મુંબઈ:સિનેમાપ્રેમીઓ માટે શુક્રવાર એટલે નવી ફિલ્મનો ઉત્સવ. પરંતુ શું તમે ક્યારેય વિચાર્યું છે કે બોલિવૂડમાં ફિલ્મો રિલીઝ કરવા માટે શુક્રવાર જ કેમ પસંદ કરવામાં આવે છે? આ કોઈ સંયોગ નથી, પણ તેની પાછળ ઇતિહાસ, બિઝનેસ સ્ટ્રેટેજી અને ધાર્મિક માન્યતાઓનું અનોખું મિશ્રણ જોડાયેલું છે.
ભારતમાં શુક્રવારે ફિલ્મો રિલીઝ કરવાનો ટ્રેન્ડ ૧૯૬૦ના દાયકામાં શરૂ થયો હતો. ૫ ઓગસ્ટ, ૧૯૬૦ના રોજ રિલીઝ થયેલી મહાન ફિલ્મ ‘મુઘલ-એ-આઝમ’ શુક્રવારે જ પરદા પર આવી હતી અને બોક્સ ઓફિસ પર ઈતિહાસ રચી દીધો હતો. આ સફળતા બાદ ફિલ્મ નિર્માતાઓમાં શુક્રવાર પ્રત્યેનો વિશ્વાસ વધ્યો અને તે એક પરંપરા બની ગઈ.
 ફિલ્મ નિર્માતાઓના આ ‘સફળતા મંત્ર’ પાછળ નીચે મુજબના કારણો જવાબદાર છે:
શુક્રવાર એ સપ્તાહનો છેલ્લો કામકાજનો દિવસ છે. શનિવાર અને રવિવારની રજા હોવાથી લોકો પરિવાર સાથે મૂવી જોવાનું પ્લાનિંગ કરે છે, જે ફિલ્મના કલેક્શનમાં મોટો ઉછાળો લાવે છે.
 હિન્દુ ધર્મમાં શુક્રવારને મા લક્ષ્મીનો દિવસ માનવામાં આવે છે. નિર્માતાઓ માને છે કે આ દિવસે ફિલ્મ રિલીઝ કરવાથી ધન-સંપત્તિ અને સફળતા મળશે. આજે પણ ઘણા નિર્માતાઓ ફિલ્મનું મુહૂર્ત શૂટિંગ શુક્રવારે જ કરે છે.
 એક જમાનામાં મલ્ટિપ્લેક્સ કે સિનેમા હોલના માલિકોને ચૂકવવામાં આવતો સ્ક્રીનિંગ ચાર્જ અન્ય દિવસોની સરખામણીએ શુક્રવારે ઓછો રહેતો હતો, જે નિર્માતાઓ માટે આર્થિક રીતે ફાયદાકારક હતું.
૧૯૩૯માં હોલીવુડની સુપરહિટ ફિલ્મ ‘ગોન વિથ ધ વિન્ડ’ ૧૫ ડિસેમ્બરે શુક્રવારે રિલીઝ થઈ હતી, જેણે વૈશ્વિક સ્તરે આ ટ્રેન્ડની શરૂઆત કરી હતી.
રસપ્રદ વાત એ છે કે, જ્યારે બોલિવૂડ શુક્રવારને વળગી રહ્યું છે, ત્યારે દક્ષિણ ભારતીય ફિલ્મ ઉદ્યોગમાં ઘણી ફિલ્મો ગુરુવારે રિલીઝ થાય છે. જ્યોતિષ શાસ્ત્ર મુજબ ગુરુવાર ભગવાન વિષ્ણુનો દિવસ હોવાથી તેને શુભ કાર્યો માટે ઉત્તમ ગણવામાં આવે છે. જોકે, હવે મોટા સ્તરની પાન-ઈન્ડિયા ફિલ્મો માટે સાઉથના મેકર્સ પણ શુક્રવારનો રસ્તો અપનાવી રહ્યા છે.
આમ, શુક્રવાર એ માત્ર કેલેન્ડરનો એક દિવસ નથી, પણ બોલિવૂડ માટે કરોડો રૂપિયાના ટર્નઓવર અને સફળતાનું દ્વાર છે