મહેસાણા,તા.૬,

કડી પંથકમાં વેપારીઓને ટોકન પેટે એડવાન્સ રકમ આપી લાખોની કિંમતનો માલ ખરીદી બીલનાં નાણાં ન આપી ચૂનો ચોપડનારા મુખ્ય ભેજાબાજ સહિત ત્રણ સામે કડી પોલીસ મથકે ફરિયાદ નોંધાવા પામી છે. કડી પોલીસે એકાદ બે વર્ષ અગાઉ બે વેપારીઓ પાસેથી ઈંટોની ખરીદી તેમજ આરસીસીની ફોલ્ડીંગ વોલ બનાવી નાણાં ન આપી રૂ. ૧૦ લાખનો ચૂનો ચોપડાનારા ત્રણ જણા વિરુદ્ધ ગુનો નોંધી તપાસનો ધમધમાટ શરૂ કર્યો છે.

આ અંગે પોલીસ સૂત્રોમાંથી મળતી માહિતી મુજબ અમદાવાદના સરખેજ ખાતે રહેતા અને ઈંટોના વેચાણ કરવાના ધંધા સાથે સંકળાયેલા વેપારી વિમલભાઈ દુર્ભભાઈ પ્રજાપતિ પાસેથી રાજેન્દ્ર સોની (નરોડા, અમદાવાદ) તેમજ મહેશ શંકરભાઈ પટેલ (ચુંવાળ ડાંગરવા જિ. અમદાવાદ)એ રૂ. ૫૦ હજારની ઈંટો ખરીદતાની સાથે જ નાણાં આપી વિશ્વાસ કેળવ્યો હતો. ત્યારબાદ ઉપરોક્ત બન્ને શખ્સોએ ૧૫ દિવસના વાયદે કડી પંથકમાં આદુંદરા રોડ ઉપર ચારમાળીયાની બાજુમાં ભાવેશભાઈ રબારીની જગ્યા સહિતના સ્થળોએ ઈંટો ઉતરાવી હતી. આ બન્ને શખ્સોએ બાકી નીકળતા બીલ પેટેના નાણાં રૂ. ૬.૫૩ લાખ ન આપી છેતરપિંડી આચરી હતી. પાછળથી વેપારીએ ઈંટો ઉતારેલ સ્થળોએ તપાસ કરતાં તમામ ઈંટો બાબર રબારી (ઊંટવા તા. કડી) લઈ ગયો હોવાનું જાણવા મળ્યું હતું.

ઉપરાંત રાજેન્દ્ર રતિલાલ સોનીએ અશોક પટેલ તરીકેનું ખોટુ નામ ધારણ કરી બાબર રબારીની મદદગારીથી કાવતરૂ રચીને વેપારી જયંતીભાઈ રવજીભાઈ ગોહેલ પાસેથી કડી તાલુકાના બલાસર ગામમાં અમરતભાઈ રબારીના ખેતરમાં આરસીસી ફોલ્ડીંગ વોલનું કામ કરાવી બાકી નીકળતા રૂ. ૩.૩૬ લાખ ન આપી છેતરપિંડી કરી હતી. ઉપરોક્ત બન્ને વેપારીઓ પોતે છેતરાયા હોવાનું માલૂમ પડતાં તેઓએ રૂ. ૧૦ લાખનો ચુનો ચોપડનાર અમદાવાદ જિલ્લાના બે અને ઊંટવા ગામના એક મળી ત્રણ શખ્સો સામે અલગ-અલગ બે ફરિયાદ નોંધાવી હતી. કડી પોલીસે ત્રણેય સામે છેતરપિંડીનો ગુનો નોંધી વધુ તપાસ હાથ ધરી છે.