News of Monday, 5th May 2025
‘સિકંદર' ઈફેક્ટઃ સલમાને સંજય દત્ત સાથેની ‘ગંગા રામ' પડતી મૂકી
‘સિકંદર'ના ધબડકાનું કારણ સમજવા સલમાને ફેન્સ સાથે બોલાવ્યા અને ફેન્સની સલાહ માની પ્રોજેક્ટ મોકૂફ રાખ્યો

મુંબઇ તા.૫: સલમાન ખાને લાંબા સમય બાદ ફરી સંજય દત્ત સાથે કામ કરવા તૈયારી શરૂ કરી હતી. ‘ગંગા રામ' નામની આ ફિલ્મનું ડાયરેક્શન ક્રિશ આહિરને સોંપવાનું નક્કી પણ થઈ ગયું હતું. આ ફિલ્મમાં સલમાન ખાને ગંગા અને સંજય દત્તે રામનો રોલ કરવાનો હતો. એક્શન એન્ટરટેઈનર ‘ગંગા રામ'ની તૈયારીઓ ચાલતી હતી ત્યારે ‘સિકંદર' રિલીઝ થઈ હતી. ‘સિકંદર' ઓડિયન્સને ખાસ પસંદ આવી નહીં અને સ્વાભાવિકપણે સલમાન ખાનને પણ આ નિષ્ફળતા મંજૂર ન હોતી. સલમાન ખાને આગામી ફિલ્મોની આવી હાલત ન થાય તે હેતુથી પોતાના સિલેક્ટેડ ફેન્સને મળવા બોલાવ્યા હતા. ‘સિકંદર'ની નિષ્ફળતાના કારણો ચર્ચા દરમિયાન ફેન્સે સલમાનને ‘ગંગા રામ'થી દૂર રહેવાની સલાહ આપી હતી.
ફિલ્મ હિટ કે ફ્લોપ જવાથી સલમાન ખાનના ફેન બેઝમાં કયારેય ફેર પડ્યો નથી અને સલમાન પોતે પણ ફેન્સ સાથે કનેક્ટ રહેવા પ્રયાસ કરતા રહે છે. ‘સિકંદર'ની રિલીઝ પછી ફેન્સને ખબર પડી હતી કે સલમાને ‘ગંગા રામ'ની તૈયારી શરૂ કરી છે. સલમાન અને સંજય દત્તની જોડી ‘ગંગા રામ'ને હિટ બનાવશે તેવી મેકર્સને આશા હતી. જો કે ઓડિયન્સના મિજાજને પારખનારા ફેન્સે સલમાનને ‘ગંગા રામ'થી દૂર રહેવા કહ્યું હતું. સલમાનને રૂબરૂ ન મળ્યા હોય તેવા ફેન્સ પણ આ ઝુંબેશમાં જોડાયા અને ‘ગંગા રામ' પડતી રાખવા સલમાનને સલાહ આપી હતી.
તમામ ફેન્સે એક સૂરે સલમાનને ‘ગંગા રામ'થી દૂર રહેવાનું કહ્યા પછી સલમાન ખાને પણ આ બાબતે ગંભીરતાથી વિચારણા કરી. થોડા દિવસો બાદ સલમાને ‘ગંગા રામ'ને હોલ્ડ પર મૂકવાનો નિર્ણય લીધો. સલમાન ખાને હવે કબીર ખાન, અલી અબ્બાસ ઝફર અને સૂરજ બરજાત્યા જેવા અન્ય ફિલ્મ મેકર્સની સ્ક્રિપ્ટ તરફ નજર દોડાવી છે. ‘
ગંગા રામ'થી દૂર રહેવાનું નક્કી કર્યા પછી સલમાને અપૂર્વ લાખિયાના ડાયરેક્શનમાં વોર એક્શન ફિલ્મ ફાઈનલ કરી છે. ૨૦૨૦ના વર્ષમાં ગલવાન વેલીમાં ચીન સાથે થયેલા સંઘર્ષ આધારિત આ ફિલ્મમાં સલમાન ખાન ભારતીય આર્મી ઓફિસરનો રોલ કરવાના છે. દરેક ફિલ્મ સ્ટાર પોતાની ફિલ્મ નિષ્ફળ ગયા પછી તેના કારણો શોધવા મથામણ કરે છે. જો કે સલમાનની જેમ બહુ જૂજ સ્ટાર્સ પોતાના ફેન્સને મળે છે અને ઓડિયન્સના મિજાજને પારખવા માગે છે. સોશિયલ મીડિયા પર તો ફેન્સને પોતાના માનીતા સ્ટારની નિષ્ફળતા ગમતી નથી અને તેઓ આ અંગે બોલતા પણ નથી. જો કે સલમાને સોશિયલ મીડિયાની સાથે રૂબરૂ મુલાકાતો દ્વારા પણ ફેન્સને કનેક્ટ રાખ્યા છે. સલમાન સામે ચાલી તેમને મળવા બોલાવે છે અને ફિલ્મની નિષ્ફળતાને મૂલવે છે.
‘સિકંદર'ના ધબડકાને ભૂલાવી સલમાને પણ શાહરૂખની જેમ મોટા પાયે કમબેકનું વિચાર્યું છે ત્યારે આગામી ફિલ્મની પસંદગીમાં સલમાને ફેન્સના અભિપ્રાય પણ લીધા હોવાનું કહેવાય છે.
(10:33 AM IST)









છેલ્લા 8 દિવસમાં સૌથી લોકપ્રિય 
