​મુંબઈ: બોલિવૂડના ઉર્જાવાન અને પ્રતિભાશાળી અભિનેતા રણવીર સિંહ આજે પોતાના જીવનના ૪૧મા વર્ષમાં પ્રવેશ કર્યો છે. આ ખાસ અવસર પર તેમને સોશિયલ મીડિયા પર ચાહકો અને સેલેબ્સ તરફથી શુભેચ્છાઓનો ધોધ મળી રહ્યો છે, પરંતુ આ તમામની વચ્ચે 'ધુધરંધર' ફિલ્મની સફળ જોડી રણવીર સિંહ અને દિગ્દર્શક આદિત્ય ધરના સંબંધો વધુ એકવાર ચર્ચામાં આવ્યા છે. આદિત્ય ધરે રણવીરના જન્મદિવસને ખાસ બનાવવા માટે તેમની સાથેની ફિલ્મના સેટ પરની અગાઉ ક્યારેય ન જોયેલી તસવીરો શેર કરી એક અત્યંત ભાવુક સંદેશ લખ્યો છે.

​આદિત્ય ધરે તેમના સોશિયલ મીડિયા એકાઉન્ટ પર રણવીર સાથેની એક હૃદયસ્પર્શી પોસ્ટ મૂકી છે. જેમાં તેમણે લખ્યું છે કે, "કેટલીક ફિલ્મો તમારી સાથે હંમેશા રહે છે અને 'ધુધરંધર' મારા માટે એવી જ એક ફિલ્મ રહેશે. આ માત્ર અમે કહેલી વાર્તા માટે નથી, પરંતુ એ અનુભવ માટે છે જે મને આ ફિલ્મ દરમિયાન મળ્યો છે." આદિત્ય ધરે રણવીરની અભિનય ક્ષમતાના ખૂબ જ વખાણ કરતા કહ્યું કે, "હું હંમેશા જાણતો હતો કે રણવીર એક અસાધારણ અભિનેતા છે, પરંતુ આ મુસાફરીએ મને તે કલાકાર અને તે વ્યક્તિ સાથે પ્રેમમાં પાડી દીધો જે આ કલાકારની પાછળ રહેલો છે."

​આદિત્ય ધરે રણવીરના અભિનયને 'કુદરતી શક્તિ' (Force of Nature) ગણાવતા ઉમેર્યું કે, "તેમનું કામ જોતી વખતે એવું લાગે છે કે જાણે કોઈ દૈવી શક્તિનો સ્પર્શ હોય. જાણે માતા સરસ્વતીએ પોતે તેમના માથા પર હાથ મૂકીને કલાત્મક તેજસ્વિતાનો આશીર્વાદ આપ્યો હોય. એક દિગ્દર્શક તરીકે હું માનું છું કે, 'ધુધરંધર'માં રણવીરે આપેલું પ્રદર્શન ભારતીય સિનેમાના ઇતિહાસમાં સૌથી શ્રેષ્ઠ પ્રદર્શનોમાંનું એક છે. તે નિર્ભય, ગગનચુંબી અને એટલું પૂર્ણ છે કે તે પાત્રની આત્મામાં સંપૂર્ણપણે ઓગળી જાય છે."

​પોસ્ટના અંતે આદિત્ય ધરે ફિલ્મના સેટ પરના તેમના ગાઢ સંબંધોનો ઉલ્લેખ કર્યો હતો. તેમણે લખ્યું, "શૂટિંગ દરમિયાન તમે માત્ર મારા અભિનેતા મટીને મારા ભાઈ બની ગયા. તમારા હૃદય, તમારી કલા અને તમારા ગાંડપણ પર વિશ્વાસ રાખવા બદલ આભાર. તે તમામ ક્ષણો બદલ આભાર જે 'એક્શન' અને 'કટ' વચ્ચે વિતાવ્યા છે. આજના દિવસે તમને જન્મદિવસની ઘણી ઘણી શુભેચ્છાઓ, મારા ભાઈ!" રણવીર સિંહના આ ખાસ દિવસે દિગ્દર્શક આદિત્ય ધર દ્વારા વ્યક્ત કરવામાં આવેલી આ લાગણીઓ દર્શાવે છે કે બંને વચ્ચે માત્ર પ્રોફેશનલ જ નહીં, પરંતુ વ્યક્તિગત સ્તરે પણ અતૂટ બંધન બંધાયું છે.