સુરત જિલ્લાના ઓલપાડ તાલુકામાં આવેલા કીમ વિસ્તારના શિવાજી નગરમાં તાજેતરમાં 11 તોલા સોનાના દાગીના અને મોટી રોકડ રકમની ચોરીની ઘટના સામે આવી હતી. આ ગંભીર ચોરીના મામલે કીમ પોલીસે ત્વરિત અને સઘન તપાસ હાથ ધરીને ગણતરીના દિવસોમાં જ સમગ્ર ચોરીનો સફળતાપૂર્વક ભેદ ઉકેલી નાખ્યો છે.

પોલીસની ઊંડાણપૂર્વકની તપાસમાં અત્યંત ચોંકાવનારો ખુલાસો થયો હતો, જેમાં પીડિત મહિલાના સગા ભત્રીજા દીપક મહાજન જ માસીના ઘરે સોનાના દાગીના અને રોકડની ચોરી કરી હોવાનું સામે આવ્યું હતું. ગુનો આચર્યા બાદ આરોપી મહારાષ્ટ્ર ભાગી ગયો હતો. કીમ પોલીસે લોકેશન અને બાતમીના આધારે આરોપી ભત્રીજા દીપક મહાજનને મહારાષ્ટ્રના જલગાંવથી ઝડપી પાડી તેની પાસેથી રૂ.5 લાખની રોકડ રકમ રિકવર કરી છે.

તપાસ દરમિયાન ચોરી કરેલું 11 તોલા સોનું મહારાષ્ટ્રના ધરણગાંવ ખાતે આવેલા રુદ્ર જ્વેલર્સના સોનીને વેચવામાં આવ્યું હોવાની વિગત ખૂલતાં પોલીસે સોનું ખરીદનાર વેપારીની પણ ધરપકડ કરી છે. કીમ પોલીસે મુખ્ય આરોપી ભત્રીજા અને સોનાના વેપારી બંનેને ઓલપાડ કોર્ટમાં રજૂ કરી રિમાન્ડની માગણી કરી હતી, જેને ગ્રાહ્ય રાખી કોર્ટે બંને આરોપીઓના 4 દિવસના પોલીસ રિમાન્ડ મંજૂર કર્યા છે.