મુંબઈ ૫: સચિન-પરંપરા, બોલિવુડ ફિલ્મ *'દો પટ્ટી'*ના તેમના ગીત 'રાંઝણ' પર ઉઠેલા પ્લેજિયરિઝમ (સાહિત્યિક ચોરી)ના આક્ષેપો સામે કાયદેસરની કાર્યવાહી કરવાની તૈયારી કરી રહ્યા છે. આંતરરાષ્ટ્રીય મ્યુઝિક પ્રોડ્યુસર KMKZએ આરોપ લગાવ્યો હતો કે આ ગીતમાં તેમની પિયાનો કમ્પોઝિશનનો ઉપયોગ કરવામાં આવ્યો છે, પરંતુ સચિન-પરંપરાએ આ આરોપોને સદંતર નકારી કાઢ્યા છે.
 
સચિન-પરંપરાનો આકરો જવાબ
સચિન-પરંપરાએ નિવેદનમાં કહ્યું છે કે આ આરોપો પાયાવિહોણા છે અને માત્ર પબ્લિસિટી સ્ટંટ છે. તેમણે જણાવ્યું કે મોટાભાગના સ્ટ્રીમિંગ પ્લેટફોર્મ્સે તેમના ગીતની અધિકૃતતા ચકાસી લીધી છે અને KMKZના કોપીરાઈટ ક્લેમને ફગાવી દીધો છે. આ સાથે જ તેમણે KMKZ સામે બદનક્ષીનો દાવો કરવાની યોજના બનાવી છે.
 
'કોર્ડ પ્રોગ્રેશન' પર સ્પષ્ટતા
સચિન-પરંપરાએ એ પણ સ્પષ્ટ કર્યું કે ગીતમાં ઉપયોગમાં લેવાતા કોર્ડ પ્રોગ્રેશન (સંગીતના સ્વર) સામાન્ય છે અને તેનો ઉપયોગ સંગીતકારો દ્વારા વ્યાપકપણે થતો હોય છે, તેથી તેને પ્લેજિયરિઝમનો આધાર ગણી શકાય નહીં.

આ વિવાદ પછી પણ 'રાંઝણ' ગીતને અત્યાર સુધી સારો પ્રતિસાદ મળ્યો છે, અને સચિન-પરંપરા તેના કાયદેસરના અધિકારોનું રક્ષણ કરવા માટે પ્રતિબદ્ધ છે. આ મામલામાં હવે કાયદાકીય લડાઈ શરૂ થવાની શક્યતા છે.