<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Thursday, 27th June 2024

ફેશન ડિઝાઇનરને ધમકી આપનાર અજાણ્યા લોકો સામે વડોદારના કારેલીબાગ પોલીસ સ્ટેશનમાં FIR: સુવર્ણ મંદિરમાં યોગ કર્યા હતાં

અર્ચનાને મળી રહેલી ધમકીઓને જોતા વડોદરા પોલીસે અજાણ્યા લોકો સામે FIR નોંધી

વડોદરાની ફેશન ડિઝાઇનર અને સોશિયલ મીડિયા ઇન્ફ્લુએન્સર અર્ચના મકવાણાને અમૃતસરના સુવર્ણ મંદિરમાં યોગ કર્યા બાદ જાનથી મારી નાખવાની ધમકીઓ મળી રહી છે. અર્ચનાને મળી રહેલી ધમકીઓને જોતા વડોદરા પોલીસે અજાણ્યા લોકો સામે FIR નોંધી છે.

21 જૂને અમૃતસરના સુવર્ણ મંદિર સંકુલમાં યોગ કર્યા બાદ ડિઝાઇનર પર ફોજદારી કેસનો સામનો કરવો પડી રહ્યો છે. બીજી તરફ, એક નવો વીડિયો જાહેર કરીને અર્ચના મકવાણાએ કહ્યું કે તેણે કંઈ ખોટું કર્યું નથી અને શિરોમણી ગુરુદ્વારા પ્રબંધક સમિતિ (SGPC)એ ધાર્મિક લાગણીઓને કથિત રીતે ઠેસ પહોંચાડવા બદલ તેની સામેની ફરિયાદ પાછી ખેંચી લેવી જોઈએ.
વડોદરા પોલીસના એક અધિકારીએ જણાવ્યું હતું કે, અર્ચનાને ધમકી આપવા અંગેની તેણીની ફરિયાદના આધારે, બુધવારે રાત્રે કારેલીબાગ પોલીસ સ્ટેશનમાં ભારતીય દંડ સંહિતાની કલમ 507 (અનામી સંદેશ દ્વારા ગુનાહિત ધમકી) હેઠળ એફઆઈઆર નોંધવામાં આવી છે.

ડેપ્યુટી કમિશનર ઓફ પોલીસ પન્ના મોમાયાએ કહ્યું, "અર્ચનાએ દાવો કર્યો કે સુવર્ણ મંદિરમાં શીર્ષાસન કરતી તેની તસવીરો વાયરલ થયા બાદ, અજાણ્યા લોકોએ તેને ઈમેલ, વોટ્સએપ અને ઈન્સ્ટાગ્રામ દ્વારા જાનથી મારી નાખવાની ધમકી આપી હતી. FIRમાં કોઈ શંકાસ્પદનું નામ લેવામાં આવ્યું નથી."

અર્ચનાએ 21 જૂને આંતરરાષ્ટ્રીય યોગ દિવસ પર સુવર્ણ મંદિરની મુલાકાત લીધી હતી અને તેના પરિક્રમા માર્ગ પર યોગ કર્યા હતા. યોગ કરતી તેની તસવીરો સોશિયલ મીડિયા પર ઝડપથી વાયરલ થઈ હતી. જો કે, અર્ચના મકવાણાએ તેના કૃત્ય બદલ માફી માંગી છે અને કહ્યું છે કે તેનો ઈરાદો ક્યારેય કોઈની ધાર્મિક લાગણીઓને ઠેસ પહોંચાડવાનો નથી.

અર્ચના મકવાણાને મળી રહેલી જાનથી મારી નાખવાની ધમકીઓને ધ્યાનમાં રાખીને 24 જૂનથી વડોદરા પોલીસ તેમને સુરક્ષા પૂરી પાડી રહી છે.

(8:21 PM IST)