મુંબઈ, તા.૧૪: સિનેમાજગતમાં હાલમાં માત્ર એક જ નામની ગૂંજ સંભળાઈ રહી છે—'હનુમાન અંશ'. કોઈ પણ મોટા પ્રમોશન કે હાઇપ વગર માત્ર ૨ કરોડ રૂપિયાના સામાન્ય બજેટમાં બનેલી આ સનાતની સિનેમાએ બોક્સ ઓફિસ પર કમાણીના તમામ જુના રેકોર્ડ ધ્વસ્ત કરી નાખ્યા છે. માત્ર ૩૮ દિવસની અંદર ભારતમાં ૨૧૪.૬૩ કરોડ રૂપિયાથી વધુની ઐતિહાસિક નેટ કમાણી કરીને બોક્સ ઓફિસ પર રાજ કરી રહેલા યુવા દિગ્દર્શક વિશાલ ચતુર્વેદીએ હવે તેમની આગામી ભવ્ય ફિલ્મની સત્તાવાર જાહેરાત કરી દીધી છે.

સોમવારે દિગ્દર્શક વિશાલ ચતુર્વેદી, મહાવીર જૈન, અમિત ઉપાધ્યાય અને રઘુવેન્દ્ર સિંહે મળીને તેમની નવી ફિલ્મ 'રામબોલા'નું ટાઈટલ પોસ્ટર રિલીઝ કર્યું હતું. આ ફિલ્મ મહાન કવિ અને રામચરિતમાનસના રચયિતા ગોસ્વામી તુલસીદાસના બાળપણથી લઈને તેમના મહાન સંત બનવા સુધીની અમર ગાથા પર આધારિત બાયોપિક હશે. મહાવીર જૈન ફિલ્મ્સ દ્વારા ઇન્સ્ટાગ્રામ પર બાપ્પાના આશીર્વાદ સાથે આ દિવ્ય પ્રોજેક્ટની જાહેરાત કરવામાં આવી હતી, જેને સોશિયલ મીડિયા પર ગણેશભક્તો અને સિનેપ્રેમીઓ તરફથી અભૂતપૂર્વ પ્રતિસાદ મળી રહ્યો છે.

નેટિઝન્સ અને બોક્સ ઓફિસ વિશ્લેષકો અત્યારથી જ 'રામબોલા'ને વધુ એક ઓલ-ટાઈમ બ્લોકબસ્ટર ગણાવી રહ્યા છે. 'હનુમાન અંશ' ફિલ્મની વાત કરીએ તો તે ૭ ઓગસ્ટ, ૨૦૨૬ના રોજ થિયેટરોમાં રિલીઝ થઈ હતી. શરૂઆતના બે અઠવાડિયામાં માત્ર ૧.૪૦ કરોડની સામાન્ય કમાણી કર્યા બાદ, માઉથ-ટુ-માઉથ પબ્લિસિટીના જોરે ત્રીજા અઠવાડિયે દર્શકોનો એવો ધસારો થયો કે થિયેટર માલિકોએ શોની સંખ્યા અને સ્ક્રીન્સ અનેકગણી વધારવી પડી હતી.

પોતાના છઠ્ઠા અઠવાડિયામાં પણ શાહરૂખ-સલમાન કે મોટી સ્ટારકાસ્ટ ધરાવતી 'મિર્ઝાપુર: ધ મૂવી' અને 'હૈવાન' જેવી મોટી ફિલ્મોને પાછળ છોડીને 'હનુમાન અંશ' બોક્સ ઓફિસ પર અવિરત કમાણી કરી રહી છે. ૬ઠ્ઠા રવિવારે પણ ફિલ્મે ૨૨.૫૦ કરોડની કમાણી કરીને નવો ઈતિહાસ રચ્યો છે. ૨૦૦ કરોડનો આંકડો વટાવી ચૂકેલી આ ફિલ્મ હવે ખૂબ જલ્દી ૩૦૦ કરોડના સુવર્ણ ક્લબમાં સામેલ થવા તરફ આગળ વધી રહી છે, ત્યારે 'રામબોલા'ની જાહેરાતે ભક્તો અને સિનેમાપ્રેમીઓની ઉત્સુકતા બેવડી કરી દીધી છે.