મુંબઈ : મનોરંજનની દુનિયામાં અત્યારે એક સવાલ સૌથી વધુ ચર્ચાઈ રહ્યો છે – શું સાઉથનો રાઉડી હીરો ધનુષ અને સુંદર અભિનેત્રી મૃણાલ ઠાકુર લગ્નના બંધનમાં બંધાવા જઈ રહ્યા છે? સોશિયલ મીડિયાથી લઈને ફિલ્મ ગલીઓ સુધી એવી જોરદાર અફવા છે કે આ કપલ આ વર્ષે વેલેન્ટાઇન ડે (૧૪ ફેબ્રુઆરી) ના રોજ એક ખાનગી સમારોહમાં સાત ફેરા લઈ શકે છે. જોકે, હજુ સુધી આ બાબતે કોઈ સત્તાવાર પુષ્ટિ મળી નથી, પરંતુ ચાહકોમાં અત્યારથી જ ભારે ઉત્સાહ જોવા મળી રહ્યો છે.
ક્યાંથી શરૂ થઈ આ પ્રેમ કહાની?
ધનુષ અને મૃણાલ ઠાકુર વચ્ચે કંઈક રંધાઈ રહ્યું હોવાની ચર્ચાઓ ઓગસ્ટ ૨૦૨૫ માં શરૂ થઈ હતી, જ્યારે બંને મૃણાલની ફિલ્મ 'સન ઓફ સરદાર ૨' ના પ્રીમિયરમાં સાથે જોવા મળ્યા હતા. એટલું જ નહીં, ધનુષની ફિલ્મ 'તેરે ઈશ્ક મેં' ની પાર્ટીમાં પણ મૃણાલની હાજરીએ અનેક સવાલો ઉભા કર્યા હતા. સોશિયલ મીડિયા ડિટેક્ટિવ્સનું કહેવું છે કે મૃણાલ હવે ધનુષની બહેનો – ડૉ. કાર્તિકા અને વિમલા ગીતાને પણ ઇન્સ્ટાગ્રામ પર ફોલો કરી રહી છે, જે તેમના વધતા સંબંધોનો સંકેત હોઈ શકે છે.
મિત્રો કે જીવનસાથી?
તાજેતરના અહેવાલો મુજબ, ધનુષ અને મૃણાલ લાંબા સમયથી એકબીજાને ડેટ કરી રહ્યા છે. એક સૂત્રના જણાવ્યા અનુસાર, "તેઓ એકબીજાના વિચારો અને મૂલ્યોને લઈને ખૂબ જ સુસંગત છે અને તેમની વચ્ચે ગાઢ સંબંધ છે." જોકે, ગયા વર્ષે જ્યારે આ અફવાઓ ઉડી હતી ત્યારે મૃણાલે ધનુષને માત્ર એક 'સારો મિત્ર' ગણાવ્યો હતો. પરંતુ બોલિવૂડમાં 'ફ્રેન્ડશિપ' ઘણીવાર લગ્ન સુધી પહોંચતી જોવા મળી છે, તેથી ચાહકો કંઈક મોટા સમાચારની રાહ જોઈ રહ્યા છે.
ધનુષનો ભૂતકાળ
ઉલ્લેખનીય છે કે ધનુષે સુપરસ્ટાર રજનીકાંતની પુત્રી ઐશ્વર્યા રજનીકાંત સાથે ૧૮ વર્ષ લાંબા લગ્ન જીવન બાદ ૨૦૨૨ માં અલગ થવાની જાહેરાત કરી હતી. તેમને બે પુત્રો પણ છે. બીજી તરફ, મૃણાલ ઠાકુર અત્યારે પોતાની કરિયરના શિખર પર છે. હવે જોવાનું એ રહેશે કે ૧૪ ફેબ્રુઆરીએ આ બંને કલાકારો પોતાના સંબંધોને સત્તાવાર જાહેર કરે છે કે પછી આ માત્ર એક અફવા સાબિત થાય છે.