હૈદરાબાદ:સાઉથની સ્ટાર અભિનેત્રી સામન્થા રૂથ પ્રભુની લેટેસ્ટ ફિલ્મ 'મા ઇન્તી બંગારામ' બોક્સ ઓફિસ પર ધૂમ મચાવી રહી છે. પ્રથમ દિવસે રૂ. 5.35 કરોડની મજબૂત શરૂઆત બાદ, આ ફિલ્મે બીજા દિવસે પણ પોતાની ગતિ જાળવી રાખી છે. પ્રારંભિક અંદાજો મુજબ, શનિવારે ફિલ્મ રૂ. 6 થી 8 કરોડ સુધીની કમાણી કરી શકે છે, જેનાથી બે દિવસનું કુલ કલેક્શન રૂ. 12 થી 14 કરોડની આસપાસ પહોંચવાની ધારણા છે.

નાના પ્રોડક્શનની મોટી સફળતા

અંદાજે રૂ. 25-30 કરોડના બજેટમાં બનેલી આ ફિલ્મે રિલીઝ પહેલા જ થિયેટર અને અન્ય અધિકારો દ્વારા રૂ. 35 કરોડની કમાણી કરીને પોતાની પ્રોફિટેબિલિટી સાબિત કરી દીધી છે. ફિલ્મની સફળતા પર ખુશી વ્યક્ત કરતા સામન્થાએ સોશિયલ મીડિયા પર પોતાની લાગણી ઠાલવતા કહ્યું કે, એક નાના પ્રોડક્શન હાઉસ માટે આ સિદ્ધિ ગર્વ લેવા જેવી છે. ખાસ કરીને મહિલા દર્શકોની મોટી સંખ્યામાં હાજરી જોઈને સામન્થા ગદ્ગદ થઈ ગઈ હતી. તેમણે ટ્વીટમાં જણાવ્યું કે, "લાંબા સમયથી કહેવાતું હતું કે થિયેટરની શરૂઆત પુરુષ પ્રેક્ષકોથી થાય છે, પરંતુ આ ફિલ્મમાં મહિલાઓનું મોટું યોગદાન જોઈને સિનેમાનો વિકાસ સ્પષ્ટ દેખાઈ રહ્યો છે."

શું સામન્થા ગર્ભવતી છે? વાયરલ વીડિયોએ જગાવી ચર્ચાઓ

ફિલ્મની સફળતાની ઉજવણીની સાથે સાથે સામન્થાના વ્યક્તિગત જીવન અંગે પણ સોશિયલ મીડિયા પર અટકળોનો દોર શરૂ થયો છે. અભિનેત્રીનો એક તાજેતરનો વીડિયો ઈન્ટરનેટ પર ખૂબ વાયરલ થઈ રહ્યો છે, જેમાં કેટલાક નેટીઝન્સે તેના 'બેબી બમ્પ' વિશે ચર્ચાઓ શરૂ કરી છે. લોકો સોશિયલ મીડિયા પર અટકળો લગાવી રહ્યા છે કે શું સામન્થા અને ફિલ્મ નિર્માતા રાજ નિદિમોરુ તેમના પ્રથમ સંતાનની રાહ જોઈ રહ્યા છે? જોકે, આ અંગે અભિનેત્રી કે તેમના પરિવાર તરફથી કોઈ સત્તાવાર પુષ્ટિ કરવામાં આવી નથી.