મુંબઈ: બોલીવુડ અભિનેત્રી રવિના ટંડનની માતાના ઘરેથી આશરે રૂપિયા 25 લાખના દાગીના અને મોંઘી ઘડિયાળોની ચોરીના કેસમાં મુંબઈ પોલીસે એક મહિલાની ધરપકડ કરી છે. પોલીસનો દાવો છે કે આરોપી મહિલા ઘણા વર્ષોથી પરિવાર સાથે સંપર્કમાં હતી અને ગુનો કરતા પહેલા ધીમે ધીમે તેમનો વિશ્વાસ મેળવ્યો હતો. મુંબઈ પોલીસના જણાવ્યા અનુસાર, ધરપકડ કરાયેલી મહિલાની ઓળખ રાશિ છાબરિયા તરીકે થઈ છે, જે 47 વર્ષની છે. પોલીસ તપાસમાં જાણવા મળ્યું છે કે રાશિ 2020 થી ટંડન પરિવાર સાથે સંપર્કમાં હતી. તે અભિનેત્રીની માતા વીણા ટંડનની સંભાળ રાખવા માટે વારંવાર ઘરે જતી હતી અને પરિવારની વિશ્વસનીય સભ્ય બની ગઈ હતી. તે રસોઈથી લઈને વીણા ટંડનની સંભાળ રાખવા સુધીના વિવિધ કાર્યો કરતી હતી. પોલીસ અધિકારીઓનું કહેવું છે કે સમય જતાં, આરોપી મહિલાએ પરિવારનો વિશ્વાસ મેળવ્યો. આ વિશ્વાસનો લાભ લઈને, તેણે કથિત રીતે ઘરની કિંમતી વસ્તુઓ પર નજર રાખી અને તક મળતાં જ ઘરેણાંની સાથે બે મોંઘી ઘડિયાળો પણ ચોરી લીધી. પરિવારે લોકર તપાસ્યું ત્યારે ઘરેણાં અને ઘડિયાળો ગાયબ હોવાનું માલુમ પડ્યું. ત્યારબાદ, ઘરે આવતા-જતા લોકો વિશે માહિતી એકત્રિત કરવામાં આવી, અને રાશિ છાબરિયાની પણ પૂછપરછ કરવામાં આવી. જોકે, શરૂઆતની પૂછપરછ દરમિયાન, તેણીએ ચોરીમાં કોઈ સંડોવણીનો સ્પષ્ટ ઇનકાર કર્યો. જોકે, જ્યારે તેણીની ફરીથી પૂછપરછ કરવામાં આવી, ત્યારે તેણીએ ચોરાયેલી મોંઘી ઘડિયાળો પરત કરી અને એમ પણ કહ્યું કે તેણીએ બાકીના ઘરેણાં જગદીશ નામના વ્યક્તિને આપ્યા છે અને તે ટૂંક સમયમાં પરત કરશે.