<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Monday, 2nd September 2024

વરસાદથી તૂટી ગયેલા ૩૬,૧૦૧ કિમીના માર્ગોને તાકીદના ધોરણે રિપેરીંગના આદેશો

જિલ્લાના જે માર્ગોને નુકશાન થયું છે તેની મરામત ૭મી, સપ્‍ટેમ્‍બર-૨૦૨૪ સુધીમાં પૂર્ણ કરવા માટે અને ગ્રામ્‍ય માર્ગોની મરામત ૧૫મી, સપ્‍ટેમ્‍બર-૨૦૨૪ સુધીમાં પૂરા કરવાના આદેશ જારી : વડોદરા-વાપી, રાજકોટ-જેતપુર, ચિલોડા-હિંમતનગર તથા અન્‍ય રસ્‍તાઓ પર યુદ્ધના ધોરણે સમારકામની કામગીરી ચાલુ

અમદાવાદ, તા.૨: રાજ્‍યમાં ભારે વરસાદને કારણે ધોરીમાર્ગોને મોટાપાયે નુકસાન થયું હતું. જેને રિપેર કરવા માટે સરકારે યુદ્ધના ધોરણે કામગીરી આરંભી છે. દરમ્‍યાનમાં મુખ્‍યમંત્રી ભૂપેન્‍દ્ર પટેલે આ તૂટેલા માર્ગોને પુનઃ વાહન વ્‍યવહાર યુક્‍ત બનાવવા માટે માર્ગ મકાન વિભાગને દિશાનિર્દેશો આપ્‍યા છે. રાજ્‍યમાં માર્ગ અને મકાન વિભાગ હસ્‍તકના કુલ ૧,૧૬,૦૦૦ કિલોમીટર લંબાઈના માર્ગો છે. જે પૈકી ૧લી, સપ્‍ટેમ્‍બર-૨૦૨૪ સુધી ૩૬,૧૦૧ કિ.મી. જેટલા માર્ગોને નુકસાન થયું છે. એમાંથી પણ જિલ્લાના જે માર્ગોને નુકશા થયું છે. તેની મરામત ૭મી, સપ્‍ટેમ્‍બર-૨૦૨૪ સુધીમાં પૂર્ણ કરવા માટે અને ગ્રામ્‍ય માર્ગોની મરામત ૧૫મી, સપ્‍ટેમ્‍બર-૨૦૨૪ સુધીમાં પૂરા કરવાના આદેશ જારી કરાયા છે. માર્ગ-મકાન વિભાગ દ્વારા જી.એચ. બી., ડ્રાય મેટલ તથા કોલ્‍ડ મીક્ષ ડામર વાપરી હંગામી ધોરણે તો મરામતની કામગીરી શરુ કરી દેવામાં આવી છે. ક્ષેત્રીય કક્ષાએ કાર્યરત ટીમોને મરામતની કામગીરી યુધ્‍ધના ધોરણે હાથ ધરવા સૂચના આપવામાં આવી છે.

ગાંધીનગર ખાતેથી પણ સચિવોના માર્ગદર્શન હેઠળ મુખ્‍ય ઈજનેરો દ્વારા સતત મોનીટરિંગ અને સંચાલન કરાશે. જ્‍યારે, તમામ તાલુકાઓમાં ચાલતી કામગીરીનો રિવ્‍યૂ સ્‍થાનિક કલેક્‍ટર, પ્રભારી મંત્રી-સચિવો  દ્વારા સંકલન કરાઈ રહ્યો છે. જોકે, આ નુકસાન પામેલા માર્ગોનું કાયમી મરામત, ઉઘાડ નીકળ્‍યા બાદ હાથ ધરવામાં આવશે. તાત્‍કાલીક ધોરણે ક્ષેત્રીય કક્ષાએ જેસીબી-૭૩૧, ડમ્‍પર-૬૯૯, ટ્રેક્‍ટર-૫૫૭,હીટાચી-૭, રોલર- ૬૫, લોડર-૧૪, ટ્રી-કટર- ૪૮, પેવર = ૪ થી મરામત કામગીરી ઉપાડવામાં આવી છે. આ હેતુસર અંદાજે ૬,૪૮૭ કામદારો સાથે કુલ ૪૬૬ ટીમો કાર્યરત છે. જે જગ્‍યાઓએ સ્‍ટ્રકચર તૂટી ગયા છે, ત્‍યાં તાત્‍કાલિક ડાયવર્ઝન બનાવી વાહન વ્‍યવહાર પુનઃસ્‍થાપિત કરવાની કામગીરી ચાલુ કરાઇ છે.

આવા સ્‍થળોએ વાહન વ્‍યવહાર વૈકલ્‍પિક રસ્‍તા ઓ પર ડાયવર્ટ કરવામાં આવ્‍યા છે અને તે માટેના સૂચનાત્‍મક બોર્ડ લગાવવામાં આવી રહ્યા છે. અન્‍ય તમામ સ્‍ટ્રકચરનું રિ-વેરિફિકેશન કરી જરૂરી સલામતીના પગલાં લેવા માટે ક્ષેત્રીય કચેરીઓને સૂચના આપવામાં આવી છે. કામગીરી ચાલુ હોઈ તેવા સેક્‍શનમાં વિભાગના અધિકારી, કર્મચારી-કામદારો દ્વારા સલામતીના ભાગરુપે જેકેટ પહેરી તથા ઙ્કકામગીરી ચાલુ છે જેવા સાવધાની સૂચક બોર્ડ રાખી કામગીરી કરવા સૂચના અપાઈ છે.

નેશનલ હાઈવે ઓથોરિટી ઓફ ઈન્‍ડિયા હસ્‍તકના કુલ ૨૮૯૪ કિલોમીટરના રાષ્‍ટ્રીય ધોરી માર્ગોને નુકસાન થયું છે. જેની મરામત માટે અંદાજે ૧૩૯ કિમીની લંબાઈના માર્ગોની મરામતની કામગીરી રાજ્‍ય સરકારના સંપર્કમાં રહી N.H.A.I દ્વારા હાથ ધરવામાં આવી છે. આ અન્‍વયે વડોદરા-વાપી, રાજકોટ-જેતપુર, ચિલોડા-હિંમતનગર તથા અન્‍ય રસ્‍તાઓ પર યુદ્ધના ધોરણે સમારકામની કામગીરી ચાલુ છે.

(10:00 AM IST)