બંગાળની ખાડીમાં ફરી ચક્રવાત સર્જાશે
‘દાના' વાવાઝોડાની અસરના કારણે ગુજરાત સહિત જુદા-જુદા રાજયોમાં વરસાદની આગાહી
અમદાવાદ, તા.૧૯: બંગાળની ખાડીમાં ફરી ચક્રવાત ઉઠી રહ્યું છે. અમેરિકન અને યુરોપિયન વેધર મોડલ્સે જણાવ્યું કે ચક્રવાત Dana ૨૪ થી ૨૬ ઓક્ટોબરની વચ્ચે ભારતના પૂર્વ કિનારે ટકરાશે. દક્ષિણ ભારતમાં સતત વરસાદના કારણે ઘણા ભાગોમાં પૂરની સ્થિતિ બની છે. બેંગલુરુ, ચેન્નઈ અને ઘણા શહેરોમાં પૂરથી લોકો પરેશાન છે. રસ્તાઓ અને રહેણાંક વિસ્તારોમાં પાણી ભરાવાને કારણે સ્થિતિ વધુ ખરાબ છે. હવામાન વિભાગે કહ્યું કે આગામી બે-ત્રણ દિવસમાં વધુ વરસાદની સંભાવના છે. જયારે દિલ્હી અને ઉત્તર ભારતમાં પણ હવામાનમાં પલટો આવવા લાગ્યો છે.
ફરી એકવાર સમુદ્રનો રાક્ષસ જાગી રહ્યો છે. આ વખતે તેનું નામ Dana છે. ચક્રવાત Dana ને લઈને એલર્ટ જારી કરવામાં આવ્યું છે. હવામાન વિભાગે કહ્યું કે દક્ષિણ પશ્ચિમ બંગાળથી લઈને દક્ષિણ ભારતમાં મુશળધાર વરસાદ થઈ શકે છે. આ ચક્રવાત ૨૪ થી ૨૬ ઓક્ટોબરની વચ્ચે દરિયાકાંઠે ટકરાઈ શકે છે. હવામાન વિભાગે કહ્યું કે ભારત, બાંગ્લાદેશ અને મ્યાનમાર આનાથી સૌથી વધુ પ્રભાવિત થવાના છે. જયારે સતત વરસાદને કારણે દ્વીપકલ્પીય ભારતની સ્થિતિ ખરાબ છે. ચેન્નઈથી બેંગલુરુ અને પોંડિચેરીથી તિરુવનંતપુરમ સુધી વરસાદ પડી રહ્યો છે. પૂરના કારણે જનજીવન અસ્તવ્યસ્ત થઈ ગયું છે. લોકોને ફ્લાયઓવર પર કાર પાર્ક કરવાની ફરજ પડી. આગામી ૨ થી ૩ દિવસમાં ઉત્તરી તમિલનાડુ, તટીય આંધ્રપ્રદેશ અને ઓડિશામાં ભારે વરસાદ પડી શકે છે.
છેલ્લા ૨૪ કલાકમાં ઉત્તર તમિલનાડુ અને દક્ષિણ આંધ્રપ્રદેશ તેમજ દક્ષિણ ભારતના ઘણા વિસ્તારોમાં મધ્યમથી ભારે વરસાદ થયો છે. હવામાન વિભાગે જણાવ્યું કે તામિલનાડુ, કેરળ, દક્ષિણ આંતરિક કર્ણાટક, તટીય કર્ણાટક અને આંદામાન નિકોબાર ટાપુઓના ભાગોમાં છેલ્લા ૨૪ કલાકમાં મધ્યમથી ભારે વરસાદ નોંધાયો છે. પૂર્વ કિનારાના ઘણા ભાગો તેમજ પશ્ચિમ કિનારે અને પશ્ચિમ બંગાળના ગંગા મેદાનના કેટલાક ભાગોમાં મધ્યમ વરસાદ થયો હતો. પૂર્વોત્તર ભારત અને ઝારખંડ અને બિહારના કેટલાક ભાગોમાં પણ વરસાદ જોવા મળ્યો હતો.
આગામી ૨૪ કલાકમાં વરસાદ
હવામાન વિભાગે કહ્યું કે આગામી ૨૪ કલાક દરમિયાન ઉત્તર તમિલનાડુ, રાયલસીમા, કર્ણાટક અને કેરળમાં હળવાથી મધ્યમ વરસાદ થઈ શકે છે. કેરળ, તેલંગાણા, તટીય આંધ્રપ્રદેશ, ઓડિશા, પશ્ચિમ બંગાળ, ઝારખંડના ભાગો, કોંકણ અને ગોવા, મધ્ય મહારાષ્ટ્ર અને મરાઠવાડામાં હળવાથી મધ્યમ વરસાદની શકયતા છે. સિક્કિમ, પૂર્વોત્તર ભારત, છત્તીસગઢ, મધ્યપ્રદેશ, ઉત્તરાખંડ, વિદર્ભ અને દક્ષિણ ગુજરાતના કેટલાક ભાગોમાં હળવો વરસાદ થઈ શકે છે.
માછીમારો માટે એલર્ટ
હવામાન વિભાગે જણાવ્યું હતું કે બંગાળની ખાડીમાં ઉદ્દભવેલુ લો પ્રેશરનું વાવાઝોડું ભારતીય ક્ષેત્રને પાર કરીને અરબી સમુદ્રમાં પહોંચી ગયું છે. જેના કારણે કિનારાથી દૂર અરબી સમુદ્રમાં હલચલ જોવા મળી રહી છે. માછીમારોને અરબી સમુદ્રમાં માછીમારી કે અન્ય પ્રવળત્તિઓ માટે ન જવાની સલાહ આપવામાં આવી છે.
દિલ્હીનું હવામાન
શુક્રવારે દિલ્હીનું હવામાન ચોંકાવનારું હતું. ભેજના કારણે લોકોની હાલત ખરાબ હતી. હવામાન વિભાગના જણાવ્યા અનુસાર, શુક્રવારે દિલ્હી એનસીઆરમાં ૩૬.૨ ડિગ્રી સેલ્સિયસ નોંધાયું હતું, જે સામાન્ય કરતાં ચાર ડિગ્રી વધુ છે. જયારે દિવસ દરમિયાન ભેજનું સ્તર ૫૧ ટકાથી ૯૧ ટકાની વચ્ચે રહ્યું હતું.
(1:48 PM IST)
છેલ્લા 8 દિવસમાં સૌથી લોકપ્રિય 
