સુરત જિલ્લાના પલસાણા તાલુકાના તાતીઝઘડા ગામે જૂની અદાવતમાં યુવકની ઘાતકી હત્યાનો બનાવ સામે આવ્યો છે. આ મામલે 4 આરોપીઓ વિરુદ્ધ પોલીસ ફરિયાદ નોંધાઈ છે.

આ મામલે તાતીઝઘડા ગામના હળપતિ ફળિયામાં રહેતા સુધાબેન રાઠોડે જણાવ્યું કે, ગઈકાલે રાતે સાડા 10 વાગ્યાના અરસામાં તેમનો પુત્ર આયુષ ઘરમાં સૂઈ રહ્યો હતો. આ સમયે કૌશિક ઉર્ફે અજયભાઇ ઉર્ફે ડેગો બાલુભાઇ રાઠોડ, વિશાલ નાનુભાઇ રાઠોડ, દેવો ગુણવંતભાઇ રાઠોડ અને આનંદ ગમલેશભાઇ ઉર્ફે ગુમલો રાઠોડ તેમના ઘરમાં ઘુસી ગયા હતા.

આ સમયે સૂઈ રહેતા તેના પુત્ર આયુષ સાથે જૂના ઝઘડાનો ખાર રાખીને ગાળો ભાંડતા ઢીકા-પાટુનો માર મારતા ઘરની બહાર લઈ ગયા હતા. જ્યાં કૌશિક ઉર્ફે ડેંગાએ આયુષનું ગળું દબાવીને તેને મોતને ઘાટ ઉતારી દીધો હતો. આ સમયે સુધાબેન વચ્ચે પડતાં આરોપીઓએ તેમને પણ માર માર્યો હતો. જો કે બૂમાબૂમ થતાં આરોપીઓ પોતાનું બાઈક ઘટના સ્થળે મૂકીને ફરાર થઈ ગયા હતા. આ મામલે પલસાણા પોલીસે સુધાબેનની ફરિયાદના આધારે 4 ઈસમો વિરુદ્ધ હત્યાનો ગુનો દાખલ કરીને તેમની ધરપકડ માટે તપાસના ચક્રો ગતિમાન કર્યાં છે.