મુંબઈ: તા.૧૮: ટેલિવિઝન દુનિયામાં દર અઠવાડિયે કયો શો દર્શકોના દિલ પર રાજ કરી રહ્યો છે તેની કસોટી થતી હોય છે. બ્રોડકાસ્ટ ઓડિયન્સ રિસર્ચ કાઉન્સિલ (BARC) ઇન્ડિયા દ્વારા વર્ષ ૨૦૨૬ ના ૨૩મા અઠવાડિયાનો ઓફિશિયલ ટીઆરપી (TRP) રિપોર્ટ જાહેર કરી દેવામાં આવ્યો છે. આ અઠવાડિયાના રેટિંગ્સમાં ભારે ઉલટફેર જોવા મળ્યો છે. કેટલાક જૂના સુપરહિટ શો પાછળ ધકેલાયા છે, તો કિંગમેકર એકતા કપૂરના શોઝે સોશિયલ મીડિયાથી લઈને ટીઆરપી ચાર્ટ સુધી ભારે ધૂમ મચાવી છે.

ટોપ પર ‘ગંગા માઈ’ અને ‘વસુધા’નો જાદુ કાયમ

આ અઠવાડિયે પણ ‘ગંગા માઈ કી બેટિયાં’ શોએ પોતાની આકર્ષક અને ઈમોશનલ વાર્તાના જોરે નંબર-૧ નું સ્થાન જાળવી રાખ્યું છે. દર્શકો આ શોને ભરપૂર પ્રેમ આપી રહ્યા છે. જ્યારે બીજા સ્થાને ‘વસુધા’ શોએ પોતાનું મજબૂત પ્રદર્શન ચાલુ રાખ્યું છે. ત્રીજા નંબર પર રોમેન્ટિક ડ્રામા ‘તુમ સે તુમ તક’ એ પોતાની પકડ મજબૂત રાખી છે.

‘નાગિન 7’ નો ફિનાલે ધમાકો, ‘ક્યુંકી ૨’ ને લાગ્યો મોટો ઝટકો!

આ અઠવાડિયાની સૌથી મોટી સરપ્રાઈઝ ‘નાગિન 7’ એ આપી છે. આ સુપરનેચરલ શોનો અંતિમ એપિસોડ તાજેતરમાં જ પ્રસારિત થયો હતો, જેના કારણે સોશિયલ મીડિયા પર ફેન્સ વચ્ચે ભારે ચર્ચા જાગી હતી. આ ફિનાલે ક્રેઝનો ફાયદો શોને મળ્યો અને રેટિંગ્સમાં જબરદસ્ત ઉછાળા સાથે ‘નાગિન 7’ ચોથા સ્થાને પહોંચી ગયો છે. બીજી તરફ, સતત ટોપ પર રાજ કરતો શો ‘ક્યુંકી સાસ ભી કભી બહુ થી ૨’ સીધો પાંચમા સ્થાને સરકી ગયો છે. ચર્ચા છે કે શોની વર્તમાન સ્ટોરીલાઇનમાંથી ફેવરિટ એક્ટર અમર ઉપાધ્યાયની ગેરહાજરીના કારણે દર્શકો નારાજ થયા છે અને રેટિંગ્સ ઘટ્યા છે.

અનુપમા છઠ્ઠા સ્થાને, ‘ઉડને કી આશા’ ટોપ-૧૦ માંથી આઉટ

ક્યારેક ટીઆરપી ચાર્ટ પર રાજ કરનારો શો ‘અનુપમા’ આ અઠવાડિયે માંડ છઠ્ઠા સ્થાને સ્થિર થઈ શક્યો છે. જ્યારે કોમેડી અને કુકિંગ રિયાલિટી શો ‘લાફ્ટર શેફ્સ ૩’ સાતમા સ્થાને અને ‘જગધાત્રી’ આઠમા સ્થાને રહ્યા છે. સદાબહાર શો ‘યે રિશ્તા ક્યા કહેલાતા હૈ’ નવમા સ્થાને પોતાનો ગઢ બચાવવામાં સફળ રહ્યો છે. જોકે, સૌથી મોટો આંચકો ‘ઉડને કી આશા’ શોને લાગ્યો છે, જે આ વખતે લિસ્ટમાંથી ધબડકા સાથે બહાર થઈ ગયો છે અને દસમા સ્થાને પહોંચી ગયો છે.

અઠવાડિયું ૨૩: ઓફિશિયલ TRP રેન્કિંગ લિસ્ટ:

૧. ગંગા માઈ કી બેટિયાં

૨. વસુધા

૩. તુમ સે તુમ તક

૪. નાગિન ૭

૫. ક્યૂંકી સાસ ભી કભી બહુ થી ૨

૬. અનુપમા

૭. લાફ્ટર શેફ ૩

૮. જગધાત્રી

૯. યે રિશ્તા ક્યા કહેલાતા હૈ

૧૦. ઉડને કી આશા

પ્રિયંકા ચહર ચૌધરી બની ટીવીની ‘ક્વીન’, સોશિયલ મીડિયા પર દબદબો

જો આ અઠવાડિયાના સૌથી લોકપ્રિય અને ચર્ચિત કલાકારો (Actors) ની વાત કરીએ તો, ‘નાગિન ૭’ ની લીડ એક્ટ્રેસ પ્રિયંકા ચહર ચૌધરી ઇન્ટરનેટ પર સૌથી મોટી બઝ-મેકર તરીકે ઉભરી આવી છે. વીકલી બઝ રિપોર્ટમાં તે ટોચના સ્થાને છે. ફેન્સ તેના લુક અને એક્ટિંગના દિવાના બન્યા છે. આ લિસ્ટમાં હેન્ડસમ હંક પાર્થ સમથાન બીજા સ્થાને છે, જ્યારે ‘યે રિશ્તા...’ ની સ્ટાર સમૃદ્ધિ શુક્લા ત્રીજા સ્થાને છે. આ સિવાય ટીવીની લોકપ્રિય વહુ સૃતિ ઝા ચોથા સ્થાને અને નામિક પૌલ પાંચમા સ્થાને પોતાનું સ્થાન બનાવવામાં સફળ રહ્યા છે.