અમદાવાદ,તો ૨૯: GSTનો અમલ શરૂ થયો ત્‍યારથી જ ગુજરાતમાં GST ચોરી અને બોગસ બિલિંગ કૌભાંડ વધી ગયું છે. ચોક્કસ વેપારીઓ બિલ વગર જ માલ વેચી રહ્યા છે ત્‍યારે દિવાળી ટાણે GST ચોરીનું પ્રમાણ વધતાં અધિકારીઓએ રાજયવ્‍યાપી દરોડા પાડીને ૩.૨૮ કરોડની GST ચોરી શોધી કાઢી હતી. અધિકારીઓએ ફટકડાં, કપડાં અને આઇસ્‍કીમના વેપારીની પ્રિમાઇસીસ પર દરોડા પાડ્‍યા હતા.

GST અધિકારીઓને બાતમી મળી હતી કે દિવાળીના દિવસોમાં મોટાપાયે ચાલી રહેલી ખરીદીમાં મોટાભાગના વેપારીઓ બિલ વગર જ વેપાર કરી રહ્યા છે અને GST ચોરી કરી રહ્યા છે. આ માહિતીને આધારે GST અધિકારીઓએ સુરત, ભાવનગર અને કલોલમાં ફટાકડાંના વેપારીઓ પર દરોડા પાડ્‍યા હતા. જયારે આઇસ્‍ક્રીમ અને કપડાંના અમરેલી અને ગાંધીનગરના વેપારીઓને ત્‍યાં દરોડા પાડીને લાખો રૂપિયાની કરચોરી શોધી કાઢી હતી.

અધિકારીઓએ ભાવનગરના ફટાકડાંના વેપારીઓના ચોપડા ચેક કરી ૧.૭૨ કરોડની GST ચોરી શોધી કાઢી હતી. સુરતના ફટાકડાંના વેપારીઓની ૪૧ લાખની GST ચોરી અને અમેરેલીના આઇસ્‍ક્રીમના વેપારીઓની ૩૦ લાખની તથા ગાંધીનગરના કપડાંના વેપારીઓની ૮૫ લાખની GST ચોરી શોધી હતી.

તહેવારના પગલે છેલ્લા અઠવાડિયાથી ગુજરાતભરમાં તમામ કોમોડિટીમાં ધૂમ ખરીદી જામી છે. નવા કપડાં અને ફટાકડાંની દુકાનો આગળ તો ગ્રાહકોની લાઇનો લાગી રહી છે. હવે આ વેપારીઓ GST ચોરી કરવા માટે બિલ વગર જ કરોડો રૂપિયાનો માલ વેચી રહ્યા છે. GST અધિકારીઓ રાજયભરમાં દરોડા પાડી રહ્યા છે. ફટાકડા, આઇસ્‍ક્રીમ અને કપડાંના વેપારીઓના હિસાબો ચેક થઇ જતાં ડિપાર્ટમેન્‍ટ દ્વારા તેની વિગતો જાહેર કરી દેવામાં આવી છે. જોકે અન્‍ય કોમેડિટીઝમાં પણ તપાસ ચાલી રહી છે.

ઉલ્લેખનીય છે કે, ગુજરાતમાં બોગસ બિલિંગ કૌભાંડની તપાસનો આંકડો ૭૦ હજાર કરોડને પાર થઇ ગયો છે તેમ છતાં રોજેરોજ બોગસ બિલિંગ કૌભાંડના આંકડા સામે આવી રહ્યા છે.

દિવાળીમાં બિલ વગર કરોડોનો વેપાર, બિલ લેવાનો આગ્રહ રાખવો જરૂરી

GSTના સિનિયર અધિકારીઓએ રાજયભરના ગ્રાહકાને અનુરોધ કર્યો છે કે, દિવાળી વખતે કોઇ પણ ચીજવસ્‍તુની ખરીદી કરો ત્‍યારે બિલ લેવાનો ચોકક્‍સ આગ્રહ રાખો. બિલ લેવાથી GST ચોરી ઘટશે અને તમે જેતે દુકાનેથી વસ્‍તુ ખરીદી છે તેની સાબિતી રહેશે.