<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Tuesday, 10th September 2024

ગુજરાતમાં વાહન ચલાવતી વખતે શરાબ પીવાની કોઈ પરમિસિબલ લિમિટ નથી

એક ડ્રાઈવરે એક્‍સિડન્‍ટ કર્યા પછી કારના માલિક સામે વળતરનો કેસ થયો હતો : કાર માલિકે દલીલ કરી કે ડ્રાઈવરે લિમિટમાં શરાબ પીધો હતો તેથી તેઓ વળતર માટે જવાબદાર ન ગણાયઃ પરંતુ હાઈકોર્ટે આ દલીલ ફગાવી દીધી છે

અમદાવાદ, તા.૧૦: બધા જાણે છે કે ગાંધીજીનું ગુજરાત એક ડ્રાય સ્‍ટેટ છે જ્‍યાં શરાબ પીવાની મનાઈ છે, સિવાય કે તમે શરાબ પીવાનું લાઈસન્‍સ ધરાવતા હોય. બીજા રાજ્‍યોમાં વાહન ચલાવતી વખતે શરાબની એક પરમિસિબલ લિમિટ નક્કી કરવામાં આવી છે પરંતુ ગુજરાતમાં ડ્રાઇવિંગ વખતે દારુ પીવાની બિલકુલ મનાઈ છે. ગુજરાત હાઈકોર્ટમાં આ અંગે એક કેસ આવ્‍યો હતો જેમાં એક વ્‍યક્‍તિએ દારૂ પીને કાર ચલાવી હતી અને એક્‍સિડન્‍ટ કર્યો હતો. કોર્ટે કહ્યું કે આ એક્‍સિડન્‍ટ માટે માત્ર વાહન માલિક જવાબદાર છે અને તેણે જ એક્‍સિડન્‍ટના ક્‍લેમના રૂપિયા ચૂકવવા પડશે.

આ કેસ પેસેન્‍જરોને લઈ જતી એક ટેક્‍સીનો છે જેને નવેમ્‍બર ૨૦૧૬માં પાલનપુર અને અંબાજી વચ્‍ચે એક્‍સિડન્‍ટ નડ્‍યો હતો. આ ઘટનામાં ત્રણ વ્‍યક્‍તિને ઈજા થઈ હતી અને તેમણે વળતર માગ્‍યું હતું. મોટર એક્‍સિડન્‍ટ ક્‍લેમ ટ્રિબ્‍યુનલે આના માટે ઈન્‍શ્‍યોરન્‍સ કંપની યુનાઈટેડ ઈન્‍ડિયા ઈન્‍શ્‍યોરન્‍સને અને વાહનના માલિકને - સંયુક્‍ત રીતે વીમાનો ક્‍લેમ ચૂકવવા આદેશ આપ્‍યો હતો.

ટ્રિબ્‍યુનલે કહ્યું કે કાર ચલાવનારે ડ્રાઈવિંગ વખતે શરાબ પીધો હતો તેવું પૂરવાર નથી થયું. વીમા કંપનીએ ટ્રિબ્‍યુનલના ઓર્ડરને ગુજરાત હાઈકોર્ટમાં ચેલેન્‍જ કર્યો જ્‍યાં તેમણે એફઆઈઆરની વિગતો, ચાર્જ શીટ, મેડિકો-લીગલ કેસ અને ફોરેન્‍સિક રિપોર્ટને ટાંકીને જણાવ્‍યું કે આ અકસ્‍માત થયો ત્‍યારે ડ્રાઈવરે શરાબ પીધો હતો.

વાહનના માલિકે તેના બચાવમાં દલીલ કરી કે ડ્રાઈવરના શરીરમાંથી માત્ર ૩૦ મિલીગ્રામ આલ્‍કોહોલ મળ્‍યું હતું. જે પરમિસિબલ લિમિટ કરતા ઓછું છે.

જોકે, વીમા કંપનીના વકીલે દલીલ કરી કે ગુજરાત એ ડ્રાય સ્‍ટેટ છે અને ગુજરાતમાં વાહનચાલકો માટે શરાબ પીવાની કોઈ પરમિસિબલ લિમિટ નથી. ગુજરાતમાં કાયદેસર રીતે શરાબ પીવાની મનાઈ છે. જસ્‍ટિસ સંદીપ ભટ્ટે પોતાના ઓર્ડરમાં જણાવ્‍યું કે આલ્‍કોહોલનું પ્રમાણ પરમિસિબલ લિમિટમાં છે કે નહીં તે ગુજરાતની બહાર નક્કી થવું જોઈએ જ્‍યાં શરાબ પીવાની છૂટ છે. ગુજરાતમાં તે લાગુ નથી પડતું. ગુજરાત ડ્રાય સ્‍ટેટ છે તેથી અહીં ડ્રાઈવરના લોહીમાં જરાય આલ્‍કોહોલ ચલાવી લેવાય નહીં. તેથી વીમા કંપની આ વળતર ચૂકવવા માટે જવાબદાર નથી. માત્ર વાહનના માલિકે જ વળતર ચૂકવવું જોઈએ.

હાઈકોર્ટે પોતાના ચુકાદામાં એમ પણ જણાવ્‍યું કે ડ્રાઈવરને એક્‍સિડન્‍ટ અંગેના ક્રિમિનલ કેસમાંથી છોડવામાં આવ્‍યો તેનો અર્થ એવો નથી કે વાહનનો માલિક વળતર ચૂકવવામાંથી પણ છૂટી જાય કારણ કે ફોરેન્‍સિક રિપોર્ટ અને ચાર્જશીટ દર્શાવે છે કે એક્‍સિડન્‍ટના સમયે ડ્રાઈવર પીધેલો હતો. કારનો વીમો ઉતરાવેલ હતો તેથી હાઈકોર્ટે વીમા કંપનીને સૌથી પહેલા ક્‍લેમ ચૂકવવા અને પછી વાહનના માલિક પાસેથી આ રકમ રિકવર કરવા જણાવ્‍યું હતું.

(4:01 PM IST)