હૈદરાબાદ : તેલુગુ ફિલ્મ ઇન્ડસ્ટ્રીના ગ્લેમરસ અક્કીનેની પરિવારના યુવા સુપરસ્ટાર અખિલ અક્કીનેનીની નવી ફિલ્મ 'લેનિન' (Lenin) બોક્સ ઓફિસ પર સુનામી લાવી રહી છે. વર્ષ ૨૦૨૩માં આવેલી જાસૂસી થ્રિલર ફિલ્મ 'એજન્ટ'ની કારમી નિષ્ફળતા અને લાંબા વિરામ બાદ અખિલે કરેલા આ શાનદાર કમબેકે સમગ્ર સાઉથ સિનેમાને ચોંકાવી દીધું છે. આ ફિલ્મની ભવ્ય સફળતા વચ્ચે, હંમેશા પોતાના વિવાદાસ્પદ અને બેબાક નિવેદનો માટે જાણીતા દિગ્ગજ ડાયરેક્ટર રામ ગોપાલ વર્મા (RGV)એ સોશિયલ મીડિયા પર અખિલના મુક્તકંઠે વખાણ કરીને સિનેમા જગતમાં એક નવો ગરમાવો લાવી દીધો છે.
નાગાર્જુનની હાજરીમાં પુત્રને ગણાવ્યો શ્રેષ્ઠ એક્ટર
સોશિયલ મીડિયા પ્લેટફોર્મ X (અગાઉ ટ્વિટર) પર પોતાની આગવી શૈલીમાં પોસ્ટ લખતા રામ ગોપાલ વર્માએ અખિલની એક્ટિંગ કુશળતા પર આફરીન પોકારી દીધું છે. તેમણે લખ્યું કે, "હે અખિલ, મેં હમણાં જ 'લેનિન' જોઈ. ફિલ્મ અદ્ભુત છે જ, પણ સાથે મને એ પણ સમજાયું કે તું આખા અક્કીનેની પરિવારનો સૌથી શ્રેષ્ઠ અભિનેતા છે. હું તેના સુપરસ્ટાર પિતા નાગાર્જુનને સાક્ષી માનીને (તેમની સામે) આ વાત કહી રહ્યો છું. જે દ્રશ્યોમાં કોઈ લાગણી નહોતી ત્યાં પણ તારી સહજતા અદભુત હતી અને ઈમોશનલ સીન્સમાં તો તેં કમાલ કરી દીધી છે." RGVએ આ શાનદાર પાત્ર ઘડવા બદલ ફિલ્મના ડિરેક્ટર મુરલી કિશોર અબ્બુરુના પણ વખાણ કર્યા છે.
૨ દિવસમાં 'એજન્ટ'ના લાઈફટાઈમ રેકોર્ડ ધ્વસ્ત: ૧૦૦ કરોડ તરફ આગેકૂચ
૧૦ જુલાઈએ સિનેમાઘરોમાં રિલીઝ થયેલી 'લેનિન' ફિલ્મે બોક્સ ઓફિસ પર કમાણીના તમામ જૂના રેકોર્ડ તોડી નાખ્યા છે. માત્ર બે દિવસથી પણ ઓછા સમયમાં આ ફિલ્મે અખિલની અગાઉની ફિલ્મ 'એજન્ટ'ની કુલ લાઈફટાઈમ કમાણીના આંકડાને પાર કરી લીધો છે. અત્યાર સુધીમાં આ એક્શન ડ્રામા ફિલ્મે વિશ્વભરમાંથી રૂ. ૬૧ કરોડથી વધુનું શાનદાર કલેક્શન કરી લીધું છે અને ખૂબ જ ઝડપથી ૧૦૦ કરોડના ક્લબમાં સામેલ થવા તરફ આગળ વધી રહી છે. ફિલ્મના નિર્માતા નાગા વંશીએ પણ ચાહકોનો આભાર માનતા સોશિયલ મીડિયા પર ખુશી વ્યક્ત કરી છે કે મનમ એન્ટરટેઈનમેન્ટ્સ અને સીતારા એન્ટરટેઈનમેન્ટ્સનું અખિલ સાથે બ્લોકબસ્ટર આપવાનું સપનું પૂરું થયું છે.
મહાભારતથી પ્રેરિત ગ્રામીણ એક્શન ડ્રામા
મુરલી કિશોર અબ્બુરુ દ્વારા નિર્દેશિત આ ફિલ્મમાં અખિલ અક્કીનેની સાથે મુખ્ય અભિનેત્રી તરીકે ભાગ્યશ્રી બોરસે જોવા મળી રહી છે. ફિલ્મની વાર્તા શ્રીરામપુરમ નામના ગામની આસપાસ વણાયેલી છે, જ્યાં 'લેનિન' નામનો એક અનાથ યુવક સ્થાનિક તહેવાર દરમિયાન ફાટી નીકળેલી હિંસા, વિશ્વાસઘાત અને બદલાની લડાઈ લડે છે. આ લડાઈને મહાભારતના યુદ્ધના તર્જ પર ખૂબ જ ભવ્ય અને લોહિયાળ અંદાજમાં સ્ક્રીન પર ઉતારવામાં આવી છે. વર્ષ ૨૦૧૫માં ડેબ્યૂ ફિલ્મ ફ્લોપ થયા બાદ સંઘર્ષ કરી રહેલા અખિલ માટે 'લેનિન' તેની કારકિર્દીનો ટર્નિંગ પોઇન્ટ સાબિત થઈ રહી છે.