ગાંધીનગર, 14 માર્ચ : બિલ્ડરો અને ઘર ખરીદનારાઓને રાહત આપતા સમાચાર સામે આવી રહ્યા છે. સૂત્રો પાસેથી જાણવા મળી રહ્યું છે કે, રાજ્ય સરકાર રાજ્યના ગ્રામીણ વિસ્તારોમાં જંત્રી દર જાળવી રાખીને શહેરી વિસ્તારોમાં જંત્રીના દરોમાં ઘટાડો કરે તેવી શક્યતા છે. નવા જંત્રી દરો 1 એપ્રિલથી લાગુ થવાની શક્યતા છે. આ અંગેની તૈયારીને આખરી ઓપ આપવામાં આવી રહ્યો છે.

સત્તાવાર સૂત્રોના જણાવ્યા અનુસાર, મહેસૂલ વિભાગે પ્રસ્તાવિત દરો અંગે સૂચનો અને વાંધાઓનો સમાવેશ કરીને તેનો અહેવાલ મુખ્યમંત્રીને સુપરત કર્યો છે. ટૂંક સમયમાં સત્તાવાર જાહેરાત થવાની અપેક્ષા છે. રાજ્ય સરકારે છેલ્લે ગયા વર્ષે એપ્રિલમાં જંત્રીના દરોમાં સુધારો કર્યો હતો, તેને સમગ્ર રાજ્યમાં બમણો કરી દીધો હતો. જો કે, વ્યાપક વિરોધને પગલે, સરકારે વૈજ્ઞાનિક રીતે દરોનું પુન: મૂલ્યાંકન કર્યું અને ગયા વર્ષે નવેમ્બરમાં સુધારેલા આંકડા જાહેર કર્યા હતા. રાજ્યમાં 40,000 થી વધુ વેલ્યુ ઝોન છે. જેમાં 23,845 શહેરી વિસ્તારોમાં અને 17,131 ગ્રામીણ વિસ્તારોમાં છે.

એક વરિષ્ઠ અધિકારીએ જણાવ્યું કે શહેરી વિસ્તારોમાં જંત્રીના દરમાં ઘટાડો થવાની સંભાવના છે, જ્યારે ગ્રામીણ વિસ્તારોમાં કોઈ મોટા ફેરફારની અપેક્ષા નથી. શહેરી વિસ્તારોમાં ગોઠવણોનો ઉદ્દેશ હાઉસિંગ સેક્ટરને ટેકો આપવા અને લોકો માટે પોસાય તેવા આવાસની ખાતરી કરવાનો છે. સરકારે 20 જાન્યુઆરી, 2025 સુધી જંત્રીના દરોના સંબંધમાં સૂચનો અને વાંધાઓ મંગાવ્યા હતા.

ઉલ્લેખનીય છે કે, રિયલ એસ્ટેટ ઉદ્યોગે નવા દરોનો સખત વિરોધ કર્યો હતો અને એવી દલીલ કરી હતી કે તેઓ સેક્ટરને ગંભીર અસર કરશે. છેવટે અંતિમ વપરાશકારો (સંપત્તિ ખરીદનારા)ને અસર કરશે. જંત્રીના દરોમાં વધારો થવાથી રાજ્યની આવકમાં વધારો થવાની અપેક્ષા છે. 2024-25માં, સ્ટેમ્પ ડ્યુટીમાંથી આવક રૂ.16,493 કરોડ હતી, જે આગામી નાણાકીય વર્ષમાં વધીને રૂ.20,000 કરોડ થવાનો અંદાજ છે.

મહત્વનું છે કે, જંત્રીના દરમાં એક દાયકા કરતાં વધુ સમય પછી સુધારો કરવામાં આવી રહ્યો છે, જેમાં છેલ્લું પુનરાવર્તન 2011માં કરવામાં આવ્યું હતું. ગયા વર્ષે નવેમ્બરમાં, સરકારે સુધારા માટે વટહુકમ બહાર પાડ્યો હતો અને સૂચનો અને વાંધાઓ એકત્ર કરવા માટે જિલ્લા-સ્તરની સમિતિઓની રચના કરી હતી. આ સમિતિઓએ તેમના અહેવાલો રાજ્યના મહેસૂલ વિભાગને સુપરત કર્યા છે.