Gujarati News

લંડન, તા.૨૪: બ્રિટનમાં કોરોના વાયરસનાં હાહાકાર સાથે કોરોનાનો નવો સ્ટ્રેન બહાર આવ્યા બાદ આખી દુનિયા ગભરાઈ ગઈ છે. બ્રિટનમાં અત્યાર સુધી કોરોના વાયરસના ત્રણ નવા પ્રકાર(સ્ટ્રેન) જોવા મળ્યા છે, તે ખૂબ જ જોખમી અને ચેપી હોવાનું કહેવાય છે.

આ વાયરસની ભયાનકતાએ યુરોપ સહિત સમગ્ર વિશ્વમાં હંગામો મચાવ્યો છે.

આ નવા સ્ટ્રેન પર કોરોના વાયરસની વેકિસન અસરકારક રહેશે કે કેમ તેની ચર્ચા વચ્ચે, અમેરિકન કંપની મોડર્નાએ આશા વ્યકત કરી છે કે, તેની વેકિસન કોરોના વાયરસનાં નવા સ્ટ્રેન પર પણ અસરકારક કામ કરશે.

રસી નિર્માતા મોડર્ના ઇંકે બુધવારે કહ્યું હતું કે, તે અપેક્ષા રાખે છે કે, તેની કોવિડ -૧૯ રસી યુકેમાં મળી આવતા કોરોના વાયરસના નવા પ્રકારો સામે રક્ષણાત્મક હશે. કંપનીએ જણાવ્યું હતું કે તે કોરોના વાયરસના કોઈપણ સ્ટ્રેન સામે રસીની અસરની પુષ્ટિ કરવા માટે પરીક્ષણો કરવાની યોજના ધરાવે છે.

વધુમાં જણાવામાં આવે છે કે, મોડર્નાની આ ટિપ્પણી એવા સમયે આવી છે, જયારે યુકે સરકાર કોરોના વાયરસના નવા સ્ટ્રેન અને નોંધપાત્ર જોખમવાળા સ્ટ્રેનને કારણે સખત નિયંત્રણો લાગુ કરવાની યોજના બનાવી રહી છે.

કંપનીએ વધુમાં જણાવ્યું હતું કે, તેને આશા છે કે તેની રસી, જેને તાજેતરમાં યુ.એસ. માં કટોકટીના ઉપયોગ માટે મંજૂરી આપવામાં આવી છે, તે બ્રિટનમાં મળેલા કોરોના વાયરસના નવા સ્ટ્રેન સામે પણ રક્ષણાત્મક રહેશે.

કંપનીએ કહ્યું કે અમે પહેલાથી જ રોગચાળાના પ્રથમ ફાટી નીકળેલા સાર્સ કોવી -૨ વાયરસના અગાઉના પ્રકારોની સરખામણીમાં, આધુનિક કોવિડ-૧૯ રસીથી પ્રાણીઓ અને માણસોના સેરાનું પરીક્ષણ કર્યું છે. અને અમને મળ્યું છે કે અમારી રસી પણ એટલી અસરકારક છે.

મોડર્નાએ કહ્યું કે તે આગામી સપ્તાહમાં તેની અપેક્ષાની પુષ્ટિ કરવા માટે રસીનું વધારાનું પરીક્ષણ કરશે.