ગુજરાતમાં વિવાદોથી ઘેરાયેલું ભાજપ સદસ્યતા અભિયાનઃ બે કરોડનાં લક્ષ્યાંક સામે માંડ ૭૦થી ૭૨ લાખ નવા સભ્યો બનાવી શકાયા
સપ્ટેમ્બર માસના પ્રથમ ચરણમાં ગુજરાતમાંથી ૭૦-૭૨ લાખ સભ્યો જ નોંધાયા, હવે ૧ ઓક્ટોબરથી બીજું ચરણ શરૂ થશે ૧૦૦ સભ્ય સામે ૫૦૦ રોકડ લઇ જાવની ઓફર, વિદ્યાર્થી-દર્દીને સદસ્ય બનાવવા સહિતના વિવાદ
નવી દિલ્હી,તા. ૨૫: ભારતીય જનતા પાર્ટી દ્વારા હાલ ગુજરાત સહિત દેશભરમાં વ્યાપક રીતે સદસ્યતા અભિયાનની શરૂઆત કરવામાં આવી છે. છ વર્ષ પછી નવેસરથી સભ્યો બનાવવાની પ્રક્રિયામાં, ખાસ કરીને ગુજરાતમાં અનેક એવા કિસ્સાઓ બન્યા છે તેના કારણે અભિયાન વિવાદોમાં ઘેરાયું છે. તેના કારણે અનેક સમર્થકોમાં એક રીતે મોળો પ્રતિસાદ મળ્યો હોય એમ બે કરોડ જેટલા નવા સભ્યો બનાવવાના લક્ષ્યાંક સામે માંડ ૭૦થી ૭૨ લાખ નવા સભ્યો બનાવી શકાયા છે. ૨ સપ્ટેમ્બરથી શરૂ થયેલું સદસ્યતા અભિયાનનું પ્રથમ ચરણ ૨૫ સપ્ટેમ્બરે પૂરું થઇ રહ્યું છે. હવે ૧ ઓક્ટોબરથી પ્રાથમિક સભ્યોના આધારે નવા સક્રિય સભ્યો સહિતના સભ્યો બનાવવાનું અભિયાન શરૂ થવાનું છે.
વિશ્વની સૌથી મોટી પાર્ટી હોવાનો દાવો કરતાં ભાજપના બંધારણ મુજબ, દર છ વર્ષે તમામ સભ્યોનું સભ્યપદ આપોઆપ સમાપ્ત થતું હોય છે અને નવેસરથી સભ્ય નોંધણી કરવા માટે અભિયાન શરૂ કરાય છે. ભાજપે ૨ સપ્ટેમ્બરે વડાપ્રધાન નરેન્દ્ર મોદીને પ્રથમ સભ્ય બનાવી તેના અભિયાનનો આરંભ કર્યો એ સાથે ક્યૂઆર કોડ, વેબ સાઇટ અને મિસ્ડ કોલ જેવા ટેકનોલોજીનો ઉપયોગ કરી ભાજપ સાથે જોડાવા માગતા લોકોને સભ્ય બનાવવાની પ્રક્રિયા શરૂ કરી હતી. ગુજરાતમાં પ્રદેશ પ્રમુખ સી.આર. પાટીલે મુખ્યમંત્રી ભૂપેન્દ્ર પટેલને પ્રથમ સભ્ય બનાવી આરંભ કર્યો હતો. રાજયમાં અગાઉના ૧.૧૯ કરોડ પ્રાથમિક સભ્યોના લક્ષ્યાંકને વધારીને ૨ કરોડ કર્યો હતો. તેમણે કહ્યું કે, આ લક્ષ્યાંક હાંસલ કરવો બહુ મુશ્કેલ નથી. દરેક જનપ્રતિનિધિએ પોતાને મળેલા મત જેટલા સભ્યો તો બનાવવા જોઇએ. લોકસભા અને વિધાનસભા ચૂંટણીમાં ભાજપને મળેલા મતને ધ્યાનમાં લેવાય, તો પણ આ લક્ષ્યને પાર કરી શકાય એમ છે.
સદસ્યતા અભિયાનના સહ સંયોજક ડો. યજ્ઞેશ દવેએ જણાવ્યું છે કે, અમારું અભિયાન અમારા લક્ષ્યાંક પ્રમાણે આગળ વધી રહ્યું છે. ૨૫ સપ્ટેમ્બરે અભિયાનનો પ્રથમ ચરણ પૂરું થશે. અત્યાર સુધીમાં લગભગ ૭૦થી ૭૨ લાખ જેટલા સભ્યો બની ચૂક્યા છે અને અમને આશા છે કે ઓક્ટોબર માસ સુધીમાં અમે અમારા લક્ષ્ય સુધી પહોંચીશું. અહીં નોંધવું જરૂરી છે કે, ભાજપના વિવિધ મોરચા દ્વારા પણ ખાસ પ્રયાસો ચલાવાઇ રહ્યા છે અને એમાં અનેક લોકો પાસે ફોર્મ ભરાવવા વિગતો, ફોટા વગેરે માગવામાં આવે છે એ વિગતો આપવામાં લોકો ખાસ ઉત્સાહ દાખવતા નથી.
અત્યાર સુધી મિસ્ડ કોલના આધારે સભ્ય બની જવાતું હતું એ પધ્ધતિમાં થોડો ફેરફાર કરાયો છે. હવે મિસ્ડ કોલ બાદ સંબંધિત વ્યક્તિને તેના મોબાઇલ પર એક લિન્ક મોકલવામાં આવે છે અને આ લિન્કમાં રહેલા ફોર્મમાં જેને સભ્ય બનવું હોય એ વિગતો, ફોટા વગેરે સબમિટ કર્યા પછી ઓટીપી આવે અને એ ઓટીપી સબમિટ થયા પછી સભ્ય બનાવાય છે.
આ અભિયાન શરૂ થયાના એક સપ્તાહમાં જ અનેક વિવાદોથી ઘેરાયું હતું. સુરેન્દ્રનગરમાં એક શાળામાં વિદ્યાર્થીઓને મોબાઇલ લઇને આવવાની ખાસ સૂચના આપીને એમના વાલીઓને બારોબાર સભ્ય બનાવવાનો, મહેસાણામાં એક દર્દીને એક્સ રે કરાવવા માટે નોંધણી કરાવીને, તો ભાવનગરમાં એક પૂર્વ પદાધિકારી સિવિલ હોસ્પિટલમાં દાખલ દર્દીઓના સગાઓને સભ્ય બનાવવા કગરતા હોવાના તેમજ એક પદાધિકારીએ તો ૧૦૦ સભ્યો બનાવો અને રૂ.૫૦૦ રોકડ લઇ જાવ એવું કહી રહ્યા હોય એવા વીડિયો સોશીયલ મીડિયામાં વાયરલ થયા હતા. આ જ રીતે અમદાવાદ, વલસાડમાં તો કોંગ્રેસના નેતાઓને બારોબાર ભાજપના સભ્ય બનાવી દેવાયા હોવાનો આરોપ કોંગ્રેસ મૂક્યો હતો. કોંગ્રેસનો દાવો છે કે ભાજપ સરકારની નબળી કામગીરીના લીધે કોઇ એમના અભિયાનને પ્રતિસાદ આપતું નથી.
(11:12 AM IST)
છેલ્લા 8 દિવસમાં સૌથી લોકપ્રિય 
