<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Sunday, 13th April 2025

ગુજરાતમાં હવામાનની ચેતવણી : 15-17 એપ્રિલે કચ્છ, રાજકોટ, બનાસકાંઠા, સાબરકાંઠામાં યલો એલર્ટ : 12 જિલ્લામાં માવઠાની શક્યતા

હવામાન વિભાગની આગાહી : દરિયાકાંઠે ગરમ-ભેજવાળું વાતાવરણ : ભારે પવન સાથે હળવો વરસાદ : 15 એપ્રિલથી તાપમાન 42 ડિગ્રીને પાર જવાની શક્યતા

અમદાવાદ: ગુજરાતમાં છેલ્લા થોડા દિવસથી ગરમીથી રાહત મળી હોવા છતાં હવામાન વિભાગે આગામી દિવસો માટે નવી ચેતવણી જાહેર કરી છે. 15થી 17 એપ્રિલ દરમિયાન કચ્છ, બનાસકાંઠા, સાબરકાંઠા અને રાજકોટમાં યલો એલર્ટ જાહેર કરવામાં આવ્યું છે, જ્યાં ગરમ અને ભેજવાળું હવામાન રહેવાની સંભાવના છે. આ ઉપરાંત, રાજ્યના 12 જિલ્લાઓમાં હળવા વરસાદ અને ભારે પવનની આગાહી કરવામાં આવી છે. હવામાન વિભાગે 19 એપ્રિલ સુધીની આગાહી જાહેર કરીને લોકોને સાવચેત રહેવા જણાવ્યું છે.

હવામાન વિભાગના જણાવ્યા મુજબ, રાજ્યના દક્ષિણ ગુજરાત, સૌરાષ્ટ્ર અને મધ્ય ગુજરાતના કેટલાક વિસ્તારોમાં આજે હળવા વરસાદની શક્યતા છે. અમદાવાદ, સુરત, નર્મદા, ડાંગ, નવસારી, તાપી, દમણ, અમરેલી, ભાવનગર, બોટાદ, ભરૂચ અને આણંદના કેટલાક ભાગોમાં છૂટાછવાયો વરસાદ પડી શકે છે. આ સમયગાળા દરમિયાન 30થી 40 કિલોમીટર પ્રતિ કલાકની ઝડપે પવન ફૂંકાવાની સંભાવના છે. 13-14 એપ્રિલ અને 18-19 એપ્રિલ દરમિયાન હવામાન સામાન્ય રહેવાની શક્યતા છે, જેના કારણે લોકોને ગરમીથી થોડી રાહત મળી શકે છે.

હાલના ઠંડા પવનનું કારણ એન્ટીસાયક્લોનિક સર્ક્યુલેશન અને અન્ય રાજ્યોમાં રચાયેલી વરસાદી સિસ્ટમ છે, જેના પરિણામે ગુજરાતના તાપમાનમાં 2થી 3 ડિગ્રીનો ઘટાડો થયો છે. જોકે, હવામાન વિભાગે ચેતવણી આપી છે કે 15 એપ્રિલથી તાપમાન ફરી એકવાર વધવાનું શરૂ થશે અને રાજ્યના મોટાભાગના વિસ્તારોમાં તાપમાન 42 ડિગ્રીને પાર કરી શકે છે. દરિયાકાંઠાના વિસ્તારોમાં ભેજનું પ્રમાણ વધુ રહેવાથી ગરમીની અસર વધુ અનુભવાશે.

બીજી તરફ, ઉત્તર ભારતમાં પણ હવામાનમાં ફેરફારની આગાહી છે. 16 એપ્રિલથી દિલ્હી સહિત ઉત્તર ભારતમાં હીટવેવની સ્થિતિ સર્જાશે, જેના માટે યલો એલર્ટ જાહેર કરવામાં આવ્યું છે. આ દરમિયાન 20થી 30 કિલોમીટર પ્રતિ કલાકની ઝડપે પવન સાથે ધૂળભરી આંધી આવી શકે છે. દિલ્હીમાં 14-15 એપ્રિલે તાપમાન 38થી 41 ડિગ્રી અને લઘુત્તમ તાપમાન 21થી 24 ડિગ્રીની વચ્ચે રહેવાની શક્યતા છે.

ગુજરાતના હવામાન વિભાગે લોકોને ગરમી અને માવઠાની સ્થિતિને ધ્યાનમાં રાખીને સાવચેતી રાખવા અને જરૂરી તૈયારીઓ કરવા અપીલ કરી છે. આગામી દિવસોમાં હવામાનની સ્થિતિને ધ્યાનમાં રાખીને ખાસ કરીને ખેડૂતો અને દરિયાકાંઠે રહેતા લોકોને સતર્ક રહેવા જણાવાયું છે.

 

(2:32 PM IST)