મુંબઈ: બોલિવૂડમાં અનુપમ ખેર અને અનિલ કપૂરની દોસ્તીના ઉદાહરણો આપવામાં આવે છે, પરંતુ શું તમે જાણો છો કે આ 'બેસ્ટ ફ્રેન્ડ' અનિલ કપૂરે જ અનુપમ ખેરને એક આઈકોનિક ફિલ્મમાંથી બહારનો રસ્તો દેખાડી દીધો હતો? તાજેતરમાં અનુપમ ખેરે એક વાયરલ વીડિયોમાં ખુલાસો કર્યો છે કે 'મિસ્ટર ઈન્ડિયા'માં મોગેમ્બોના પાત્ર માટે પહેલા તેમની પસંદગી થઈ હતી, પરંતુ અનિલ કપૂર અને નિર્માતા બોની કપૂરે તેમને કહ્યા વગર જ તેમની જગ્યાએ અમરીશ પુરીને કાસ્ટ કરી લીધા હતા.
ડેન્ટલ સર્જરી અને ‘કર્મા’ના સંવાદો
આ સમગ્ર કિસ્સો ત્યારે સામે આવ્યો જ્યારે અનુપમ ખેરના પુત્ર સિકંદર ખેરે સોશિયલ મીડિયા પર એક વીડિયો શેર કર્યો. આ વીડિયોમાં અનુપમ ખેર ડેન્ટલ સર્જરી કરાવીને આવ્યા હોવાથી તેમના ગાલ સુન્ન છે અને તેઓ બોલવામાં તકલીફ અનુભવી રહ્યા છે. સિકંદર જ્યારે તેમની મજાક ઉડાવે છે ત્યારે અનુપમ ખેર પોતાની ફિલ્મ 'કર્મા'નો આઈકોનિક ડાયલોગ બોલીને તેને ધમકાવે છે. આ રમુજી વાતચીત દરમિયાન જ ફિલ્મી દુનિયાના જૂના કિસ્સાઓ બહાર આવ્યા હતા.
"મને છેલ્લી ઘડી સુધી ખબર નહોતી"
અનુપમ ખેરે મજાકિયા અંદાજમાં ફરિયાદ કરતા કહ્યું કે, "જાવેદ સાહેબે નહીં, પણ મારા ખાસ મિત્ર અનિલ કપૂર અને બોની કપૂરે મને 'મિસ્ટર ઈન્ડિયા'માંથી બહાર ફેંકી દીધો હતો. નવાઈની વાત તો એ છે કે તેમણે મને છેલ્લી ઘડી સુધી આ વાતની જાણ પણ કરી નહોતી!" જોકે, ખેરે મોટા મનથી સ્વીકાર્યું હતું કે અમરીશ પુરીએ તે પાત્ર જે રીતે ભજવ્યું, તેવું તેઓ કદાચ ન ભજવી શક્યા હોત. આજે ‘મોગેમ્બો’નું પાત્ર અમરીશ પુરીની ઓળખ બની ગયું છે.
સિકંદર સાથેનો અતૂટ સંબંધ
વીડિયોમાં પિતા-પુત્ર વચ્ચેનો પ્રેમ અને નોક-ઝોક સ્પષ્ટ દેખાય છે. અનુપમ ખેર જ્યારે સિકંદરને આ વીડિયો પોસ્ટ ન કરવા વિનંતી કરે છે, ત્યારે સિકંદર મજાકમાં તેને શેર કરી દે છે. સિકંદર ખેર એ કિરણ ખેરના પહેલા લગ્નથી થયેલો પુત્ર છે, પરંતુ અનુપમ ખેરે તેને હંમેશા પ્રેમ આપ્યો છે અને બંને વચ્ચે મિત્ર જેવો સંબંધ છે.
આગામી પ્રોજેક્ટ્સ
વર્ક ફ્રન્ટની વાત કરીએ તો, અનુપમ ખેર ટૂંક સમયમાં 'ખોસલા કા ઘોસલા ૨' માં જોવા મળશે. આ ઉપરાંત તેમની દિગ્દર્શિત ફિલ્મ 'તન્વી ધ ગ્રેટ' પણ ચર્ચામાં છે. તો બીજી તરફ સિકંદર ખેર પણ પોતાની આગામી ફિલ્મોના શૂટિંગમાં વ્યસ્ત છે. બોલિવૂડની આ 'ઈનસાઈડ સ્ટોરી' એ સોશિયલ મીડિયા પર ચાહકોનું ભારે મનોરંજન કર્યું છે.