Gujarati News

Gujarati News

News of Saturday, 15th May 2021

બુમરાહની કારકિર્દી ઘડવામાં શેન બોન્ડની મહત્વની ભૂમિકા

બોન્ડ મુંબઈ ઈન્ડિયન્સ ટીમનો બોલિંગ કોચ છે : બુમરાહ હવે આગામી મહિને યુકેમાં ન્યૂઝીલેન્ડ વિરુદ્ધ રમાનારી વર્લ્ડ ટેસ્ટ ચેમ્પિયનશિપની ફાઈનલમાં રમશે

મુંબઈ,તા.૧૫ : ભારતીય ક્રિકેટ ટીમના સ્ટાર ઝડપી બોલર જસપ્રિત બુમરાહે જણાવ્યું છે કે ન્યૂઝીલેન્ડના ભૂતપૂર્વ ઝડપી બોલર શેન બોન્ડે તેની કારકિર્દી ઘડવામાં મહત્વની ભૂમિકા ભજવી છે. શેન બોન્ડ હાલમાં મુંબઈ ઈન્ડિયન્સ ટીમનો બોલિંગ કોચ છે. મુંબઈ ઈન્ડિયન્સ પાંચ વખત આઈપીએલ ચેમ્પિયન રહ્યું છે અને તે ટુર્નામેન્ટની સૌથી સફળ ટીમ છે. મુંબઈની સફળતામાં બુમરાહની ભૂમિકા ઘણી મહત્વની રહી છે.

       બુમરાહ હવે ન્યૂઝીલેન્ડ વિરુદ્ધ રમાનારી વર્લ્ડ ટેસ્ટ ચેમ્પિયનશિપની ફાઈનલમાં ભારતીય ઝડપી બોલિંગ આક્રમણની આગેવાની કરશે. મુંબઈ ઈન્ડિયન્સે તેના ટ્વિટર પેજ પર એક વિડીયો અપલોડ કર્યો છે જેમાં બુમરાહે વાતો કરી હતી. બુમરાહે જણાવ્યું હતું કે, જ્યાં હું મુંબઈ ટીમ સાથે નથી હોતો અને ભારતીય ટીમ સાથે હોવ છું ત્યારે પણ હું બોન્ડ સાથે વાતચીત કરવાનો પ્રયાસ કરતો રહું છું. મારા માટે આ યાદગાર સફર રહી છે. આશા છે કે હું પ્રત્યેક વર્ષે કંઈક નવું શીખું અને મારી બોલિંગમાં નવા પ્રયોગો કરવાનો પ્રયાસ કરું. આમાં બોન્ડની ભૂમિકા ઘણી મહત્વની રહી છે. અમારા વચ્ચે ઘણા સારા સંબંધો છે અને આશા છે કે આ સંબંધો હંમેશા જળવાઈ રહેશે. હું બોન્ડને પ્રથમ વખત ૨૦૧૫માં મળ્યો હતો. બાળપણમાં મેં ન્યૂઝીલેન્ડ માટે તેને બોલિંગ કરતો જોયો હતો અને હું ઘણો જ પ્રભાવિત થયો હતો. તેમણે મને બોલિંગમાં વિવિધતા લાવવા માટે મદદ કરી હતી. મારા માટે આ ઘણું મદદરૂપ રહ્યું અને મારી બોલિંગમાં સતત સુધારો થતો રહ્યો છે, તેમ બુમરાહે કહ્યું હતું. કેટલાક ખેલાડીઓને કોરોના થયા બાદ આઈપીએલ-૨૦૨૧ અધવચ્ચે જ રદ કરી દેવી પડી હતી. હવે ભારતીય ટીમ યુકેમાં ન્યૂઝીલેન્ડ સામે વર્લ્ડ ટેસ્ટ ચેમ્પિયનશિપની ફાઈનલ રમશે. આ ઉપરાંત ઈંગ્લેન્ડ વિરુદ્ધ પાંચ ટેસ્ટ મેચની સિરીઝ રમશે.

(8:35 pm IST)
  • દીવ-વેરાવળમાં અનેક હોર્ડિંગ્સ જમીન દોસ્ત : જાફરાબાદમાં વીજ ટ્રાન્સફોર્મર પડ્યું છે :અત્યાર સુધીમાં 234 વીજ થાંભલા પડયા: કાચા મકાનો અને ઝૂંપડાઓને ભારે નુકસાન: દરિયાકિનારાના 34 કાચા મકાનો તૂટી પડયા છે. access_time 1:41 am IST

  • રાજકોટ, મોરબી અને આસપાસના વિસ્તારોમાં સોમ અને મંગળવાર સુધીમાં ૫ થી ૭ ઇંચ જેવા ભારે વરસાદની સંભાવના દર્શાવવામાં આવી છે. bbc પણ રાજકોટને ભારે વરસાદવાળા ઝોનમાં મુકે છે. access_time 9:28 am IST

  • વાવાઝોડા- ભારે વરસાદની આગાહી સંદર્ભે આજી નદી કાંઠે રેડ એલર્ટ : રાજકોટમાં નદી કાંઠાના જંગલેશ્વર-બેડીપરા-રામનાથપરા વિસ્તારમાં માઇક દ્વારા લોકોને સાવચેત રહેવા ચેતવણી અપાઇઃ નદીના પટ્ટમાં અવર-જવર પર પ્રતિબંધઃ જરૂર પડે ૭૦૦ થી ૮૦૦નાં સ્થળાંતર માટે રેસ્કયુ સેન્ટર તૈયાર રખાયાઃ રબ્બર બોટ, દોરડા, ટયુબ સહિતનાં સાધનો સાથે રેસ્કયુ ટીમો તૈનાત access_time 12:15 pm IST