નવી દિલ્હી:સાઉથ સુપરસ્ટાર ધનુષ અને બોલિવૂડની સુંદર અભિનેત્રી મૃણાલ ઠાકુર વચ્ચેના અફેર અને લગ્નની અફવાઓએ હાલમાં મનોરંજન જગતમાં ભારે ખળભળાટ મચાવ્યો છે. સોશિયલ મીડિયા પર એવી ચર્ચાઓ જોર પકડ્યું છે કે આ જોડી આગામી ૧૪ ફેબ્રુઆરી ૨૦૨૬ના રોજ એટલે કે 'વેલેન્ટાઈન ડે' ના ખાસ અવસરે લગ્ન કરી શકે છે. જોકે, બંને કલાકારોએ હજુ સુધી આ બાબતે મૌન સેવ્યું છે, પરંતુ તેમના સોશિયલ મીડિયા એકાઉન્ટ્સ કંઈક અલગ જ વાર્તા કહી રહ્યા છે.
 તાજેતરમાં જ જાણવા મળ્યું છે કે મૃણાલ ઠાકુરે ધનુષની બહેનો ડો. કાર્તિકા અને વિમલા ગીતાને સોશિયલ મીડિયા પર ફોલો કરવાનું શરૂ કર્યું છે. આ બાબત ઈશારો કરે છે કે મૃણાલ હવે ધનુષના પરિવાર સાથે પણ નજીક આવી રહી છે. ધનુષની ફિલ્મ 'તેરે ઈશ્ક મેં' ની પાર્ટીમાં મૃણાલની હાજરીએ આ અફવાઓને વધુ વેગ આપ્યો હતો. સૂત્રોના જણાવ્યા અનુસાર, આ બંને કલાકારો એકબીજાની કંપનીમાં ખૂબ જ કમ્ફર્ટેબલ છે અને તેમના મિત્રો પણ આ જોડીથી ખૂબ ખુશ છે.
 જ્યારે ઓગસ્ટ ૨૦૨૫ માં મૃણાલને ધનુષ સાથેના સંબંધો વિશે પૂછવામાં આવ્યું હતું, ત્યારે તેણે ધનુષને માત્ર એક 'સારો મિત્ર' ગણાવ્યો હતો અને ડેટિંગની અફવાઓને 'મજેદાર' ગણાવી હતી. જોકે, ફેન્સનું માનવું છે કે સેલિબ્રિટીઝ અવારનવાર પોતાની પ્રાઈવસી જાળવવા માટે આવા નિવેદનો આપતા હોય છે. ધનુષે પણ તેની અંગત જિંદગી વિશે હંમેશા ચૂપકીદી સાધી છે, પરંતુ બંને વચ્ચેના ડિજિટલ પ્લેટફોર્મ પરના રોમેન્ટિક ઇમોજીસ અને કોમેન્ટ્સ કંઈક બીજું જ કહી રહ્યા છે.
 નોંધનીય છે કે ૨૦૨૨ માં ઐશ્વર્યા રજનીકાંતથી અલગ થયા પછી ધનુષે પોતાનું પૂરું ધ્યાન કરિયર અને તેના પુત્રો પર કેન્દ્રિત કર્યું હતું. હવે જ્યારે મૃણાલ ઠાકુર સાથે તેનું નામ જોડાઈ રહ્યું છે, ત્યારે ફેન્સ આ 'સુખદ સરપ્રાઈઝ' થી ખૂબ જ રોમાંચિત છે. મુંબઈમાં યોજાયેલા હાઈ-પ્રોફાઈલ ઈવેન્ટ્સમાં પણ આ જોડી ઘણીવાર સાથે જોવા મળી છે. હવે જોવાનું એ રહેશે કે ૧૪ ફેબ્રુઆરીએ આ અફવાઓ હકીકતમાં બદલાય છે કે નહીં!