મુંબઈ:  ભારતીય સિનેમાના દિગ્ગજ અને બિન્દાસ ડાયરેક્ટર રામ ગોપાલ વર્મા (RGV) એ રણવીર સિંહ સ્ટારર ફિલ્મ 'ધુરંધર'ની જંગી સફળતા બાદ તેની સિક્વલને લઈને એક મોટું નિવેદન આપ્યું છે. વર્માએ સોશિયલ મીડિયા પ્લેટફોર્મ 'X' પર દાવો કર્યો છે કે 'ધુરંધર 2' ઇતિહાસની સૌથી મોટી મલ્ટીસ્ટારર ફિલ્મ સાબિત થશે. તેમની આ દલીલ પાછળનું કારણ એ છે કે પહેલા ભાગમાં જે કલાકારોએ નાના કે મોટા રોલ ભજવ્યા હતા, તે ફિલ્મની બ્લોકબસ્ટર સફળતા બાદ હવે પ્રેક્ષકોની નજરમાં પોતે જ એક 'સુપરસ્ટાર' બની ગયા છે. આથી, જ્યારે આ તમામ દિગ્ગજો બીજા ભાગમાં એકસાથે આવશે, ત્યારે તે પડદા પર અત્યાર સુધીનો સૌથી મોટો સ્ટાર પાવર હશે.

ફિલ્મના ડાયરેક્ટર આદિત્ય ધરે હાલમાં જ 'ધુરંધર 2' ના ટ્રેલર કટ પર કામ શરૂ કરવાની જાહેરાત કરી છે, જેનાથી ચાહકોનો ઉત્સાહ બેગણો થઈ ગયો છે. ફિલ્મ સાથે જોડાયેલા સૂત્રોના જણાવ્યા અનુસાર, મેકર્સ આ વખતે ગુણવત્તા અને સ્કેલ સાથે કોઈ સમજૂતી કરવા માંગતા નથી. જોકે, અક્ષય ખન્નાના શૂટિંગ અંગે ચાલી રહેલી અફવાઓ પર નિર્માતાઓએ સ્પષ્ટતા કરી છે કે હજુ કશું ફાઈનલ નથી, પરંતુ જે પણ હશે તે પ્રેક્ષકો માટે એક મોટું સરપ્રાઈઝ હશે. રણવીર સિંહનો આક્રમક અંદાજ અને આદિત્ય ધરનું શાર્પ ડાયરેક્શન બીજા ભાગને વધુ રોમાંચક બનાવશે તે નક્કી છે.

બોક્સ ઓફિસ પર 'ધુરંધર' ના પહેલા ભાગે કમાણીના તમામ રેકોર્ડ તોડી નાખ્યા છે અને હવે સિક્વલ માટે જે પ્રકારનું વાતાવરણ ઊભું થયું છે, તે જોતા ટ્રેડ એનાલિસ્ટ્સ પણ માની રહ્યા છે કે આ ફિલ્મ બોલિવૂડના ઇતિહાસમાં માઈલસ્ટોન સાબિત થશે. રામ ગોપાલ વર્માની આ ભવિષ્યવાણીએ ફિલ્મના પ્રમોશનમાં જાણે ઘી હોમવાનું કામ કર્યું છે. હવે સિનેમા પ્રેમીઓ આતુરતાથી ટ્રેલરની રાહ જોઈ રહ્યા છે, જે ટૂંક સમયમાં રિલીઝ થવાની શક્યતા છે.