News of Wednesday, 4th September 2024
કોરોના પછી આઇસક્રીમનું ટર્નઓવર ૩૦ હજાર કરોડને પાર
આઇસ્ક્રીમ ઇન્ડસ્ટ્રી લાખો લોકોને ડાયરેક્ટ-ઇનડાયરેક્ટ રોજગારી આપી રહી છે : ગાંધીનગરને આંગણે આઇસક્રીમ એક્સપોઃ ૨૨ દેશના વેપારી ખાસ આવ્યા

અમદાવાદ,તા.૪: દેશમાં આઇસ્ક્રીમનું ટર્નઓવર લગભગ ૩૦ હજાર કરોડને પાર થઇ રહ્યું છે. આઇસ્ક્રીમ ઇન્ડસ્ટ્રી લાખો લોકોને ડાયરેક્ટ-ઇનડાયરેક્ટ રોજગારી આપી રહી છે ત્યારે સમગ્ર ઇન્ડસ્ટ્રીને એક સાથે જોડવા અને નવી શોધ કે ટેકનોલોજીના ઉપયોગથી ઉત્પાદકો, વેપારીઓ અને ગ્રાહકોને કેવો ફાયદો થાય તે અંગે વિસ્તૃત ચર્ચા થાય તે માટે ઓલ ઇન્ડિયા આઇસ્ક્રીમ મેન્યુફેક્ચરર્સ એસો. દ્વારા ગાંધીનગર ખાતે ઇન્ડિયન આઇસ્ક્રીમ એસ્કપો-૨૦૨૪નું આયોજન થઇ રહ્યું છે. ત્રિદિવસીય એકસપોમાં દુનિયાના ૨૨ દેશોના આઇસ્ક્રીમ ઉત્પાદકો અને વેપારીઓ ખાસ ઉપસ્થિત રહ્યા છે. તેઓ હાલ આઇસ્ક્રીમના ઉત્પાદન કે પેકેજીંગ માટે કેવી ટેકનોલોજીનો ઉપયોગ કરે તેની મશીનરીનું પણ પ્રદર્શન રાખવામાં આવ્યું છે. દુનિયાના લગભગ તમામ દેશોમાં આઇસ્ક્રીમની લોકપ્રિયતા એક સમાન છે. કોરોના કાળમાં આઇસ્ક્રીમ ઇન્ડસ્ટ્રીને ઘણું નુકસાન થયું હતું. જોકે, કોરોના બાદ આઇસ્ક્રીમ ઇન્ડસ્ટ્રીમાં બૂમ છે. ઓર્ગેનાઇઝડ આઇસ્ક્રીમ ઇન્ડસ્ટ્રી ૨૦ હજાર કરોડ અને અન ઓર્ગેનાઇઝ્ડ આઇસ્ક્રીમ ઇન્ડસ્ટ્રી લગભગ ૧૦ હજાર કરોડનું ટર્ન ઓવર કરી રહી છે. તે જોતાં દેશમાં લગભગ ૩૦ હજાર કરોડનું ટર્નોઓવર થઇ રહ્યું છે.
ગુજરાત આઇસ્ક્રીમ એસો.ના પ્રમુખ ભૂપતભાઇ ભૂવાએ જણાવ્યું હતું કે, વર્તમાન સમયે સતત ટેકનોલોજીમાં અપગ્રેડેશન થઇ રહ્યું છે ત્યારે આઇસ્ક્રીમના ઉત્પાદન માટે કેવી નવી ટેકનોલોજીનો ઉપયોગ કરી શકાય તથા પેકેજીંગ માટે શું નવું કરી શકાય તે મુદ્દે ખાસ કવાયત ચાલી રહી છે. એક્સોને લઇને વૈશ્વિક ક્ષેત્રે કેવી રીતે કામ થાય તેની પણ માહિતી મળી હતી. ગાંધીનગર હેલીપેડ ગ્રાઉન્ડ ખાતે યોજાઇ રહેલા ત્રિદિવસીય આઇસ્ક્રીમ એક્સ્પોમાં બેલ્જિયમ, ફ્રાન્સ, ઇટાલી, ઓસ્ટ્રિયા, ડેનમાર્ક, ચીન, અમેરિકા, જાપાન, બાંગ્લાદેશ સહિત કુલ ૨૨ દેશના આઇસ્ક્રીમ ઉત્પાદકો -વેપારીઓ અને જુદી જુદી મશીનરીના વેપારીઓ ભાગ લઇ રહ્યા છે. જયારે દેશની આઇસ્ક્રીમની ટોપ બ્રાન્ડસ જેવી કે અમૂલ, વાડીલાલ, સ્કૂપ્સ, હેવમોર, હોક્કો, હેંગ્યો, અરૂણ, નેચરલ્સ, ડેરી ક્લાસિક, ડેરી ડેન, શિતલ, ક્રીમબેલ, દિનશોઝ તથા પેસ્તનજી અને ટોપ એન ટાઉન, અપ્સરા તથા પાબ્બા જેવી ટોચની કંપનીના દિગ્ગજો પણ ઉપસ્થિત રહ્યા હતા. આઇસ્ક્રીમ સંગઠનના રાજેશ ગાંધી, સુધીર શાહ, આશિષ નાહરે તથા ફીરોજ નકવીએ પણ જુદી જુદા મુદ્દે ચર્ચા કરી હતી.
(10:00 AM IST)









છેલ્લા 8 દિવસમાં સૌથી લોકપ્રિય 
