમાં હાર અને આગામી ગુજરાત-હિમાચલ ચૂંટણીને લઈને કોંગ્રેસ નેતૃત્‍વ પર દબાણ વધી ગયું છે. આથી કોંગ્રેસે ફરી પ્રશાંત કિશોર સાથે વાતચીત શરૂ કરી છે. પાર્ટી તેમને ગુજરાત સુધી સીમિત રાખવા માંગતી હતી, પરંતુ પ્રશાંત ઈચ્‍છે છે કે તેમને ૨૦૨૪ની ચૂંટણીની જવાબદારી પણ મળે. એક અસંતુષ્ટ નેતાએ કહ્યું કે કોંગ્રેસને પુનર્જીવિત કરવાના પ્રયાસોમાં દરેકનું સ્‍વાગત છે, પરંતુ પાર્ટીની પોતાની વિચારધારા અને પરંપરા છે. તેથી પ્રશાંતની ભૂમિકા નક્કી કરતી વખતે તેને ધ્‍યાનમાં રાખવું પડશે. અન્‍યથા નુકસાન થઈ શકે છે.

કોંગ્રેસના નેતાઓ સમક્ષ ૨૦૨૪ની વ્‍યૂહરચના માટેની બ્‍લુપ્રિન્‍ટ રજૂ કરતાં પ્રશાંત કિશોરે સાંપ્રદાયિક ધ્રુવીકરણની દલીલને નકારી કાઢી હતી. તેમણે કહ્યું કે વિધાનસભા અને લોકસભા ચૂંટણીમાં ભાજપની જીત પાછળ કોમી ધ્રુવીકરણનું કારણ નથી. સૂત્રોના જણાવ્‍યા અનુસાર રાહુલ ગાંધી પણ આ દલીલ સાથે સહમત દેખાયા હતા.

ગત વર્ષે પ્રશાંત કિશોર કેટલાક મુદ્દાઓ પર સર્વસંમતિના અભાવે કોંગ્રેસમાં જોડાઈ શક્‍યા ન હતા. એક વરિષ્ઠ નેતાએ કહ્યું કે પ્રશાંત ચૂંટણીની રણનીતિ નક્કી કરવામાં મુક્‍ત હાથ ઈચ્‍છે છે. તેથી સર્વસંમતિ સધાઈ શકી નથી. પરંતુ આ વખતે ચિત્ર અલગ છે.