Gujarati News

કાનપુર,તા.૨૮ : પોતાની કાર્યપ્રણાલીને લઈને ચર્ચામાં રહેનારી ઉત્તર પ્રદેશની કાનપુર પોલીસ ફરીએકવાર વખતે ચર્ચામાં આવી ગઈ છે. હકીકતમાં સોશિયલ મીડિયા પર એક વીડિયો વાઈરલ થઈ રહ્યો છે. જેમાં કહેવાઈ રહ્યું છે કે વીકેન્ડ લોકડાઉનનું કડક પાલન કરાવવા બેકનગંજ પોલીસ માસ્ક વિના ફરી રહેલા બકરાને પકડીને જીપમાં નાખીને પોલીસ સ્ટેશન લઈ ગઈ. જોકે આ મામલે કાનપુર પોલીસે પ્રતિક્રિયા આપી છે.

કાનપુરમાં શનિવાર અને રવિવારે વીકેન્ડ લોકડાઉન હતું. પાછલા રવિવારે સાંજે બેકનગંજ પોલીસ સ્ટેશનની હદમાં પોલીસ કડકાઈથી લોકડાઉનનું પાલન કરાવી રહી હતી. જેમાં માસ્ક પહેર્યા વિના બહાર નીકળતા લોકો વિરુદ્ઘ કડક કાર્યવાહી કરવામાં આવી રહી હતી.

કહેવાઈ રહ્યું છે કે બેકનગંજ પોલીસે એક બકરાને માસ્ક પહેર્યા વિના ફરતો હોવાથી પકડી લીધો. પોલીસકર્મીઓએ તે બકરાને જીપમાં ભરી લીધો અને પોલીસ સ્ટેશન લઈ ગઈ. જયારે તેની સૂચના બકરાના માલિકને મળી તો તે પોલીસ સ્ટેશન પહોંચી ગયો અને પોલીસને બકરાને છોડી મૂકવા વિનંતી કરી. પોલીસકર્મીઓએ બકરાને રસ્તા પર રખડતો ન છોડવાની સલાહ આપીને માલિકને બકરો પાછો આપી દીધો.

વાઈરલ વીડિયોમાં સ્પષ્ટ જોઈ શકાય છે કે પોલીસની સરકારી જીપ પાસે એક બકરો ઊભો છે. તે બકરાને પોલીસકર્મીઓએ ચારેય બાજુએથી ઘેરી લીધો. આ બાદ ત્રણ પોલીસકર્મીઓ તેને જીપની અંદર ઉચકીને બેસાડે છે. પોલીસના આ કાર્યથી લોકો હવે હસી રહ્યા છે.

આ વિશે પોલીસે પાછળથી પ્રતિક્રિયા આપતા જણાવ્યું હતું કે પોલીસ પેટ્રોલિંગ કરી રહી હતી. આ દરમિયાન માસ્ક પહેર્યા વિના ફરી રહેલો યુવક બકરા સાથે જઈ રહ્યો હતો. જયારે પોલીસે તેને રોકવાનો પ્રયાસ કર્યો તો યુવક બકરો છોડીને ભાગી ગયો. પોલીસ ઘણા સમય સુધી યુવકની રાહ જોતી રહી પરંતુ તે પાછો ન આવતા તેઓ બકરાને જીપમાં બેસાડીને પોલીસ સ્ટેશન લઈ ગયા.