મુંબઈ:   બોલિવૂડના કિંગ ખાન એટલે કે શાહરૂખ ખાન માત્ર તેની ફિલ્મો માટે જ નહીં, પણ તેની બાદશાહી જીવનશૈલી માટે પણ હંમેશા ચર્ચામાં રહે છે. ૨૯ જાન્યુઆરીના રોજ જ્યારે શાહરૂખ મુંબઈ એરપોર્ટ પર દુબઈ જવા માટે રવાના થયો, ત્યારે કેમેરાની નજર તેની પીઠ પર લટકતી એક નાનકડી ઓરેન્જ કલરની બેગ પર સ્થિર થઈ ગઈ હતી. દેખાવમાં સામાન્ય લાગતી આ બેગની કિંમત જ્યારે સોશિયલ મીડિયા પર વાયરલ થઈ, ત્યારે ચાહકો ચોંકી ગયા હતા. આ બેગની કિંમત અંદાજે $૧૨,૮૦૦ એટલે કે ભારતીય રૂપિયામાં લગભગ ૧૧.૭૭ લાખ રૂપિયા છે. આટલા પૈસામાં તો મધ્યમ વર્ગનો પરિવાર મહિન્દ્રા થાર જેવી લક્ઝુરિયસ SUV પોતાના ઘરે લાવી શકે છે.

રસપ્રદ વાત એ છે કે આ ખાસ બેગ ફ્રેન્ચ લક્ઝરી બ્રાન્ડ 'હર્મેસ' (Hermès) ની હોવાનું કહેવાય છે. હર્મેસની ઓફિશિયલ વેબસાઈટ પર પણ આ ચોક્કસ કલરની બેગ જોવા મળતી નથી, જેનો અર્થ એ છે કે શાહરૂખ ખાને પોતાના માટે આ બેગ ખાસ કસ્ટમાઇઝ કરાવી હશે. વિશ્વના સૌથી ધનિક અભિનેતાઓમાં સ્થાન પામતા શાહરૂખ પાસે કરોડોની સંપત્તિ અને વૈભવી બંગલો 'મન્નત' છે, ત્યારે તેના માટે ૧૧ લાખની બેગ રાખવી એ કોઈ નવાઈની વાત નથી. તેની આ ફેશન સેન્સે ફરી એકવાર સાબિત કરી દીધું છે કે તે જે પણ કરે છે તે બિલકુલ 'કિંગ સાઈઝ' હોય છે.

શાહરૂખ ખાન છેલ્લા ૩૪ વર્ષથી બોલિવૂડ પર રાજ કરી રહ્યો છે અને તેની બ્રાન્ડ વેલ્યુ આજે પણ આસમાને છે. અહેવાલો મુજબ તેની કુલ સંપત્તિ અબજોમાં છે, છતાં તે પોતાના ચાહકો સાથે હંમેશા નમ્રતાથી પેશ આવે છે. હાલમાં કિંગ ખાનના ફેન્સ તેની આગામી મોટી ફિલ્મ "કિંગ" ની આતુરતાથી રાહ જોઈ રહ્યા છે, જે ૨૪ ડિસેમ્બર, ૨૦૨૬ ના રોજ ક્રિસમસના અવસરે સિનેમાઘરોમાં ધમાકો કરવા તૈયાર છે. ત્યાં સુધી તેની આવી મોંઘીદાટ એસેસરીઝ અને એરપોર્ટ લુક્સ સોશિયલ મીડિયા પર ચર્ચાનો વિષય બનતા રહેશે.