લોસ એન્જલસ:વિશ્વના સૌથી પ્રતિષ્ઠિત એવોર્ડ શો ગણાતા ઓસ્કાર (એકેડેમી એવોર્ડ્સ) ૨૦૨૬ની તૈયારીઓ પૂરજોશમાં ચાલી રહી છે, ત્યારે સિનેમાની સાથે સાથે રેડ કાર્પેટ પર જોવા મળતી ફેશન પણ ચર્ચાના કેન્દ્રમાં છે. ઓસ્કારના ઈતિહાસમાં સેલેબ્રિટીઝ હંમેશા પોતાની અનોખી સ્ટાઈલથી ચાહકોને પ્રભાવિત કરવાનો પ્રયાસ કરતા હોય છે, પરંતુ અનેકવાર આ પ્રયોગો ગંભીર ભૂલ સાબિત થયા છે. ઓસ્કારના ઈતિહાસમાં નોંધાયેલા કેટલાક સૌથી મોટા ફેશન બ્લન્ડર્સ (ફેશન ફો પા) આજે પણ ફેશન જગતમાં ટીકાનું પાત્ર બને છે.
આ યાદીમાં સૌથી મોખરે ગાયિકા અને અભિનેત્રી યોર્ક (Bjork) નું નામ આવે છે. ૨૦૦૧ના ઓસ્કારમાં તે 'હંસ' (Swan) આકારનો વિચિત્ર ડ્રેસ પહેરીને પહોંચી હતી, જેમાં ડ્રેસનું ગળું મરેલા હંસની ગરદન જેવું લાગતું હતું. આ ડ્રેસની આજે પણ સૌથી ખરાબ પોશાક તરીકે ગણના થાય છે. તેવી જ રીતે ૧૯૯૯માં સેલિન ડિયોને સફેદ રંગનો બેકવર્ડ (ઊંધો) પહેરેલો ટક્સીડો સૂટ પહેર્યો હતો, જેની તે સમયે ભારે મજાક ઉડી હતી. ફેશન નિષ્ણાતોના મતે, ગ્લેમરના આ સ્ટેજ પર જોખમ લેવું ક્યારેક ભારે પડી જાય છે.
૨૦૦૯માં યોજાયેલા ઓસ્કારમાં જાણીતી ગાયિકા બે્યોન્સ (Beyonce) ના પોશાકે પણ સોશિયલ મીડિયા પર હોબાળો મચાવ્યો હતો. તેણે પહેરેલો ગોલ્ડ અને બ્લેક ફિશટેલ ડ્રેસ પર્સનલ ગાર્ડન ટ્રેલિસ જેવો દેખાતો હતો, જે તેની અગાઉની આકર્ષક ફેશન સેન્સથી વિરુદ્ધ હતો. તેવી જ રીતે, ૨૦૧૫માં લેડી ગાગાએ સફેદ એઝેડાઇન અલાયા ગાઉન સાથે લાલ રંગના જે લેધર ગ્લોવ્ઝ (મોજા) પહેર્યા હતા, તેની સરખામણી નેટીઝન્સે ઘર સફાઈ માટેના રબરના મોજા સાથે કરી હતી. આ સિવાય, ૨૦૧૯માં બિલી પોર્ટરનો વેલ્વેટ ટક્સીડો ગાઉન પુરુષો અને સ્ત્રીઓના પોશાકનું અજીબ મિશ્રણ ગણાયું હતું.
હોલીવુડની જાણીતી અભિનેત્રી ઉમા થર્મન પણ આ યાદીમાંથી બાકાત નથી. ૨૦૦૪માં તેણે પહેરેલો 'સ્વિસ મિસ' જેવો દેખાતો ડ્રેસ ફેશન વિવેચકોને જરાય પસંદ પડ્યો નહોતો. ૨૦૦૨માં ગ્વિનેથ પાલ્ટ્રોએ પહેરેલો ટ્રાન્સપરન્ટ ટોપ અને હેવી મેકઅપવાળો ડ્રેસ બ્રિટિશ ડિઝાઈનર એલેક્ઝાન્ડર મેક્વીન દ્વારા તૈયાર કરાયો હતો, પરંતુ તે ફેશનના ધોરણોમાં નિષ્ફળ રહ્યો હતો. ૨૦૨૬ના ઓસ્કારમાં હવે કયા સિતારા આ ભૂલોમાંથી પાઠ શીખે છે અને કોણ નવા પ્રયોગો કરે છે, તે જોવું રસપ્રદ રહેશે. જોકે, ભૂતકાળની આ ભૂલો એ સાબિત કરે છે કે ઓસ્કારના મંચ પર 'ખરાબ ફેશન' ક્યારેય ભૂલાતી નથી.