Gujarati News

મુંબઇ,તા.૨૪ : દેશના સૌથી ધનિક ઉદ્યોગપતિ અને દુનિયાના સૌથી અમીરોમાં સામેલ રિલાયન્સ ઈન્ડસ્ટ્રીઝના માલિક મુકેશ અંબાણી દાદા બની ગયા છે. ૧૦જ્રાક ડિસેમ્બર આકાશ અંબાણીની પત્ની શ્લોકા અંબાણીએ દીકરાને જન્મ આપ્યો. જૂનિયર અંબાણીના આવતા જ સમગ્ર અંબાણી પરિવાર ખુશીઓથી ઝૂમી ઉઠ્યો. હવે આકાશ અને શ્લોકા અંબાણીના દીકરાનું નામકરણ કરાયું છે. જેની ઓફિશિયલ જાહેરાત અંબાણી પરિવાર તરફથી કરવામાં આવી છે.

 આકાશ અને શ્લોકાના દીકરાનું નામકરણ કરવામાં આવ્યું છે. અંબાણી પરિવારે ઓફિશિયલ રીતે પોતાના પૌત્રના નામની જાહેરાત કરી છે. દેશના સૌથી ધનિક પરિવારના પૌત્ર અને આકાશ-શ્લોકા અંબાણીના દીકરાનું નામ 'પૃથ્વી આકાશ અંબાણી' રાખવામાં આવ્યું છે. પરિવાર તરફથી આ નામની જાહેરાત કરાઈ છે.

 અંબાણી પરિવાર તરફથી એક પ્રેસ સ્ટેટમેન્ટ જાહેર કરાયું છે. આ કાર્ડમાં લખવામાં આવ્યું છે કે, ભાગવાન કૃષ્ણની કૃપા અને ધીરૂભાઈ અંબાણીના આશીર્વાદથી, કોકિલાબેન અંબાણી અમારા દીકરા પૃથ્વી આકાશ અંબાણીની જાહેરાત કરતા આનંદિત અનુભવી રહ્યા છે. આનંદિત માતા-પિતા આકાશ-શ્લોકા. અતિપ્રસન્ન દાદા મુકેશ અને દાદી નીતા અંબાણી. આ કાર્ડમાં નાના અને નાની રસેલ મહેતા અને મોના મહેતાના નામનો પણ ઉલ્લેખ કરવામાં આવ્યો છે.

ઉલ્લેખનીય છે કે આકાશ અને હીરા વેપારી રસેલ મહેતાની દીકરી શ્લોકાના માર્ચ ૨૦૧૯માં લગ્ન થયા હતા. તેમના આ લગ્નમાં મોટા-મોટા રાજનેતાઓ સામેલ થયા હતા. બંનેના લગ્નના ઘણા વિડીયો અને તસવીરો સોશિયલ મીડિયા પર વાઈરલ થઈ હતી. અંબાણી પરિવારની વહુ શ્લોકા અને આકાશ એકસાથે સ્કૂલમાં અભ્યાસ કરતા હતા.