<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Friday, 20th September 2024

ગૌણ સેવાની કમ્‍પ્‍યૂટરથી લેવાતી પરીક્ષા પદ્ધતિ નાબૂદ કરો

ભાજપ,કોંગ્રેસ-આપના ૩૮ ધારાસભ્‍યની રજૂઆત :ફોરેસ્‍ટ બીટ ગાર્ડની ભરતીના પરિણામમાં મોટાપાયે વિસંગતતા હોવાના ઉમેદવારોના દાવાને સમર્થન

અમદાવાદ,તા. ૨૦: ગૌણ સેવા પસંદગી મંડળ દ્વારા તાજેતરમાં ફોરેસ્‍ટ ગાર્ડ (બીટ ગાર્ડ)ની ભરતીનું પરિણામ જાહેર કરાયું હતું. તેમાં મોટાપાયે વિસંગતતા હોવાનું બહાર આવ્‍યું હતું. આ પરીક્ષા સીબીઆરટી (કમ્‍પ્‍યૂટર બેઝ્‍ડ રિસ્‍પોન્‍સ ટેસ્‍ટ) દ્વારા લેવાઇ હતી તેથી સ્‍પર્ધાત્‍મક પરીક્ષામાં તેને રદ કરવા અને ઓફલાઇન મોડથી પરીક્ષા લેવા ઉમેદવારો દ્વારા વ્‍યાપક માગણી કરવામાં આવી હતી. બીટ ગાર્ડની ભરતીમાં વધારો કરવા અને સીબીઆરટી પદ્ધતિ પરીક્ષા નાબૂદી માટે હવે ભાજપ, કોંગ્રેસ અને આમ આદમી પાર્ટીના ૩૮ જેટલા ધારાસભ્‍યો તેમજ ભાજપ અને કોંગ્રેસના કેટલાક સાંસદોએ પણ ઉમેદવારોની માગણીને સમર્થન આપતા પત્ર સરકારને લખ્‍યા છે.

વન વિભાગની બીટ ગાર્ડની પરીક્ષામાં ઉમેદવારોની પરીક્ષા કમ્‍પ્‍યૂટર આધારીત લેવામાં આવી હતી. જેમાં ભારે વિસંગતતા હોવાની ફરિયાદો ઉમેદવારો દ્વારા ઉઠી હતી. સીબીઆરટી પદ્ધતિથી પરીક્ષા લેવાઈ તેમાં નોર્મલાઈઝેશન સિસ્‍ટમ લાગુ કરવામાં આવતા જે ઉમેદવારના ઓછા માર્ક્‍સ હતા તેમના વધી ગયા અને જેના વધારે માર્ક્‍સ હતા તેમના ઘટી ગયા હોવાનો દાવો ઉમેદવારો દ્વારા કરાયો હતો. તે પછી સીસીઇ (કમ્‍બાઇન્‍ડ કોમ્‍પિટિટિવ એક્‍ઝામ)ની પરીક્ષા પણ સીબીઆરટી પદ્ધતિથી લેવાતા તેનો પણ વિરોધ કરી જાહેર સેવા આયોગની જેમ ઓફ લાઇન પદ્ધતિથી પરીક્ષા લેવા માગણી કરાઇ હતી. સીબીઆરટી નાબૂદ કરવા અને પીડીએફ ફોર્મેટમાં ગુણ જાહેર કરવા માગણી કરવામાં આવી હતી.

જો કે વન વિભાગ,  સરકાર કે ગૌણ સેવા પસંદગી મંડળ દ્વારા કોઇ પ્રતિભાવ ન મળતા ઉમેદવારોએ કેટલાક ચૂંટાયેલા પ્રતિનિધિઓને રજૂઆત કરી હતી. જેના પ્રતિભાવમાં ભાજપ, કોંગ્રેસ, આપના ૩૮ જેટલા ધારાસભ્‍યો અને સાંસદોએ વન મંત્રી મૂળુભાઇ બેરાને પત્ર લખીને ઉમેદવારોને અન્‍યાય થયો હોવાથી સીબીઆરટી નાબૂદ કરવા અને બીટ ગાર્ડની અનેક જગ્‍યા ખાલી હોવાથી તેની ભરતીમાં વધારો કરવા માટે રજૂઆત કરી છે.

ઉમેદવારોની માગણીમાં તમામ પક્ષના ધારાસભ્‍ય-સાંસદોએ સમર્થન આપ્‍યું છે. સાંસદોમાં કોંગ્રેસના ગેનીબેન ઠાકોર, ભાજપના શોભનાબેન બારૈયા, જશુભાઇ રાઠવા વિગેરેનો સમાવેશ થાય છે. તો ધારાસભ્‍યોમાં ભાજપના પ્રદ્યુમનસિંહ જાડેજા, કંચનબેન રાદડિયા, કરસન સોલંકી, કલ્‍પેશ પરમાર, મુકેશ પટેલ, સેજલ પંડ્‍યા, અંબરીશ ડેર, માલતી મહેશ્વરી, પ્રવીણ ઘોઘારી, અનિરૂદ્ધ દવે, પ્રવીણ માળી, વિરેન્‍દ્રસિંહ જાડેજા, ડો. જયરામ ગામીત, લક્ષ્મણજી ઠાકોર, મહેશ કસવાલા, બલરાજસિંહ ચૌહાણ, હાર્દિક પટેલ, અર્જુનસિંહ ચૌહાણ વિગેરેનો સમાવેશ થાય છે. કોંગ્રેસના કિરીટ પટેલ, તુષાર ચૌધરી, અમૃત ઠાકોર, જિજ્ઞેશ મેવાણી અને આપના ચૈતર વસાવા, હેમંત ખવા વિગેરેએ પણ આ મુદ્દે રજૂઆત કરતા પત્ર લખ્‍યા છે.

વન વિભાગ અને સરકારમાં સતત રજૂઆતો છતાં પ્રતિભાવ ન મળતા ફોરેસ્‍ટ બીટ ગાર્ડના કેટલાક ઉમેદવારો દ્વારા સીબીઆરટી પદ્ધતિ અને ગુણ જાહેર કરવાના મામલાને હાઇકોર્ટમાં લઇ જવાયો છે. હાઇકોર્ટમાં સ્‍પેશિયલ સિવિલ એપ્‍લિકેશન કરવામાં આવી છે. જેમાં હાઇકોર્ટે ગૌણ સેવા પસંદગી મંડળ સહિતના પક્ષકારોને નોટિસ ઈસ્‍યૂ કરી છે.

(9:47 AM IST)