રાજપીપલા, 12 એપ્રિલ 2025: નર્મદા જિલ્લાના રાજપીપલા ખાતે મુખ્યમંત્રી ભૂપેન્દ્રભાઈ પટેલે સમાજ સુધારક, શિક્ષણવિદ અને આદિવાસી કલ્યાણ માટે આજીવન સમર્પિત રહેલા સ્વ. રત્નસિંહજી મહિડાની યાદમાં શરૂ કરાયેલા "રત્નસિંહજી મહિડા મેમોરિયલ એવોર્ડ"નું વિતરણ કર્યું. આ વર્ષે પ્રથમ વખત આપવામાં આવેલો આ એવોર્ડ બિરસા મુંડા ટ્રાયબલ યુનિવર્સિટી, રાજપીપલાના કુલપતિ ડો. મધુકરભાઈ પાડવી અને આંધ્ર યુનિવર્સિટી, વિશાખાપટ્ટનમના પ્રથમ આદિવાસી મહિલા કુલપતિ ડો. એસ. પ્રસન્નાશ્રીને એનાયત કરવામાં આવ્યો. આ પ્રસંગે મુખ્યમંત્રીએ સ્વ. રત્નસિંહજી મહિડાના શિક્ષણ અને આદિવાસી સશક્તિકરણ માટેના અવિરત પ્રયાસોની પ્રશંસા કરી.

મુખ્યમંત્રી ભૂપેન્દ્રભાઈ પટેલે જણાવ્યું કે, વડાપ્રધાન નરેન્દ્રભાઈ મોદીના નેતૃત્વમાં આદિવાસી કલ્યાણ માટેના બજેટમાં ત્રણ ગણો વધારો થયો છે. ધરતી આબા જનજાતિય ગ્રામ ઉત્કર્ષ અભિયાન હેઠળ 63,000થી વધુ ગામોમાં સામાજિક માળખાકીય સુવિધાઓના કામોને વેગ મળ્યો છે. ગુજરાતમાં 14 આદિજાતિ જિલ્લાઓના 53 તાલુકાઓમાં આદિવાસી સમુદાયના સર્વગ્રાહી વિકાસ માટે રાજ્ય સરકારે નોંધપાત્ર પગલાં લીધાં છે. આદિવાસી યુવાનોને ઘરઆંગણે સ્કિલ-આધારિત, વ્યાવસાયિક, ટેકનિકલ અને આદિજાતિ કલા-સંસ્કૃતિનું ઉચ્ચ શિક્ષણ આપવા રાજપીપલામાં શ્રી બિરસા મુંડા ટ્રાયબલ યુનિવર્સિટીની સ્થાપના કરવામાં આવી છે. આ વર્ષે આદિજાતિ વિકાસ વિભાગના બજેટમાં શિક્ષણ યોજનાઓ માટે વધારાના 3,300 કરોડ રૂપિયાની ફાળવણી કરવામાં આવી છે.

મુખ્યમંત્રીએ ઉમેર્યું કે, શ્રી બિરસા મુંડાની 150મી જન્મજયંતિ નિમિત્તે ઉજવાતા જનજાતિય ગૌરવ વર્ષમાં આ એવોર્ડની શરૂઆત એક ઐતિહાસિક સંયોગ છે. વિવિધ ક્ષેત્રોમાં ઉત્કૃષ્ટ યોગદાન આપનાર આદિવાસી વ્યક્તિઓને સન્માનિત કરવાનો આ ઉપક્રમ આદિજાતિ ઉત્કર્ષ માટે નવી પ્રેરણા પૂરી પાડશે. તેમણે સ્વ. રત્નસિંહજી મહિડાના પૌત્રી વિરાજકુમારી મહિડાને તેમના દાદાના વારસાને આગળ ધપાવવા બદલ બિરદાવ્યાં.

સ્વ. રત્નસિંહજી મહિડાએ 1957માં ભરૂચ જિલ્લામાં આદિવાસી સેવા સંઘની સ્થાપના કરી, જેના દ્વારા બાલવાટિકાથી લઈને કોલેજ સુધીની 72 શિક્ષણ સંસ્થાઓ સ્થાપી. આ પ્રયાસોએ આદિવાસી અને વંચિત સમુદાયો માટે શિક્ષણની નવી તકો ખોલી, જેના પરિણામે અસંખ્ય લોકોના જીવનમાં આમૂલ પરિવર્તન આવ્યું.

ભરૂચના સાંસદ મનસુખભાઈ વસાવાએ જણાવ્યું કે, રાજપીપલા એક સમયે મિની કાશ્મીર તરીકે ઓળખાતું હતું અને અહીં ગુજરાતી-ભોજપુરી ફિલ્મોનું શૂટિંગ થતું હતું. તેમણે રાજપીપલાના શિક્ષણ ક્ષેત્રે ઐતિહાસિક યોગદાનની ચર્ચા કરી, જેમાં સ્વ. રત્નસિંહજી મહિડા અને મહારાજાનો મહત્ત્વનો ફાળો રહ્યો. અહીંની શાળાઓ, કોલેજો અને સરકારી કચેરીઓ મહારાજા દ્વારા ભેટ આપેલી ઇમારતોમાં આજે પણ કાર્યરત છે.

આ પ્રસંગે એવોર્ડ પ્રાપ્ત કરનાર ડો. મધુકરભાઈ પાડવી અને ડો. એસ. પ્રસન્નાશ્રીએ પોતાના પ્રતિભાવો રજૂ કર્યા. આ ઉપરાંત, રાજ્ય અને રાષ્ટ્રીય કક્ષાએ શ્રેષ્ઠ કૌશલ્ય દર્શાવનાર રાજપીપલાના પાંચ નાગરિકોને ONGCના સહયોગથી સન્માનિત કરવામાં આવ્યા.

છોટુભાઈ પુરાણી વ્યાયામ મહાવિદ્યાલયના ગ્રાઉન્ડ ખાતે યોજાયેલા આ કાર્યક્રમમાં ભરૂચના સાંસદ મનસુખભાઈ વસાવા, નાંદોદના ધારાસભ્ય ડો. દર્શનાબેન દેશમુખ, વિરાજકુમારી મહિડા, રાજપીપલાના અગ્રણી માનવેન્દ્રસિંહ ગોહિલ, અભિનેતા અને ભૂતપૂર્વ સાંસદ ડો. નીતિશ ભારદ્વાજ, સન્માનિત વ્યક્તિઓ, રાજવી પરિવારો, જિલ્લા વહીવટી તંત્રના અધિકારીઓ અને પ્રતિષ્ઠિત નાગરિકો ઉપસ્થિત રહ્યા.