મુંબઈ, તા.૨૫: ભારતીય સિનેમાના પડદે અત્યારે માત્ર એક જ નામ ગુંજી રહ્યું છે - 'ધૂરંધર 2'. સુપરસ્ટાર રણવીર સિંહની આ મોસ્ટ અવેટેડ ફિલ્મે બોક્સ ઓફિસ પર એવી સુનામી લાવી છે કે મોટા-મોટા દિગ્ગજોના રેકોર્ડ પત્તાની જેમ વિખેરાઈ ગયા છે. આ ફિલ્મે માત્ર સાત જ દિવસમાં વર્લ્ડવાઈડ કલેક્શનમાં 1000 કરોડ રૂપિયાની ઐતિહાસિક સપાટીને સ્પર્શીને સૌને ચોંકાવી દીધા છે. રણબીર કપૂરની 'એનિમલ' જેવી બ્લોકબસ્ટર ફિલ્મોના કલેક્શનને પણ આ ફિલ્મે પાછળ છોડી દીધું છે.
પહેલા જ દિવસથી કમાણીનો કરિશ્મો
ફિલ્મની શરૂઆત જ ધમાકેદાર રહી હતી. પહેલા દિવસે 102.55 કરોડની ઓપનિંગ સાથે રણવીર સિંહે પોતાની ધાક જમાવી દીધી હતી. બીજા દિવસે 80.72 કરોડ અને ત્રીજા દિવસે 113 કરોડની કમાણી સાથે ફિલ્મે રફ્તાર પકડી હતી. વીકેન્ડના અંતે એટલે કે પહેલા રવિવારે આ આંકડો 114.85 કરોડ સુધી પહોંચ્યો હતો, જે દર્શાવે છે કે પ્રેક્ષકોમાં આ ફિલ્મ માટે કેવી દીવાનગી છે.
મંગળવારે પણ થઈ ધનવર્ષા
સામાન્ય રીતે અઠવાડિયાના મધ્યમાં ફિલ્મોની કમાણી ઘટતી હોય છે, પરંતુ 'ધૂરંધર 2' માટે તો જાણે મંગળવાર પણ રવિવાર સમાન સાબિત થયો. પાંચમા દિવસે 65 કરોડ અને છઠ્ઠા દિવસે 56.55 કરોડના કલેક્શન સાથે ભારતીય બોક્સ ઓફિસ પર ફિલ્મની કુલ કમાણી 575.67 કરોડ રૂપિયાને વટાવી ગઈ છે. ફિલ્મના મેકર્સ માટે આ ફિલ્મ સોનાની લગડી સાબિત થઈ રહી છે.
રેકોર્ડબ્રેક સાતમો દિવસ
આજે સાતમા દિવસે ફિલ્મે જે રીતે પ્રદર્શન કર્યું છે તેને ટ્રેડ એનાલિસ્ટ્સ 'ઘાતક' ગણાવી રહ્યા છે. વિદેશી માર્કેટમાં પણ રણવીર સિંહનો ક્રેઝ માથા પર ચઢીને બોલી રહ્યો છે, જેને કારણે માત્ર એક અઠવાડિયામાં ફિલ્મ 1000 કરોડના ક્લબમાં સામેલ થઈ ગઈ છે. સોશિયલ મીડિયા પર ફેન્સ આ ફિલ્મને રણવીર સિંહની કારકિર્દીની સર્વશ્રેષ્ઠ ફિલ્મ ગણાવી રહ્યા છે.
હવે જોવાનું એ રહેશે કે 'ધૂરંધર 2' આવનારા દિવસોમાં બોલીવુડના અન્ય કયા કયા મોટા રેકોર્ડ્સ તોડે છે અને કમાણીનો નવો આંકડો ક્યાં જઈને અટકે છે.