હૈદરાબાદ : દક્ષિણ સિનેમાના સુપરસ્ટાર અને લાખો દિલોની ધડકન ચિરંજીવી જેટલી સફળતા ફિલ્મી પડદે ધરાવે છે, તેટલું જ સફળ તેમનું અંગત જીવન છે. આજે તેમની પત્ની સુરેખાના જન્મદિવસ નિમિત્તે મેગાસ્ટારે એક અત્યંત ભાવુક પોસ્ટ શેર કરીને ચાહકોનું દિલ જીતી લીધું છે. ચિરંજીવીએ સ્પષ્ટ શબ્દોમાં સ્વીકાર્યું છે કે તેમની સુપરસ્ટાર તરીકેની સફર સુરેખાના સાથ વગર અધૂરી હતી.
"મારી સફળતાનું રહસ્ય છે સુરેખા"
ચિરંજીવીએ ઇન્સ્ટાગ્રામ પર તેમના લગ્ન સમયના અને વર્તમાન સમયના ફોટા શેર કરીને એક સુંદર નોંધ લખી છે. તેમણે લખ્યું, "સુરેખાને જન્મદિવસની ખુબ ખુબ શુભેચ્છાઓ. તે માત્ર મારી પત્ની નથી, પરંતુ મારી શાંતિ અને શક્તિ છે. અમારા લગ્ન થયા ત્યારથી તે મારી પડખે અડીખમ ઊભી રહી છે. જો આજે હું આ મુકામ પર છું, તો તેનું એકમાત્ર કારણ સુરેખા છે, કારણ કે તેણે ઘરની દરેક જવાબદારી એટલી શાંતિથી સંભાળી કે હું મારા કામ પર ધ્યાન આપી શક્યો."
માતા-પિતાની લાડલી પુત્રી અને પરિવારનો આધારસ્તંભ
ચિરંજીવીએ વધુમાં ઉમેર્યું હતું કે, તેમના માતા-પિતાએ સુરેખાને ક્યારેય વહુ નથી માની, પણ હંમેશા પોતાની પુત્રી જેવો જ પ્રેમ આપ્યો છે. આખા પરિવારને એક તાંતણે બાંધી રાખવામાં સુરેખાનો મોટો ફાળો છે. આગામી દિવસોમાં આ કપલ તેમની લગ્નની વર્ષગાંઠ પણ ઉજવવાનું છે, તે પહેલા ચિરંજીવીએ આ હૃદયસ્પર્શી મેસેજ લખીને પોતાની કૃતજ્ઞતા વ્યક્ત કરી છે.
૧૯૮૦ થી શરૂ થયેલી અતૂટ સફર
ઉલ્લેખનીય છે કે, ચિરંજીવીએ પોતાની કારકિર્દીની શરૂઆતમાં જ ૧૯૮૦માં તેલુગુ હાસ્ય કલાકાર અલ્લુ રામલિંગૈયાની પુત્રી સુરેખા સાથે લગ્ન કર્યા હતા. આ દંપતીને ત્રણ સંતાનો છે - પુત્રીઓ સુષ્મિતા અને શ્રીજા, તથા પુત્ર રામ ચરણ. આજે રામ ચરણ પોતે પણ ગ્લોબલ સ્ટાર બની ચૂક્યા છે અને તાજેતરમાં જ તેમના ઘરે પારણું બંધાયું છે, જેનો આનંદ આખો પરિવાર માણી રહ્યો છે.
ચિરંજીવીની આ પોસ્ટ પર રામ ચરણની પત્ની ઉપાસના અને અન્ય પરિવારજનોએ પણ કોમેન્ટ્સ કરીને સુરેખા પ્રત્યે પોતાનો આદર વ્યક્ત કર્યો છે.