તા. ૨ સપ્ટેમ્બર ર૦ર૫ વિક્રમ સંવત ર૦૮૧ ભાદરવો સુદ – ૧૦ મંગળવાર
News of Sunday, 13th April 2025
અમદાવાદમાં હોસ્પિટલ એસોસિયેશન અને વીમા કંપનીઓ વચ્ચે તીખો વિવાદ : કેશલેસ સારવાર બંધ કરવાથી દર્દીઓ મુશ્કેલીમાં
AHNA એ ટાટા એઆઈજી, સ્ટાર હેલ્થ અને કેર હેલ્થની નીતિઓ પર ઉઠાવ્યા સવાલ : ક્લેઈમ સેટલમેન્ટમાં ધાંધલ અને ડિલિસ્ટિંગનો આરોપ

અમદાવાદ: અમદાવાદ હોસ્પિટલ્સ એન્ડ નર્સિંગ હોમ્સ એસોસિયેશન (AHNA) અને કેટલીક મોટી વીમા કંપનીઓ વચ્ચેનો વિવાદ ચરમસીમાએ પહોંચ્યો છે. આહનાએ ટાટા એઆઈજી, સ્ટાર હેલ્થ અને કેર હેલ્થ ઈન્સ્યોરન્સ ધરાવતા દર્દીઓ માટે કેશલેસ સારવારની સુવિધા છેલ્લા 10 દિવસથી બંધ કરી દીધી છે. આ નિર્ણય પાછળ વીમા કંપનીઓની ક્લેઈમ સેટલમેન્ટમાં અનિયમિતતા, હોસ્પિટલોને ડિલિસ્ટ કરવા અને ચૂકવણીમાં વિલંબ જેવી ફરિયાદો હોવાનું આહનાએ જણાવ્યું છે. આ વિવાદના કારણે દર્દીઓને મુશ્કેલીનો સામનો કરવો પડી રહ્યો છે, અને હોસ્પિટલો તથા વીમા કંપનીઓ વચ્ચે તણાવ વધી ગયો છે.
AHNA ના પ્રતિનિધિઓએ જણાવ્યું કે આ ત્રણેય વીમા કંપનીઓ દ્વારા અમદાવાદની અનેક હોસ્પિટલોને કોઈ પૂર્વ સૂચના કે ન્યાયિક પ્રક્રિયા વિના ડિલિસ્ટ કરવામાં આવી છે. આના કારણે આ હોસ્પિટલોમાં સારવાર લેનારા દર્દીઓને વીમાની રકમ મેળવવામાં મુશ્કેલી પડી રહી છે. આ ઉપરાંત, હોસ્પિટલોના ચાર્જમાં છેલ્લા ત્રણ-ચાર વર્ષથી કોઈ વધારો ન કરવામાં આવ્યો હોવાનો આરોપ પણ આહનાએ લગાવ્યો છે. વધુમાં, વીમા કંપનીઓ દ્વારા ઓથોરાઈઝેશન લેટર આપ્યા બાદ પણ ડિસ્ચાર્જ સમયે અથવા બાદમાં રકમમાં મોટો કાપ મૂકવામાં આવે છે, જેના લીધે દર્દીઓ અને હોસ્પિટલો વચ્ચે ગેરસમજ ઊભી થાય છે. નોન-મેડિકલ વ્યક્તિઓ દ્વારા અર્થહીન સવાલો ઉભા કરીને ક્લેઈમ રદ કરવા અને ચૂકવણીમાં વિલંબ જેવી સમસ્યાઓ પણ સામે આવી છે.
આ મુદ્દે ઈન્ડિયન મેડિકલ એસોસિયેશન-ગુજરાત, અમદાવાદ મેડિકલ એસોસિયેશન, અમદાવાદ ફિઝિશિયન એસોસિયેશન, અમદાવાદ ઓર્થોપેડિક સોસાયટી, એસોસિયેશન ઓફ અમદાવાદ સર્જન્સ, ગાયનેકોલોજીસ્ટ એસોસિયેશન તથા વડોદરા, રાજકોટ, ભાવનગરના હોસ્પિટલ એસોસિયેશનો અને ગુજરાત એસોસિયેશન ઓફ હોસ્પિટલ્સ એન્ડ નર્સિંગ હોમ્સ દ્વારા AHNA ની લડતને સંપૂર્ણ ટેકો જાહેર કરવામાં આવ્યો છે. AHNA એ વીમા કંપનીઓ સમક્ષ અનેક માંગણીઓ રજૂ કરી છે, જેમાં સમયસર ચૂકવણી, ઓથોરાઈઝેશન લેટર મુજબ રકમ ચૂકવવી, હેલ્થકેર ઈન્ફ્લેશન પ્રમાણે દર વર્ષે ચાર્જમાં વધારો, ફાર્મસી અને ઈમ્પ્લાન્ટ્સ પર ડિસ્કાઉન્ટ ન માંગવું અને હોસ્પિટલોને ડિલિસ્ટ ન કરવાનો સમાવેશ થાય છે.
બીજી તરફ, વીમા કંપનીઓએ AHNA ના આરોપોને ફગાવી દીધા છે. તેમનું કહેવું છે કે અમદાવાદ, વડોદરા, સુરત સહિત અન્ય શહેરોમાં તેમની કેશલેસ સેવાઓ કોઈપણ મુશ્કેલી વિના ચાલી રહી છે. તેમણે AHNA પર જનતાને ગેરમાર્ગે દોરવાનો આરોપ લગાવ્યો અને જણાવ્યું કે AHNA એ તેમની સાથે સંવાદ સાધવા માટે કોઈ પ્રયાસ કર્યો નથી. આ વિવાદના કારણે દર્દીઓને સૌથી વધુ હાલાકીનો સામનો કરવો પડી રહ્યો છે, અને આ મુદ્દો હવે વધુ ગંભીર બની રહ્યો છે.
(2:52 PM IST)









છેલ્લા 8 દિવસમાં સૌથી લોકપ્રિય 
