Gujarati News

રાજકોટઃ શહેરમાં સીટી બસમાં મહિલા કંડકટર એકાએક બેભાન થઇ ઢળી પડતાં ડ્રાઇવરે મુસાફરો સાથેની બસ સિવિલ હોસ્‍પિટલે લાવી કંડકટરને સારવાર માટે દાખલ કર્યા હતાં. જાણવા મળ્‍યા મુજબ એસઆરપી કેમ્‍પથી કોઠારીયા રૂટની સીટી બસ સવારે રેસકોર્ષ રીંગ રોડ જીલ્લા પંચાયત કચેરી અકિલા ચોક ખાતે પહોંચી ત્‍યારે આ બસના કંડકટર છાયાબેન અમરશીભાઇ લીંબાણી (ઉ.વ.૨૦) એકાએક બેભાન થઇ ઢળી પડતાં બસના ચાલકે તુરત જ બસ મુસાફરો સાથેની આખી બસ સિવિલ હોસ્‍પિટલે પહોંચાડી દીધી હતી અને મહિલા કંડકટરને તુરંત સારવાર અપાવી હતી. છાંયાબેને કહ્યું હતું કે પોતે પંદરેક દિવસથી જ નોકરીમાં જોડાયા છે. વહેલી સવારે નાસ્‍તો કર્યો ન હોઇ એ કારણે ચક્કર આવી ગયા હતાં. તસ્‍વીરમાં હોસ્‍પિટલે લાવવામાં આવેલી સીટી બસ, મહિલા કંડકટર છાંયાબેનની સારવાર શરૂ થઇ તે દ્રશ્‍ય જોઇ શકાય છે. ડ્રાઇવરની સમય સુચકતાથી મહિલા કંડકટરને તુરંત સારવાર મળી જતાં તેમની તબિયત સ્‍વસ્‍થ થઇ હતી. (ફોટોઃ અશોક બગથરીયા)