મુંબઇ : પોલીસની આર્થિક ગુના શાખા (EOW) એ બોલિવૂડ અભિનેત્રી શિલ્પા શેટ્ટી અને તેના પતિ રાજ કુન્દ્રા સામે દાખલ કરાયેલા ₹60 કરોડના કથિત છેતરપિંડીના કેસની તપાસ વધુ તીવ્ર બનાવી છે. આ સંદર્ભમાં, ગયા અઠવાડિયે શિલ્પા શેટ્ટીનું નિવેદન નોંધવામાં આવ્યું હતું. તપાસ એજન્સીના જણાવ્યા અનુસાર, શિલ્પા શેટ્ટીએ તેના નિવેદનમાં જણાવ્યું હતું કે તેને બેસ્ટ ડીલ ટીવી પાસેથી ₹4 કરોડ મળ્યા હતા, પરંતુ આ રકમ કોઈ રોકાણ કે વ્યવસાયિક સોદા માટે નહીં, પરંતુ તેની સેલિબ્રિટી ફી માટે હતી. શિલ્પા શેટ્ટીએ તપાસકર્તાઓને જણાવ્યું હતું કે, "હું ખરેખર બેસ્ટ ડીલ ટીવીની ડિરેક્ટર હતી, પરંતુ કંપનીના પ્રમોશન અને જાહેરાત માટે સેલિબ્રિટી તરીકે ₹4 કરોડ મળ્યા હતા. મેં તે પ્લેટફોર્મ પર એક જાહેરાત ઝુંબેશમાં ભાગ લીધો હતો, જેના માટે મને ચૂકવણી કરવામાં આવી હતી."મુંબઈ પોલીસના એક અધિકારીએ જણાવ્યું હતું કે શિલ્પા શેટ્ટીએ જાન્યુઆરી 2016 માં તેના ડિરેક્ટર પદ પરથી રાજીનામું આપ્યું હતું. જોકે, જે કંપનીમાં તે ડિરેક્ટર હતી તેમાંથી પૈસા મેળવવાનો મામલો હવે તપાસ હેઠળ છે. આ સાચું છે કે ખોટું તે હજુ પણ અર્થઘટનનો વિષય છે. અધિકારીએ વધુમાં જણાવ્યું હતું કે તપાસ દરમિયાન, કંપનીના દસ્તાવેજોની તપાસમાં બીજી મહત્વપૂર્ણ માહિતી બહાર આવી છે. બોલીવુડ અભિનેતા અક્ષય કુમાર પણ શરૂઆતના તબક્કે કંપનીમાં ઇક્વિટી ધારક હતા. જોકે, અધિકારીએ સ્પષ્ટતા કરી હતી કે આ મામલે અક્ષય કુમારની કોઈ સીધી સંડોવણી મળી નથી. અક્ષય કુમારે ક્યારેય કંપનીની કોઈ બોર્ડ મીટિંગમાં ભાગ લીધો ન હતો કે ન તો તે કંપનીના રોજિંદા કામકાજમાં સામેલ હતો.