<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Monday, 10th June 2024

ભરૂચમાં ધોધમાર વરસાદ વચ્‍ચે ગાડી-રિક્ષા પર ઝાડ પડયું : ૪ લોકોના મોત થતા ચકચાર

અમદાવાદ, ગાંધીનગર, વડોદરા સહિતના શહેરોમાં મેઘરાજાએ રવિવારે ધબધબાટી બોલાવી

 

અમદાવાદ, તા.૧૦: ગુજરાત રાજ્‍યનાં મોટાભાગનાં શહેરોમાં રવિવારે ધોધમાર વરસાદ નોંધાયો હતો. અમદાવાદ, ગાંધીનગર, વડોદરા સહિતના શહેરોમાં મેઘરાજાએ ધબધબાટી બોલાવી નાખી હતી.આના પરિણામે ઠેર ઠેર પાણી ભરાઈ ગયા હતા અને ભરૂચ રોડ પર તો એક કાર અને રિક્ષા પર ઝાડ પડી જતા ૪ લોકોના મોત નીપજ્‍યા હોવાની માહિતી પણ મળી રહી છે. કારમાં ૩ લોકો અને રિક્ષામાં ૧ મહિલાનું મોત નીપજ્‍યું છે. આની સાથે વડોદરમાં એક વ્‍યક્‍તિ ઘરે જઈ રહી હતી ત્‍યારે તેના પર વીજળી પડતા ઘટનાસ્‍થળે મોત નીપજ્‍યું હતું.

ગત રાત્રે અમદાવાદ, ગાંધીનગર સહિત ગુજરાતના મોટાભાગનાં વિસ્‍તારમાં મેઘરાજાએ એન્‍ટ્રી કરી દીધી હતી. અહીં વીજળીનાં કડાકા ભડાકા સાથે વરસાદ ખાબકયો હતો. તેવામાં વડોદરા અને નર્મદા જિલ્લામાં ધોધમાર વરસાદ પડ્‍યો હતો. ઉલ્લેખનીય છે કે આ વખતે મે મહિનામાં બપોરે કાળઝાળ ગરમી પડી રહી હતી અને ઊકળાટનાં કારણે લોકો ત્રાહિમામ પોકારી ગયા હતા. તેમાં વરસાદને પગલે કેટલાક વિસ્‍તારોમાં ગરમીથી તો રાહત મળી તો કયાંક ઝાડ પડી જતા મોટી દુર્ઘટના ઘટી હતી.

ભરૂચ જતા સમયે માર્ગમાં એક મોટુ ઝાડ વરસાદ અને વાવાઝોડાને લીધે ગાડી તથા રિક્ષા પર પડી ગયું હતું. આના પરિણામે બંને વાહનોમાં બેઠેલા ૪ લોકોના ઘટનાસ્‍થળે મોત નીપજ્‍યા હતા. આ દુર્ઘટના જલારામ મંદિર પાસે સાંજે ૪ વાગ્‍યાની આસપાસ બની હતી. આ સમયે ગાડીની અંદર કૂલ ૫ લોકો સવારી કરી રહ્યા હતા જ્‍યારે રિક્ષામાં પણ એક મહિલા સવાર હોવાની વિગતો મળી રહી છે.

અહીં કારમાં સવાર કૂલ ૫ લોકોમાંથી ૩ છોકરાઓ તો નજીકના ગામમાં ક્રિકેટ મેચ રમવા માટે ગયા હતા. અહીં તેમણે શાનદાર ક્રિકેટ ગેમ રમી અને બાદમાં મિત્રો સાથે પરત ફરી રહ્યા હતા ત્‍યારે અકસ્‍માતનો ભોગ બન્‍યા હતા. આની સાથે રિક્ષામાં કૂલ ૩ લોકો સવાર હતા જેમાંથી એક મહિલાનું ઘટનાસ્‍થળે મોત નીપજ્‍યું હતું. જ્‍યારે અન્‍ય ૩ લોકો હેમખેમ રિક્ષાથી બહાર નીકળવામાં સફળ રહેતા નાની મોટી ઈજા પહોંચી હતી. આ દુર્ઘટના પછી સ્‍થાનિકોએ એમ્‍બ્‍યુલન્‍સ બોલાવી દીધી અને બાદમાં દરેકને ભરુચની હોસ્‍પિટલમાં ખસેડાયા હતા.

અચાનક વાતાવરણમાં પલટો આવી જતા વડોદરામાં એક વ્‍યક્‍તિનું મોત થયું છે. તે ધોધમાર વરસાદ પડી રહ્યો હતો ત્‍યારે ગ્રાઉન્‍ડમાં ઊભો હતો, એ સમયે અચાનક વીજળી તેના માથે પડી અને તેનું મોત નીપજ્‍યું હતું. આ અંગે તેમના પરિવારને જાણ થતા શોકનું મોજુ ફેલાઈ ગયું હતું. ઘરના જ એક સભ્‍યએ કહ્યું કે અમારો ભાઈ નોકરી કરીને ઘરે આવી રહ્યો હતો ત્‍યારે અચાનક રસ્‍તામાં તેના પર વીજળી પડી અને બાદમાં તેને હોસ્‍પિટલ ખસેડાયો પરંતુ તેનું મોત નીપજ્‍યું હતું.

આમ જોવા જઈએ તો હવામાન વિભાગે આગાહી કરી હતી કે સમગ્ર રાજ્‍યભરમાં વરસાદી માહોલ ૧૨ જૂન પછી જોવા મળશે. પરંતુ ૩ દિવસ પહેલા જ મેઘરાજાએ ગુજરાતમાં ધામા નાખી દીધા છે અને લાગી રહ્યું છે કે હવે રાજ્‍યભરમાં ચોમાસુ બેસી ગયું છે. દક્ષિણ ગુજરાતના અનેક ભાગોમાં રવિવારના રોજ પ્રિ-મોન્‍સુન વરસાદ નોંધાયો હતો, નવ તાલુકાઓમાં સાંજે ૬ વાગ્‍યા સુધી ૧૦ મીમી કે તેથી વધુ વરસાદ નોંધાયો હતો જેમાં તાપીના ડોલવણમાં ૩૦ મીમી અને નર્મદા જીલ્લાના તિલકવાડા અને નાંદોદમાં અનુક્રમે ૨૮ મીમી અને ૨૦ મીમી વરસાદ નોંધાયો હતો. તાપી, નર્મદા, અમરેલી, ભરૂચ, સુરત, છોટા ઉદેપુર, મહિસાગર, વલસાડ અને બોટાદ જિલ્લાના કુલ ૧૮ તાલુકાઓમાં ઓછામાં ઓછો ૧ મીમી વરસાદ નોંધાયો છે. હવે આગામી સિઝનમાં ઘણા એવા જિલ્લાઓમાં અગાઉની સિઝન કરતા વધુ વરસાદ ખાબકશે એવી આગાહી કરાઈ છે એ પણ જોવાજેવી રહી.

(3:48 PM IST)