તા. ૨૧ નવેમ્બર ર૦ર૬ વિક્રમ સંવત ર૦૮૩ કારતક સુદ – ૧૨ શનિવાર
News of Monday, 20th May 2024
મકાન માલિક સોસાયટી સામે હાઈકોર્ટમાં ગયા
ફ્લેટમાં પાણીના લિકેજની સમસ્યાઃવસ્ત્રાપુર એરિયામાં એક સિનિયર સિટિઝનને પણ આવો અનુભવ થતા તેઓ હાઈકોર્ટમાં ગયા છે અને કોર્ટે સોસાયટીને નોટિસ ફટકારી છે

અમદાવાદ,તા.૨૦
હાઉસિંગ સોસાયટીમાં પાણીના લિકેજની સમસ્યા હોય ત્યારે મકાન માલિકોએ ઘણું સહન કરવું પડે છે અને કેટલીક વખત તેનો કોઈ ઉકેલ નથી આવતો. અમદાવાદના સેટેલાઈટ એરિયામાં પણ એક સોસાયટીમાં પાણીના લિકેજની સમસ્યા હતી. એક મકાનમાલિકને ત્યાં તેના ઉપરના માળેથી પાણી સતત લિક થતું હતું. અનેક વખત ફરિયાદ કરવા છતાં આ સમસ્યાનો ઉકેલ આવ્યો ન હતો અને એક વખત તો વોટર લિકેજના કારણે શોર્ટ સર્કિટની ઘટના પણ બની હતી. તેનાથી કંટાળીને એક મકાનમાલિક હવે સોસાયટી સામે ગુજરાત હાઈકોર્ટમાં ગયા છે. અમદાવાદમાં વસ્ત્રાપુર વિસ્તારમાં સેટેલાઈટ કોમ્પ્લેક્સમાં વોટર લિકેજની સમસ્યા છે. તેનાથી ત્રાસીને કિરણ દલાલ નામના ૭૨ વર્ષના મકાન માલિક પોતાની સોસાયટીને હાઈકોર્ટમાં ઢસડી ગયા છે. કિરણ દલાલનું કહેવું છે કે તેઓ જે ફ્લેટમાં રહે છે તેની ઉપરના ફ્લેટમાંથી પાણી લિક થાય છે અને તેનો કોઈ ઉકેલ નથી આવ્યો. હાઈકોર્ટે સોસાયટી, કિરણ દલાલના પડોશી, અને અમદાવાદ મ્યુનિસિપલ કોર્પોરેશનને નોટિસ ફટકારી છે અને આ અંગે ૧૨ જૂને સુનાવણી થશે. કિરણ દલાલને ત્યાં પાણીના લિકેજની સમસ્યા છે જેનો કોઈ ઉકેલ ન આવવાથી તેઓ હાઈકોર્ટમાં ગયા છે. તેમની પિટિશનમાં અમદાવાદ મ્યુનિસિપલ કોર્પોરેશન સામે આરોપ મૂકવામાં આવ્યો છે કે તેઓ નિયમિત પ્રોપર્ટી ટેક્સ ભરે છે અને છતાં એએમસીએ કોઈ પગલાં નથી લીધા.
દલાલે સેટેલાઈટ કોમ્પ્લેક્સમાં એપ્રિલ ૨૦૧૭માં બી-૯૩ નંબરનો ફ્લેટ ખરીદ્યો હતો. ત્યાર બાદ તેમણે આખા એપાર્ટમેન્ટમાં રિનોવેશન શરૃ કર્યું હતું. તેમણે આખા ફ્લેટમાં પીઓપીનું કામ કરાવ્યું ત્યારે પણ તકલીફ પડી હતી જેમાં ઉપરના ફ્લેટમાંથી પાણી લિકેજ થવાના કારણે શોર્ટ સર્કિટ થઈ હતી. પિટિશનમાં જણાવાયું છે કે પાણીના લિકેજની સમસ્યા એટલી તીવ્ર છે કે પીવીના પાણીમાં અને રસોડાના કિચન પર રાખેલા પ્લેટફોર્મમાં પણ ઉપરના ફ્લેટનું પાણી પડે છે. લગભગ અડધા પ્લેટફોર્મ પર પાણી લિક થઈ રહ્યું છે અને માસ્ટર બેડરૃમ તથા વોરૃમમમાં પણ પાણી લિક થતું હોવાથી આખી દિવાલમાં ભેજ આવ્યો છે અને દિવાલ ખરાબ થઈ ગઈ છે. તેના કારણે ફર્નિચરને નુકસાન થયું છે અને હજુ પણ શોર્ટ સર્કિટ થવાની બીક છે.
અરજકર્તાએ કહ્યું છે કે તેઓ અને તેમના પત્ની સિનિયર સિટિઝન છે અને પાણીના લિકેજની સમસ્યાના કારણે તેમના શારિરીક અને માનસિક આરોગ્યને અસર થઈ છે. તેમણે ટપકતું પાણી કેચ કરવા માટે ઘરમાં ફ્લોર પર બાલ્ટી રાખવી પડે છે. ઉપરના ફ્લેટના માલિકને આ વિશે ઘણી વખત રિક્વેસ્ટ કરવામાં આવી હોવા છતાં તેઓ સાંભળતા નથી. તેઓ પોતાના ઘરમાં રિપેરિંગ કરાવતા નથી અને નીચેના ફ્લેટના માલિકનો ફોન પણ બ્લોક કરી નાખ્યો છે.
સોસાયટી પણ આ વાતમાં તેમને કોઈ મદદ કરતી નથી. દલાલે કહ્યું કે તેમણે ઘરમાં જે ફોલ્સ સિલિંગ બનાવી છે તે પણ એટલી ખરાબ થઈ ગઈ છે કે ગમે ત્યારે તૂટી પડે તેવી શક્યતા છે જેના કારણે દંપતી માટે જોખમ થઈ શકે છે. ૧૨ જાન્યુઆરી ૨૦૨૪ના રોજ તેમણે આ અંગે સોસાયટીને પણ રજુઆત કરી હતી અને આ મામલે મદદ કરવા માંગણી કરી હતી. પરંતુ તેનો કોઈ પ્રતિભાવ મળ્યો ન હતો. ત્યાર પછી તેમણે એએમસીને પણ એક પત્ર લખ્યો હતો અને તેનો પણ જવાબ મળ્યો ન હતો. આખરે કંટાળીને તેઓ હાઈકોર્ટમાં ગયા છે અને લિકેજનની સમસ્યાનો કાયમી ઉકેલ આવે તેવી માંગણી કરી છે.
અમદાવાદમાં અગાઉ પણ આવા કેસ આવ્યા છે જેમાં દિવાલમાં ભેજ ઉતરતો હોય અથવા તો ઉપરના માળેથી પાણી લિક થવાની ફરિયાદ કરવામાં આવી હોય અને પછી મામલો કોર્ટમાં પહોંચ્યો હોય. તાજેતરમાં એક ગ્રાહક કોર્ટમાં આવો કેસ ગયો હતો જેમાં ઉપરના માળેથી પાણી દિવાલમાં ઉતરતું હોવાની ફરિયાદ હતી.
આવા કેસમાં ગ્રાહક કોર્ટે બિલ્ડરને જવાબદાર ગણ્યા હતા અને લિકેજનું રિપેર કરી આપવાનો હુકમ કર્યો હતો.
(9:09 PM IST)









છેલ્લા 8 દિવસમાં સૌથી લોકપ્રિય 
