અમદાવાદના અમરાઈવાડી વિસ્તારમાં આતંક મચાવનાર લુખ્ખા તત્વોને પોલીસે કાયદાનું ભાન કરાવ્યું છે.

તાજેતરમાં જ અમરાઈવાડીની મંજુ શેઠની ચાલીમાં ઘર નજીક ગાળો બોલી રહેલા આવારા તત્વોને સ્થાનિક રહેવાશીએ ઠપકો આપ્યો હતો. જેનો ખાર રાખીને 6 થી 7 જેટલા લુખ્ખાઓનું ટોળું હાથમાં પાઈપો અને ખુલ્લી તલવારો લઈને ધસી આવ્યું હતુ. જ્યાં દુકાનો અને વાહનોમાં તોડફોડ કરીને આતંક મચાવ્યો હતો.

આ મામલે ગભરાયેલા દંપતીએ પોલીસ કંટ્રોલ રૂમને જાણ કરતાં પોલીસ કાફલો ઘટના સ્થળે પહોંચે તે પહેલા જ અસામાજિક તત્વો નાસી છૂટ્યા હતા. આ મામલે પોલીસે 6 ઈસમો વિરુદ્ધ ગુનો નોંધ્યો હતો.

આજે આ ગુનામાં ધરપકડ કરવામાં આવેલા આરોપીઓને સાથે રાખીને પોલીસે પંચનામું કર્યું હતુ. જેના માટે આરોપીઓને તેમણે જે સ્થળે આતંક મચાવ્યો હતો, ત્યાં જ લઈ જઈને ઘટનાનું રિકન્સ્ટ્રક્શન કરાવવામાં આવ્યું હતુ. જ્યાં આરોપીઓએ બે હાથ જોડીને સ્થાનિકોની માફી માંગી હતી. આ સમયે મોટી સંખ્યામાં સ્થાનિકો પોલીસની કાર્યવાહી નિહાળવા ઉમટી પડ્યા હતા.