મુંબઈ: ભારતીય સિનેમામાં એરિયલ એક્શનનો નવો ટ્રેન્ડ સેટ કરનાર ફિલ્મ 'ફાઇટર'ની સીક્વલને લઈને અત્યારે માયાનગરીમાં ચર્ચાઓએ જોર પકડ્યું છે. વર્ષ ૨૦૨૪માં રિલીઝ થયેલી હૃતિક રોશન અને દીપિકા પાદુકોણની આ ફિલ્મે ભલે બોક્સ ઓફિસ પર સરેરાશ દેખાવ કર્યો હોય, પરંતુ તેની ભવ્યતા અને એક્શન સીન્સને દર્શકોએ ખૂબ બિરદાવ્યા હતા. હવે લેટેસ્ટ અહેવાલો મુજબ, ડિરેક્ટર સિદ્ધાર્થ આનંદ ફરી એકવાર આ એક્શન પેક્ડ ફ્રેન્ચાઈઝીને આગળ ધપાવવા માટે સજ્જ થયા છે. સોશિયલ મીડિયા પર વાયરલ થયેલા દાવા મુજબ 'ફાઇટર 2' માટેની પૂર્વતૈયારીઓ શરૂ થઈ ગઈ છે અને આ વખતે બજેટનો આંકડો ૫૦૦ કરોડ રૂપિયાને પાર કરી શકે છે.

ફિલ્મની સીક્વલ બનવાની અટકળોને ત્યારે વધુ બળ મળ્યું જ્યારે ખુદ ડિરેક્ટર સિદ્ધાર્થ આનંદે એક ફેન પેજની પોસ્ટ પર નજરનો ટીકો (Evil Eye) દર્શાવતી ઇમોજી કમેન્ટ કરી. આ નાનકડી કમેન્ટ બાદ હૃતિક અને દીપિકાના ચાહકોમાં ખુશીની લહેર દોડી ગઈ છે. સૂત્રોના જણાવ્યા અનુસાર, ફિલ્મનું પ્રોડક્શન સપ્ટેમ્બર મહિનાથી શરૂ થવાની શક્યતા છે. પ્રથમ ભાગમાં હૃતિક-દીપિકાની કેમિસ્ટ્રી અને એરફોર્સના પાયલટ તરીકેના તેમના પાત્રોએ ઘણી લોકપ્રિયતા મેળવી હતી, ત્યારે સીક્વલમાં તેમને ફરીથી એરફોર્સના ડ્રેસમાં આકાશમાં કરતબ કરતા જોવા એ ચાહકો માટે કોઈ મોટી ભેટથી ઓછું નહીં હોય.

જોકે, હજુ સુધી મેકર્સ કે સ્ટારકાસ્ટ તરફથી આ પ્રોજેક્ટની કોઈ સત્તાવાર જાહેરાત કરવામાં આવી નથી, પરંતુ બોલીવુડના અંદરના વર્તુળોમાં આ મેગા પ્રોજેક્ટને લઈને હલચલ તેજ બની છે. 'ફાઇટર 2' ને વધુ મોટા પાયે અને આંતરરાષ્ટ્રીય સ્તરના VFX સાથે બનાવવાની યોજના છે. જો બધું જ પ્લાન મુજબ ચાલ્યું તો હૃતિક રોશનની આ ફિલ્મ વર્ષ ૨૦૨૭ની સૌથી મોટી એક્શન ફિલ્મોમાંની એક સાબિત થઈ શકે છે. હવે જોવાનું એ રહે છે કે સત્તાવાર એનાઉન્સમેન્ટ ક્યારે થાય છે અને આ વખતે વાર્તામાં કયા નવા દુશ્મનો કે પડકારો સામેલ કરવામાં આવે છે.