મુંબઇઃ બૉલીવુડ અભિનેત્રી દીપિકા પાદુકોણ છેલ્લા કેટલાક દિવસોથી ફિલ્મ સેટ પર ૮ કલાક કામ કરવાની તેમની માંગને લઈને ચર્ચામાં છે, જેના કારણે તેમણે બે મોટી ફિલ્મો પણ છોડી દીધી હોવાના અહેવાલો છે. હવે દક્ષિણની લોકપ્રિય અભિનેત્રી પ્રિયામણીએ આ મુદ્દે પ્રતિક્રિયા આપીને પોતાનો અભિપ્રાય રજૂ કર્યો છે. પ્રિયામણી ટૂંક સમયમાં મનોજ બાજપેયી સાથે લોકપ્રિય શ્રેણી "ફેમિલી મેન સીઝન 3" માટે શૂટિંગ શરૂ કરશે.
દીપિકાના આ નિવેદન વિશે વાત કરતાં પ્રિયામણીએ કહ્યું, "તે દરેક વ્યક્તિ પર આધાર રાખે છે. એવો સમય આવે છે જ્યારે આપણે અનુકૂલન સાધવું પડે છે, અને તે ઠીક છે. આપણે તેના માટે જગ્યા બનાવવી જોઈએ." પ્રિયામણીએ સંકેત આપ્યો કે ઉદ્યોગમાં દરેક વ્યક્તિ માટે લવચીક રહેવું અને સાથે મળીને કામ કરવું મહત્વપૂર્ણ છે.
માતા બન્યા પછી દીપિકા પાદુકોણે 'સ્પિરિટ' અને 'કલ્કી 2' જેવી ફિલ્મોમાંથી બહાર નીકળી જવાનો નિર્ણય લીધો, જેનાથી બોલિવૂડમાં ખળભળાટ મચી ગયો. માનવામાં આવે છે કે દીપિકાએ વર્ક-લાઇફ બેલેન્સ જાળવવા માટે ૮ કલાકની શિફ્ટમાં કામ કરવાનું નક્કી કર્યું, જેના કારણે તે આ મોટા પ્રોજેક્ટ્સમાંથી નીકળી ગઈ.
દીપિકા પાદુકોણે અગાઉ એક ઇન્ટરવ્યુમાં પોતાની માંગણીને યોગ્ય ઠેરવતા કહ્યું હતું કે, "મને નથી લાગતું કે મારી માંગ ખોટી છે. ફક્ત તે જ વ્યક્તિ સમજી શકે છે જેણે આ સિસ્ટમમાં કામ કર્યું છે."
તેમણે જૂની સિસ્ટમને પડકાર આપતા કહ્યું હતું કે, "એક મહિલા તરીકે, જો હું આ કહું, તો તે એક મુદ્દો બની જાય છે. પરંતુ ઘણા પુરુષ સુપરસ્ટાર વર્ષોથી ૮ કલાક કામ કરી રહ્યા છે, અને તે ક્યારેય ચર્ચામાં આવતું નથી." દીપિકાના મતે, ફિલ્મ ઉદ્યોગમાં મહિલાઓ માટે હવે સમાન પરિસ્થિતિઓ બનાવવાનો સમય આવી ગયો છે.
જોકે, પ્રિયામણીનું નિવેદન દર્શાવે છે કે ઉદ્યોગના અન્ય કલાકારો માટે, પરિસ્થિતિને ધ્યાનમાં રાખીને સમયપત્રકમાં સમાધાન કરવું એ સામાન્ય વાત છે.