અમદાવાદ તા.૨૩: અમદાવાદના સુભાષબ્રિજ વિસ્તારમાં એક ચોંકાવનારી ઘટના સામે આવી છે. માત્ર ૪ હજાર રૃપિયાની ટ્યુશન ફી ગુમ થવાના ડરથી એક ૧૭ વર્ષીય સગીરે પોતાના જ ઘરમાંથી લાખો રૃપિયાના સોનાના દાગીનાની ચોરી કરી હતી. આ સગીરે ફી ભરવા માટે પોતાના મિત્ર પાસેથી પૈસા ઉધાર લીધા હતા અને તેની અવેજમાં ઘરના કિમતી ઘરેણાં તેને આપી દીધા હતા. મિત્રએ આ દાગીના પચાવી પાડીને છેતરપિડી કરી હોવાનું સામે આવતાં, ભોગ બનનાર સગીરની માતાની ફરિયાદના આધારે રાણીપ પોલીસે આરોપી યુવક સામે ગુનો દાખલ કરી કાયદેસરની કાર્યવાહી હાથ ધરી છે.

પ્રાપ્ત વિગતો અનુસાર, ફરિયાદી મહિલાના ૧૭ વર્ષીય પુત્ર નરેશ (નામ બદલેલ છે) પાસેથી તેની માતાએ આપેલી ટ્યુશન ફીના ૪,૦૦૦ રૃપિયા રસ્તામાં કયાંક પડી ગયા હતા. માતા ઠપકો આપશે તેવા ડરથી નરેશે આ વાત ઘરમાં છુપાવી રાખી હતી અને ફીની ગોઠવણ માટે પોતાના મિત્ર વિજય મેઘવાલનો સંપર્ક કર્યો હતો. વિજયે મદદ કરવાના બહાને એવી શરત મૂકી કે જો તે ઘરમાંથી સોનાના દાગીના લાવીને આપશે, તો જ તે ૪ હજાર રૃપિયા આપશે. મિત્રની આ ચાલાકીમાં ફસાઈ જઈને સગીરે પોતાની જ ઘરની તિજોરીમાંથી અંદાજે રૃ. ૬.૫૦ લાખની કિમતના આભૂષણો કાઢીને વિજયને પકડાવી દીધા હતા. આ સમગ્ર ઘટનાનો ભાંડો ત્યારે ફૂટ્યો જ્યારે મહિલાએ વતનમાં જવા માટે પોતાની તિજોરી ખોલી અને તેમાંથી દાગીના ગાયબ જોવા મળ્યા.

દાગીના ન મળતાં માતાએ પુત્રની કડકાઈથી પૂછપરછ કરી હતી, જેમાં પહેલાં તો તેણે ગોળગોળ જવાબો આપ્યા, પરંતુ અંતે મિત્રને ઘરેણાં આપ્યા હોવાની કબૂલાત કરી લીધી હતી. આ હકીકત જાણ્યા બાદ જ્યારે મહિલા દાગીના લેવા માટે વિજયના ઘરે પહોંચી ત્યારે જાણવા મળ્યું કે તે રાજસ્થાન ભાગી ગયો છે. ત્યારબાદ ફોન પર વાત થતાં આરોપી વિજયે જણાવ્યું હતું કે તેણે દાગીના ગીરવે મૂકી દીધા છે, અને તે પરત લાવીને આપી દેશે. જોકે, લાંબો સમય વીતી જવા છતાં આ કિમતી ઘરેણાં પાછા ન મળતાં, અંતે છેતરાયેલી માતાએ રાણીપ પોલીસ મથકે વિજય મેઘવાલ વિરુદ્ધ વિશ્વાસઘાત અને છેતરપિડીની સત્તાવાર ફરિયાદ નોંધાવી છે. હાલ પોલીસ આરોપીને પકડવા માટે તપાસ ચલાવી રહી છે