News of Sunday, 22nd November 2026
ગોવાના આંતરરાષ્ટ્રીય ફિલ્મ મહોત્સવમાં 'રામાયણ'નો ભવ્ય દબદબો : બ્રિક્સ દેશોના ફિલ્મ વિભાગનો હાઉસફુલ પ્રારંભ
નિતેશ તિવારીની ભવ્ય ફિલ્મને વિશેષ સ્થાન : ૧૧ સભ્ય દેશો અને ભાગીદાર રાષ્ટ્રોની ૨૧ ફિલ્મોનું પ્રદર્શન : વિશ્વભરના ફિલ્મકારો વચ્ચે ભારતીય સિનેમાનું આકર્ષણ

પણજી : ગોવામાં ચાલી રહેલા ૫૭મા ભારતીય આંતરરાષ્ટ્રીય ફિલ્મ મહોત્સવમાં દિગ્દર્શક નિતેશ તિવારીની મહત્વાકાંક્ષી ફિલ્મ 'રામાયણ : રાઇઝ ઓફ અ લેજન્ડ'ના પ્રથમ ભાગને વિશેષ સન્માન મળ્યું છે. બ્રિક્સ દેશોની ફિલ્મોના ખાસ વિભાગનો પ્રારંભ આ ફિલ્મના પ્રદર્શનથી કરવામાં આવ્યો હતો. ફિલ્મનું પ્રદર્શન દર્શકોથી ખીચોખીચ ભરાયેલા પ્રેક્ષાગૃહમાં યોજાયું હતું.
૨૦થી ૨૮ નવેમ્બર દરમિયાન યોજાઈ રહેલા આ મહોત્સવમાં વિશ્વના ૮૬ દેશોની ૧૫૦થી વધુ આંતરરાષ્ટ્રીય ફિલ્મોનો સમાવેશ કરવામાં આવ્યો છે. બ્રિક્સ વિભાગમાં સભ્ય તથા ભાગીદાર દેશોની કુલ ૨૧ ફિલ્મો રજૂ કરવામાં આવી રહી છે.
'રામાયણ'માં રણબીર કપૂરે ભગવાન શ્રીરામ, સાઈ પલ્લવીએ માતા સીતા અને યશે રાવણની ભૂમિકા ભજવી છે. ફિલ્મનો પ્રથમ ભાગ રામના જીવનપ્રસંગો, વનવાસ, સીતાહરણ અને ધર્મ તથા અધર્મ વચ્ચેના સંઘર્ષને આવરી લે છે.
મહોત્સવમાં હાજર રહેલા દિગ્દર્શક નિતેશ તિવારીએ જણાવ્યું કે આવા આંતરરાષ્ટ્રીય ફિલ્મ મહોત્સવો નવા કલાકારો, લેખકો અને દિગ્દર્શકોને પ્રોત્સાહન આપવા માટે અત્યંત મહત્વપૂર્ણ છે.
મહોત્સવના નિર્દેશક આશુતોષ ગોવારીકરે પણ બ્રિક્સ વિભાગના પ્રારંભ માટે 'રામાયણ'ની પસંદગીને ગૌરવપૂર્ણ ગણાવી હતી.
આ ફિલ્મનો બીજો ભાગ દિવાળી ૨૦૨૮ દરમિયાન રજૂ કરવાનું આયોજન છે. ભારતીય પૌરાણિક કથાને આંતરરાષ્ટ્રીય સ્તરે રજૂ કરતી આ ફિલ્મનું વિશેષ પ્રદર્શન ભારતીય ફિલ્મજગત માટે મહત્વપૂર્ણ ઘટના બની છે.
(6:09 PM IST)









છેલ્લા 8 દિવસમાં સૌથી લોકપ્રિય 
