અમદાવાદ : રાજ્યની સરકારી તેમજ ગ્રાન્ટેડ માધ્યમિક તેમજ ઉચ્ચતર માધ્યમિક શાળાઓમાં યોજાનારી શિક્ષણ સહાયકની ભરતીમાં જે તે વિષયની ઉપલબ્ધ જગ્યાઓની સામે ઓછી અરજી આવતા ટેટ મુખ્ય પરીક્ષાના કટ ઓફમાં ઘટાડો કરવા શૈક્ષિક સંઘ દ્વારા માગણી કરવામાં આવી છે. કટ ઓફમાં 60 ટકાથી ઘટાડો કરી ઉપલબ્ધ જગ્યા ભરાય તે અનુસાર કટઓફ રાખવા માગણી કરવામાં આવી છે. મનોવિજ્ઞાન, તત્વજ્ઞાન, સમાજશાસ્ત્ર સહિતના વિષયોમાં ઉપલબ્ધ જગ્યા કરતા ઓછી અરજી આવી હોવાથી આ જગ્યાઓ ખાલી રહે તો શિક્ષણ પર અસર થાય તેમ હોવાથી કટ ઓફમાં ઘટાડો કરવા માગણી કરવામાં આવી છે. 

પ્રાપ્ત માહિતી અનુસાર, રાજ્યના શિક્ષણ વિભાગ દ્વારા ચાલુ વર્ષે સરકારી તેમજ ગ્રાન્ટેડ માધ્યમિક તેમજ ઉચ્ચતર માધ્યમિક શાળાઓમાં શિક્ષણ સહાયકની ભરતીની કાર્યવાહી ચાલી રહી છે. જેમાં દરેક વિષયમાં ટેટ મુખ્ય પરીક્ષામાં 60 ટકા ગુણ મેળવનાર ઉમેદવાર અરજી કરવા પાત્ર બન્યા હતા. પરંતુ મળતી માહિતી મુજબ મનોવિજ્ઞાન, તત્વજ્ઞાન, સમાજશાસ્ત્ર, અંગ્રેજી, આંકડાશાસ્ત્ર તથા અન્ય વિષયોમાં ઉપલબ્ધ જગ્યાઓના પ્રમાણમાં અરજી ન આવતા આ જગ્યાઓ ખાલી રહે તેવી શક્યતા છે. આમ, જગ્યાની સામે ઓછી અરજી આવવાના પગલે લાંબા સમયથી ખાલી જગ્યાઓ વધુ સમય ખાલી રહેતા વિદ્યાર્થીઓના અભ્યાસ પર અસર થાય તેવી શક્યતા છે.

આ વિગતોને જોતા તથા સરકારી ઉચ્ચતર માધ્યમિક વર્ગ-3 (પ્રોસિજર ફોર સિલેક્શન)ના નિયમો અને ટીચર ઓફ રજિસ્ટર્ડ પ્રાઇવેટ સેકન્ડરી એન્ડ હાયર સેકન્ડરી સ્કૂલ (પ્રોસિજર ફોર સિલેક્શન)ના નિયમો અનુસાર સમિતિ આ બાબતે મુખ્ય પરીક્ષામાં 60 ટકા માર્કસમાં ઘટાડો કરી ઉમેદવારની ઘટને દૂર કરી શકે છે. જેથી આ તમામ બાબતને જોતાં અખિલ ભારતીય રાષ્ટ્રીય શૈક્ષિક મહાસંઘ દ્વારા ટાટ મુખ્ય પરીક્ષાના 60 ટકા જગ્યા અને મેરિટને ધ્યાને રાખી કટ ઓફ માર્કમાં ઘટાડો કરી તમામ જગ્યાઓ ભરાય તે અંગે યોગ્ય કરવા માગણી કરવામાં આવી છે.